Read Runyoro - rutooro 2 Byok 4 Bible Online

2 Byok 4 - Runyoro - rutooro bible

2 Byok 4

¹Yakora itambiro ery'omulinga, oburaiha bwalyo mita mwenda, obugazi mita mwenda, obwemi mita ina n'ekicweka.

²Hanyuma yakora etanka enyakwagiibwe omubyoma; enkooto, ey'emikono ikumi, okuruga ha mugoma ogumu okuhika ha gundi, obwemi emikono etaano, okugyehinguliriza, emikono amakumi asatu.

³Hansi y'etanka egi, kandi n'okugyehinguliriza, hakaba haroho ebisoro ebirukusisana ente enimi; zikaba zeehinguliriize etanka emikono nk'asatu n'okukiraho; ente ziheesiirwe omukintu kimu hamu n'ebindi. Etanka egi, ekaba eyemeriire ha nimi ezi ikumi na ibiri, isatu iroleriire ha bukiizi bw'emoso, isatu ha bukiizi obwa Bugwaizooba, isatu ha bukiizi bw'obulyo; isatu ha bukiizi obwa Burugaizooba; ha nimi ezi, amaguru gaazo goona ag'enyuma gemeriire omunda,

⁴etanka nuho ekaba eyemeriire.

⁵Omukoba gwayo gukaba niguhikya orutambu rumu; omugoma gwayo gukaba gubuumbirwe nk'omugoma gw'ekikopo, nk'ekyakyo ky'iranga; yagendwamuga lita enkumi isatu.

⁶Kandi yakora ebbeeseni ez'okunaabiramu ikumi, itaano yazita ha rubaju orw'obulyo, itaano yazita harw'obumoso. Omu bbeeseni ezi, nuho baayogezaaga ebintu ebyayekonyezibwaga kukwatiramu ebihongwa eby'okwokya, kandi etanka, niyo yabamuga amaizi agaanabwaga banyakatagara.

⁷ Yakora ebikondo by'etaara ikumi eby'ezaabbu, nkooku byaragiirwe kukorwa, yabita omunju, bitaano ha rubaju orw'obulyo, bitaano ha rubaju orw'emoso.

⁸Kandi yakora n'emeeza ikumi, nazo yazita omunju ya MUKAMA, itaano ha rubaju orw'obulyo, itaano ezindi, ha rubaju orw'emoso. Yakora n'ebbeeseni kikumi ez'ezaabbu.

⁹Yakora ezigati eya banyakatagara, ezigati enkooto, n'enyigi ez'ezigati egi, enyigi zaazo yazisiiga omulinga;

¹⁰ha rubaju orw'obulyo orw'Enju orwa Burugaizooba, nuho yata etanka.

¹¹Huuramu akakora n'eminaga, ebitiyo n'ebbeseni. Omulimo ogu yakoliire omukama Solomooni ha Nju ya MUKAMA, nukwo yagumazire ati:

¹²enyomyo ibiri, ebbakuli, emitwe ebiri eya ha mitwe y'enyomyo ezi; obutimba bubiri obw'okusweka ebbakule ibiri ez'emitwe ey'ekaba eri ha mitwe y'enyomyo ezi;

¹³n'ebisisani ebikumi bbina eby'amakomamahanga ebyatiirwe ha butimba obubiri obw'okusweka ebbakule ibiri ez'emitwe ey'ekaba eri ha nyomyo.

¹⁴Akakora n'ebikondo; eby'okutaho ebbeseni,

¹⁵etanka emu, n'ebisisani by'ente enimi ikumi na ibiri, tanka ezi ekaba eyemeriireho.

¹⁶Eminaga, ebitiyo, ehuuma, n'ebindi ebirukwongerwa hali ebi, Huuramu akabikorra omukama Solomooni omumulinga ogunyakukumbire kurungi muno, byekonyezibwe omunju ya MUKAMA.

¹⁷Omu kyeya kya Yorudaani omu itaka ery'ibumba, erinyakuli hagati ya Sukoosi na Zereda, omukama nuho yabiheesiire.

¹⁸Solomooni akakora ebintu ebi bingi muno, obwingi bw'omulinga ogu byakozirwemu, kikaba kitarukusoboka kugubara.

¹⁹Ebintu byona ebikaba biri omunju ya Ruhanga, Solomooni nukwo yabikozire ati: itambiro ery'ezaabbu, emeeza eyateebwahoga omugaati oguhongiirwe Ruhanga.

²⁰Ebikondo by'etaara n'etaara zaabyo ez'ezaabbu enungi, ezaayakiraga omu maiso ag'ekirukwera eky'omunda nkooku kyaragiirwe;

²¹ebyakyo, etaara, empanana eby'ezaabbu enungi mali;

²²Makaasi ebbeeseni, ediisi ez'okucumiikirirraho obubbaani, n'eby'okuguhiraho omurro eby'ezaabbu enungi; n'epata ez'enju ez'enyigi ez'omu nda ezirabwamu n'otaaha omu kiikaro ekirukwera mali, n'ez'enyigi ez'ekicweka ky'enju ekya hagati, zikaba ziri z'ezaabbu.