Read Runyoro - rutooro 2 Byok 6 Bible Online

2 Byok 6 - Runyoro - rutooro bible

2 Byok 6

¹Solomooni nukwo kugamba ati, “MUKAMA asiimire kwikara omu mwirima kasira.

²Nyowe nkakwombekera Enju ey'ekitiinisa ekiikaro eki oraikaramuga ebiro n'ebiro.”

³Omukama nubwo yarozire orubaju n'orubaju, ekitebe kya Isirairi kyona kikyayemeriire, boona yabasabira omugisa.

⁴Kandi yagamba ati: “MUKAMA Ruhanga wa Isirairi, anyakuhikiriize eki yaraganiize isenyowe Daudi naagamba ati

⁵‘Okuruga obu naihire abantu bange omunsi Misiri, omunganda zoona eza Isirairi, ntakomemu rubuga orw'okwombekamu enju ei ndaaramizibwamuga, kandi ntakome muntu ow'okubalema, akugizibwe;

⁶baitu hati, nkomere Yerusaalemu nikyo kibe kiikaro eki ndaaramizibwamuga, kandi nakoma Daudi nuwe aleme abantu bange.’

⁷Isenyowe Daudi akagonza kwombeka Enju MUKAMA Ruhanga wa Isirairi ei araaramizibwamuga,

⁸baitu MUKAMA akamugambira ati, ‘okahikya kugonza kunyombekera enju,

⁹baitu toligyombeka ebiro n'ebiro, mutabani wawe, mutabani wawe nyabwawe, nuwe alinyombekera Enju.’

¹⁰Hati MUKAMA eki yaraganiize akihikiriize; habwokuba ngarukire omu kiikaro kya isenyowe Daudi, nasinga ha kitebe ky'obukama ekya Isirairi, MUKAMA nkooku yaraganiize, kandi nyombekere Enju MUKAMA Ruhanga wa Isirairi ei araaramizibwamuga.

¹¹Omunju egi, nuho ntaire Esanduuko ey'Endagaano ei yakozire n'abantu ba Isirairi.”

¹²Solomooni nubwo yayemeriire omumaiso g'itambiro lya MUKAMA, Omumaiso g'ekitebe kya Isirairi kyoona.

¹³Akaba akozire ekituuti ky'omulinga, oburaiha mita ibiri na kimu kyakataano, obugazi mita ibiri na kimu kyakataano, kandi obwemi mita emu na kimu kyakasatu. Akaba akitaire omu kikaali; yakitemba. Yateeza amaju ekitebe kyona kimuhangire amaiso yagorra emikono agyolekiize iguru;

¹⁴yagamba ati, “Ai MUKAMA Ruhanga owa Isirairi, omwiguru n'omunsi, tiharoho Ruhanga owarukukusisana, iwe anyakuhikiriza endagaano, kandi anyakwoleka abaheereza bawe abakora ebi ogonza n'omutima gwabo gwona, engonzi ezitayuga;

¹⁵iwe anyakuhikiiriize eki wamanyisize omwiru wawe isenyowe Daudi; mazimakwo okakigamba n'akanwa kawe, wakihikiriza kiro kya hati.

¹⁶Ai MUKAMA Ruhanga owa Isirairi, eki wanihiize omuheereza wawe isenyowe Daudi noogamba oti, ‘Abaana bawe obu balyeteera, bakakwata Ebiragiro byange nkooku wabikwasire toliburwa omuntu ow'aranyikaraga omumaiso aikarre ha kitebe ky'obukama ekya Isirairi, kihikirize.’

¹⁷Hati nu Ai MUKAMA Ruhanga owa Isirairi, eki wagambiire omuheereza wawe Daudi, kigumye.

¹⁸Baitu mazimakwo, Ruhanga aliikara n'omuntu omunsi enu? Iguru n'obusamba bwalyo, tosobora kulihikamu; enju entoito muno enu ei nyombekere niyo oraahikamu!

¹⁹Baitu na bwo Ai MUKAMA Ruhanga wange, ohurre okusaba n'okwesengereza kw'omuheereza wawe, ohurre omuranga ogu arukukuterra;

²⁰nukwo olindege Enju enu nyamusana n'ekiro, olindege ekiikaro kinu eki wanihiize kuramizibwamuga, obundarolerraga Enju yaawe enu ninsaba ompurrege.

²¹Kandi omuheereza wawe n'abantu bawe Abaisirairi obu baraayesengerezaaga baroleriire ekiikaro kinu, obahurrege; obahurrege nooyema omwiguru obwikaro bwawe; obu oraamaraga kuhurra, oganyire.

²²“Omuntu obu araasobyahoga omuntu mutaahi we, akaragirwa kurahira, akaija akarahira omumaiso g'itambiro lyawe omunju enu,

²³oyeme omwiguru ohurre, okole, abairu bawe obacwere omusango, enkozi y'ekibi, omugarurre ekibi kye eki yakozire, kandi ayakozire ebirungi, omuhorre enzigu, omugarurre noororra ha burungi bwe.

²⁴“Abantu bawe Abaisirairi obu baraakusobyahoga bakasingwa abanyanzigwa baabo, obu baraakubutukaga bakaatura ibara lyawe, bakakusaba kandi bakakwesengereza omunju enu,

²⁵obahurrege nooyema omwiguru, obaganyire ekibi kyabo, obagarre omunsi ei wabahaire, kandi ei wahaire baisenkurubo.

²⁶“Obu baraabaga bakusobezeeho, iguru likeemiima, enjura ekalema kugwa, bakeesengereza baroleriire ekiikaro kinu, bakaatura ibara lyawe, bakazira ekibi kyabo, obu oraabaga noobabonesa,

²⁷oyemege omwiguru obahurre, obaganyire ekibi kyabo, obeegese kukora ebirungi, onage enjura omunsi yawe ei wahaire abantu bawe, bube bugwetwa bwabo.

²⁸“Ensi obu eraagwibwamuga kiihe obu eraijwamuga kagingo, ebirimwa obu birarwaraga kaara rundi bikakwatwa oruhumbo, obu haraijaga enzige rundi kadoima; abanyanzigwa baabo obu baraabagoteraga omumbuga ezimu ha mbuga zaabo; buli muhito gwona, buli ndwara yoona erakabahoga;

²⁹buli muntu wena, rundi abantu bawe Abaisirairi boona obu baraakusabaga, obu baraakwesengerezaaga, buli muntu naamanya omuhito gwe n'obujune bwe, akagorra emikono agyolekiize enju enu;

³⁰ohurrege nooyema omwiguru, obwikaro bwawe kandi oganyire, ohe buli omu ou orukumanya omutima, noosigikira ha bikorwa bye, (habwokuba iwe, wenka, niiwe omanyire emitima y'abaana b'abantu:)

³¹ebiro byona ebi balimara omunsi ei wahaire baisenkurwitwe, nukwo bakutiinege, kandi bakolege ebi ogonza.

³²“N'Omunyaihanga atali w'abantu bawe Abaisirairi, kakuba aruga omunsi eya hara habw'ibara lyawe ery'ekitiinisa, habw'obusobozi na habw'amaani gawe, akaija akasaba aroleriire enju enu,

³³ohurrege nooyema omwiguru obwikaro bwawe, omuhe byona ebimuleesire nambere oli; amahanga goona ag'omunsi, nukwo gamanye ibara lyawe kandi gakutiine, abantu bawe Abaisirairi nkooku bakutiina, kandi nukwo gamanye enju enu ei nayombekere, nkooku eyeterwa ibara lyawe.

³⁴“Abantu bawe obu baraabaga nibaramagira abanyanzigwa baabo, bakwasire omuhanda gwona ogu oliba obarabizeemu, bakakusaba baroleriire orubuga runu oru wakomere n'Enju enu ei nakwombekiire,

³⁵ohurrege kusaba n'okwesengereza kwabo, nooyema omwiguru, kandi osagike ebigambo byabo.

³⁶“Obu baraakusobyahoga, habwokuba busaho muntu atasobya, okababiihirirwa okabanagira omunyanzigwa, bakanyagwa bakatwarwa omunsi eya hara rundi eya haihi,

³⁷oku nambere banyagiirwe, kakuba beeteera bakazira, bakakwesengereza nibagamba bati, ‘Tukasobya twakora nkooku otagonza kandi twakora kubi’;

³⁸obu baraaziraga n'ebiteekerezo byabo n'omutima gwabo gwona, bakasaba baroleriire ensi yabo ei wahaire baisenkurubo, orubuga oruwakomere

³⁹ohurre, okusaba n'okwesengereza kwabo nooyema omwiguru obwikaro bwawe, osagike ebigambo, kandi oganyire abantu bawe abaakusobiize.

⁴⁰Ai Ruhanga wange, igura amaiso ha kiikaro kinu, kandi ohurrege abantu baawe abanyakusabiramu.

⁴¹Ai MUKAMA Ruhanga, hati imuka ogende omubwikaro bwawe, iwe n'Esanduuko ey'Endagaano ey'amaani gawe. Ai MUKAMA Ruhanga, banyakatagara bawe bajunwe, kandi abahikiriire bawe benyumirize omu burungi bwabo.

⁴²Ai MUKAMA Ruhanga, omukama ou wayekomiire, otamunagaija; oijukege engonzi zawe ezitayuga ezi wayolekere omuheereza wawe Daudi.”