Read Runyoro - rutooro 2 Byok 8 Bible Online

2 Byok 8 - Runyoro - rutooro bible

2 Byok 8

¹Emyaka amakumi abiri, Solomooni ei yayombekiiremu Enju ya MUKAMA n'eye obu yahoireho,

²yayombeka buhyaka embuga omukama Huuramu ezi akaba amuhaire, yaitamu abantu Abaisirairi.

³Akaramagira Hamasi-zooba Yagihamba.

⁴Yayombeka Tadimooli omwirungu, Hamasi yayombekayo embuga zoona ez'amaahurro.

⁵Kandi yayombeka Besi-horoni ey'eruguru n'eya ifo, embuga yaizitirra n'ebisiika, yaitamu amalembo n'ebihongozo,

⁶Baalasi n'embuga zoona ez'amaahurro, Solomooni ezi akaba ainazo, n'embuga zoona ez'okwahuramu ebigaali bye n'embuga ez'okwikaramu abatembi be b'embaraasi, na kyona Solomooni eki yagondeze kwombeka Yerusaalemu, Lebbanoni, n'omu mbuga zoona ez'omu bukama bwe.

⁷Abantu boona ha Bahiiti, Abamooli, Abaperezi, Abahiivi n'Abayebusi abakaba batali Baisirairi,

⁸abaarugire omu baijukuru baabo abaasigaire omunsi, abantu Abaisirairi aba batarahwerekeriize, bbo bamazire kurugaho, abo boona, Solomooni akabafoora bairu bakahambirizibwa kuha omusoro, nukwo bali okuhika na hati.

⁹Baitu abantu ba Isirairi, atabafoole bairu ab'okumukorra emirimo; abo akabafoora baserikale, ngabwa ez'okurolerra ebigaali bye, batembi be b'embaraasi ze.

¹⁰Kandi abo nubo bakaba bali banyoro abakuru ab'omukama Solomooni, bbikumi bibiri n'ataano, nubo baalemaga abantu.

¹¹Solomooni, mukazi we muhara wa Faraaho, akamwiha omu rubuga rwa Daudi, yamutwara omunju ei yamwombekiire, habwokuba akateekereza ati, “Tikihikiriire mukazi wange kwikara omu kikaali kya Daudi omukama wa Isirairi habwokuba ebiikaro ebinyakuhikwamu Esanduuko ey'Endagaano ya MUKAMA, biba biikaro ebirukwera.”

¹²Hanyuma, yahonga ebihongwa eby'okwokya, yabihongera ha itambiro eri akaba ayombekere omumaiso g'ekisasi ky'omulyango,

¹³omulimo ogwa buli kiro nkooku gukaba nigwetagwa, yahonga naakuraatira ekiragiro kya Musa, ekya Sabbato, ameezi emboneko n'amagenyi asatu aga buli mwaka: obugenyi obw'omugaati ogutatumbisiibwe, obugenyi obwa wiiki, n'obugenyi obw'ensiisira.

¹⁴Akakoma ebihanda bya banyakatagara nkooku baraakoraga omulimo gwabo, naahondera ekiragiro kya Daudi ise, n'Abaleevi nkooku baraakoraga emirimo yabo ey'okuhaisaniza n'okuheereza omumaiso ga banyakatagara, omulimo ogwa buli kiro nkooku gwabaga nigwetaagwa, ebihanda eby'abalinzi b'amalembo, ab'okulinda amalembo agatali gamu; habwokuba, Daudi omuntu wa Ruhanga, nukwo akaba aragiire.

¹⁵Kyona omukama eki yaragiire banyakatagara n'Abaleevi ha buli kintu, na ha bintu ebyayahwirwe, batakirugeho.

¹⁶Omulimo gwa Solomooni gwona, okurugiirra ha kiro omusingi ogw'Enju ya MUKAMA eki gwatandikirweho, okuhika obu yahoire, nukwo gwahoire guti.

¹⁷Hanyuma, Soloomoni akagenda Eziyoni-geba n'Eloosi, ezinyakuli ha musa gw'enyanja, omunsi Edomu.

¹⁸Huuramu yakwata abaheereza be, yabakwasa amaato n'abalimba abamanyire kurungi enyanja, baagende Ofiri, hamu n'abaheereza ba Solomooni, baatabarrayo kiloguraamu z'ezaabbu ezirukukira ha kakumikamu n'enkumi itaano, baagireetera omukama Solomooni.