Read Runyoro - rutooro 2 Byok 9 Bible Online

2 Byok 9 - Runyoro - rutooro bible

2 Byok 9

¹Omukamakati wa Seba obu yahuliireho okurangaanwa kwa Solomooni, akasendekerezibwa abantu baingi muno, obu aina engamiya ezeetwekere ebintu ebirukuboya, ezaabbu enyingi n'amabaale ag'omuhendo, yagenda Yerusaalemu kulengesa Solomooni, naamukaguza ebikaguzo ebigumire. Obuyahikire omuba Solomooni, akamugambira byona ebyakaba naatekereza, byona

²Byona ebi yakagwize, Solomooni akabigarukamu kurungi; hatabeho na kimu ekyamulemere kumusoborra.

³Omukamakati wa Seba obu yamazire kurora amagezi ga Solomooni, enju ei yayombekere,

⁴ebyokulya ebya ha meeza ye, enyikarra ey'abanyoro be, n'empeereza ey'abaheereza be, eby'okujwara byabo, abaheereza be ab'embonekyo, ebyokujwara byabo, ebihongwa bye eby'okwokya ebi yahongaga omunju ya MUKAMA, yahunirra muno.

⁵Nukwo kugambira omukama ati, “Ebi nahulire ndi omunsi yange ha mirimo yawe na ha magezi gawe, by'amazima,

⁶baitu ebi nahuliire ntabiikirize, okuhika obu nakaizire nayerorra n'amaiso gange; ekicweka ekikooto ekya kabiri eky'amagezi gawe, ntakigambirwe; byona ebi nahuliire n'obikiraho.

⁷Bakazi bawe ka bakahiirwa! Abaheereza bawe banu abanyakwemerra butoosa omu maiso gawe, bakahurra amagezi gawe, ka bakahiirwa!

⁸MUKAMA Ruhanga wawe, ayakusiimire yakuta ha kitebe kye eky'obukama, obe omukama wa MUKAMA Ruhanga wawe, ahaisanizibwe! Habwokuba Ruhanga wawe akagonza Isirairi, kandi aligumya Abaisirairi ebiro byona, nikyo yakufooliire mukama obaleme, ogumye obwinganiza n'obuhikiriire.”

⁹Hanyuma yaha omukama ezaabbu erukukira ha kiloguraamu enkumi ina, ebintu ebirukuboya bingi muno, n'amabaale ag'omuhendo: Hakaba hatakabahoga bintu ebirukuboya nk'ebi omukamakati wa Seba ebi yahaire Omukama Solomooni.

¹⁰Kandi ekindi, abaheereza ba Huuramu n'aba Solomooni abaihire ezaabbu Ofiri, bakaihayo n'emiti aligumu n'amabaale ag'omuhendo.

¹¹Emiti egi aligumu, omukama akagikoramu amatembero agarukutwara omunju ya MUKAMA, n'agarukutwara omunju y'omukama; yakoramu enanga n'edongo eziteerwa abazini; ira lyona omunsi ya Yuda, hakaba hatakabamuga bintu nk'ebi.

¹²Omukama Solomooni akaha omukamakati wa Seba ebintu byona ebi yagondeze, kyona eki yakasabire, okwihaho ebi, ebi yaletiire omukama. Hanyuma, yagaruka omunsi ye, hamu n'abaheereza be.

¹³Buli mwaka, omukama Solomooni, yatungaga kiloguraamu z'ezaabbu, obukumi bubiri, omu nkumi isatu,

¹⁴otataireho n'egi eyaleetwaga abasuubuzi abato n'abakuru; abakama boona ab'Arabia, n'abalemi abakuru ab'ensi egi, na bo baaleeteraga Solomooni ezaabbu n'efeeza.

¹⁵Omukama Solomooni akaheesa engabu enkooto ez'ezaabbu enyakwagiibwe, buli ngabu emu, haagendamuga kiloguraamu z'ezaabbu nka musanju.

¹⁶Kandi yaheesa engabu entoito ebikumi bisatu, buli emu, haagendamuga kiloguraamu z'ezaabbu nka isatu; engabu ezi zoona, omukama akaita omunju ey'omu kibira kya Lebbanoni.

¹⁷Omukama, kandi akakora ekitebe ky'obukama ekikooto eky'isanga, yakisiiga ezaabbu enungi.

¹⁸Ekitebe eki, kikaba kiina amatembero mukaaga n'akatebe k'ezaabbu ak'okutaho ebigere, bikoliirwe ha kitebe eki, ha buli rubaju rwakyo, hakaba haroho eky'okutaho omukono, n'ebisisani by'entale ibiri, zeemeriire nambere harukutebwa emikono,

¹⁹kandi ha buli rukarra rw'amatembero ago omukaaga nambere rurukugarukira heemeriireho ekisisani ky'entale. Ekitebe nk'eki, kikaba kitakakorwaga omu bukama obundi.

²⁰Ebyokunywisa[2] by'omukama Solomooni byona, bikaba biri by'ezaabbu, n'ebikwato byona eby'omunju eyayetwaga Kibira kya Lebbanoni, bikaba biri by'ezaabbu enungi mali; omu businge bwa Solomooni, efeeza tiyayetwaga kintu ky'omuhendo.

²¹Habwokuba, emeeri z'omukama zaagendaga Tarusiisi hamu n'abaheereza ba Huramu; buli myaka esatu, emeeri zaagendaga Tarusiisi, ziihayo ezaabbu, efeeza, amasanga, ebikuya[3] n'enkerebe.

²²Omukama Solomooni, nukwo kukirra kimu abakama boona ab'ensi yoona, omu itungo n'omu magezi.

²³Abakama boona ab'ensi yoona, baagonzaaga kurora Solomooni, bahurre amagezi ge, MUKAMA aga yamuhaire.

²⁴Buli omu yahikyaga ekisembo kye, ebintu eby'efeeza n'ezaabbu, eby'okujwara, emyamirro ebintu ebirukuboya, embaraasi, enyumbu, buli mwaka baaleetaga bingi muno.

²⁵Solomooni akaba aina ebihongole by'embaraasi n'ebigaalii enkumi ina, abatembi b'embaraasi, akakumi kamu omu nkumi ibiri, aba yataga omu mbuga ezirumu ebigaali, abandi Yerusaalemu baikale hamu n'omukama.

²⁶Akalema abakama boona, okuruga Efuraate, okuhika hansi ey'Abafirisiti, na ha mutaano gwa Misiri.

²⁷Omukama, omu rubuga Yerusaalemu, efeeza akagifoora kintu kya butoosa, nk'amabaale, kandi yakanyisa emikogoto, nk'emisikamooli ey'omu kyeya,

²⁸Solomooni, baamuleeteraga embaraasi ezaarugaga Misiri, n'omunsi ezindi zoona.

²⁹Ebintu ebindi Solomooni ebi yakozire, okurugirra ha ky'okubanza okuhika ha ky'okumalirra, bikahandiikwa omu makuru ga Nasani omurangi, n'omu birango by'Ahija owa Siilo, n'omu kwolekwa kwa Ido omurangi, okurukubaza ha bulemi bwa Yerobbbowamu mutabani wa Nebati,

³⁰Solomooni, akalema Isirairi yoona omu rubuga ali omu Yerusaalemu okumara emyaka amakumi ana.

³¹Yafa yaziikwa hamu na baisenkuru, omu rubuga rwa Daudi ise, Rohobowamu mutabani we, yateera engoma.