Read Runyoro - rutooro Ezir 10 Bible Online

Ezir 10 - Runyoro - rutooro bible

Ezir 10

¹Ezira obu akaba naasaba kandi naayatura ebibi bye, narra naayekulingura omumaiso g'enju ya Ruhanga, omu Isirairi, hakarugayo ekitebe ekikooto eky'abasaija, abakazi n'abaana, abantu baateera ekyoboobo.

²Sekaniya mutabani wa Yehyeri, owa batabani ba Eramu, nubwo yagambiire Ezira ati: “Tukasiisa obwesige hali Ruhanga waitu, twaswera abakazi abanyamahanga, twabaiha omubantu ab'ensi enu, baitu noobu tuliba twakozire eki, Isirairi nabwo tekahoire masiko.

³Habweki nu, turaganize Ruhanga waitu, tubinge abakazi abo boona n'abaana baabo, nka mukama wange n'abo abanyakukwata ebiragiro bye oku baatuhabwire; eki tukikole nitukuraatira ebiragiro.

⁴Imuka, habwokuba ogu mulimo gwawe, naitwe tuli na iwe; obe manzi, kandi ogukole.”

⁵Nubwo Ezira yaimukire, yarahiza baanyakatagara abakuru, Abaleevi na Abaisirairi boona nibagamba ngu: “baraakoraga eki baagambiirwe.” Aho baarahira.

⁶Hanyuma, Ezira yaruga omumaiso g'enju ya Ruhanga, yataaha omu kisiika kya Yehohanaani mutabani wa Eryasibbu, oku nuho yaraire, atataire kagaati ha rulimi noobwakuba kumira otwizi; habwokuba akaba naasaalirwa habw'ekibi eky'okusiisa obwesige, enzaahi ekibakozire.

⁷Kikarangirirwa omu mbuga: Yuda na Yerusaalemu yoona ngu: abaazaahi boona abaagarwirwe kibahikiriire okwesorooleza Yerusaalemu,

⁸kandi ngu obu halibaho ow'alihinguza habiro ebi atakaizire, habw'ekiragiro ekyatairweho abalemi n'abakuru, ebintu bye byona binyagwe, na uwe wenka aihwe omu kitebe eky'abazaahi.

⁹Abantu boona Abaayuda n'aba Benyamiini nubwo baayesoroliize Yerusaalemu ebiro ebisatu ebi bitakahingwire; kikaba kiri kiro eky'amakumi abiri eby'okwezi kwa mwenda. Abantu boona bakaikarra omu zigati ey'omu maiso ag'enju ya Ruhanga, nibatukumira habw'ekigambo eki, na habw'enjura enyingi eyekaba neegwa.

¹⁰Ezira nyakatagara akeemerra yabagambira ati: “Mukakora ekibi mwaswera abakazi abanyamahanga, habweki omusango gwa Isirairi mwagwongeraho.

¹¹Hati nu, mwetondere MUKAMA Ruhanga owa baisenkuru inywe, mukole eki agonza; mwecweho abantu ab'ensi egi n'abakazi abanyamahanga.”

¹²Ekitebe kyona nubwo kyagambiire haiguru n'iraka erirukuhulirwa kiti: “Kihikire kwo; kituhikiriire kukora ekyogambire.

¹³Baitu habw'abantu kuba baingi, kandi enjura neegwera kimu; titusobora kwemerra aheeru. Kandi omulimo gunu, tiguli mulimo gw'ekiro kimu rundi bibiri; habwokuba baingi omuliitwe abaasiisire baakora ekibi kinu.

¹⁴Abanyoro beemerre habw'ekitebe kyona; boona ab'omumbuga zaitu abaaswire abakazi abanyamahanga, baije ha kasumi akatairweho, baije hamu n'abakuru, n'abacwi b'emisango aba buli rubuga, okuhika ekiniga ekitwakwasize Ruhanga waitu, obu kirakamuhwaho.”

¹⁵Yonasani wenka mutabani w'Asaheera na Yahazeya mutabani wa Tikiva, nubo baayangire eki, Musulaamu na Sabesayi omuleevi baabasagika.

¹⁶Enzaahi abaagarwirwe nubwo baakozire eki baagambiirwe. Ezira nyakatagara abasaija, abeebembezi ab'amaju g'abaisenkurubo, yahandiika ibara erya buli muntu. Hakiro eky'okubanza eky'okwezi kwa ikumi, nubwo baatandikire kwikarra beetegereze ekigambo eki;

¹⁷kandi ha kiro eky'okwezi okw'okubanza, bakaba bamazire emisango yoona ey'abasaija abakaba baswire abakazi abanyamahanga.

¹⁸Omubatabani ba banyakatagara abakaba baswire abakazi abanyamahanga, hakasangwamu; Maaseya, Eryeza, Yalibu, na Gedaliya, aba batabani ba Yeswa mutabani wa Yozadaki na bagenzi be.

¹⁹Bakaragaana kwahukana na bakazi baabo, kandi baahonga entaama empaya eibaihire omubuhya, ebe kihongwa eky'okubaihaho omusango.

²⁰Habatabani ba Imeri, Hanani na Zebbadiya.

²¹Omu batabani ba Harimu; Maaseya, Eriya, Semaaya, Yehyeri na Huziya.

²²Omu batabani ba Pasihuuli: Erihohenayi, Maaseya, Simairi, Nesaneeri, Yozabbadi na Erasa.

²³Omu Baleevi: Yozabbadi, Semeyi, Kelaya (nuwe Keriita) Pesahiya, Yuda, na Eryeza.

²⁴Omu bazini: Eriyasibbu. Omu balinzi: Salumu, Teremu na Huuli.

²⁵Ab'omu Isirairi: Omu batabani ba Parosi: Ramiya, Iziya, Malukiya, Miyamiini, Eryeza, Hasabiya na Bbenaaya.

²⁶Omu batabani ba Eramu: Mataniya, Zakaliya, Yehyeri, Abudi, Yeremoosi na Eriya.

²⁷Omu batabani ba Zaattu: Erihohenayi, Eriyasibbu, Mataniya, Yeremoosi, Zabadi na Aziza.

²⁸Omu batabani ba Bbebbayi. Yehohanaani, Hananiya, Zabai, na Asulai.

²⁹Omu batabani ba Bani: Mesulaamu, Maluki, Adaaya, Yasubbu, Seyali na Yeremoosi.

³⁰Omu batabani ba Pahasi-mowabbu: Adina, Kerara, Bbenaaya, Maaseya, Mataniya, Bbezaleeri, Binuyi, na Manaase.

³¹Omu batabani ba Harimu: Eryeza, Isiya, Malikiya, Semaaya, Simyoni,

³²Benyamiini, Maluki, na Semaliya.

³³Omu batabani ba Hasumu: Metenayi, Matata, Zebbadi, Erifereti, Yeremayi, Manaase, na Simeyi batabani ba Bbani, Maadayi Amuramu, Huweri.

³⁵Bbedeya, Keluhi,

³⁶Vaniya, Meremoosi, Eriyasibbu,

³⁷Mataniya, Matenahi na Yaasu.

³⁸Omu batabani ba Binui: Simei.

³⁹Seremiya, Nasani, Adaaya,

⁴⁰Makinadebbayi, Sasayi, Sarayi,

⁴¹Azaleeri, batabani ba Nebbo:

⁴²Shallumu, Amariya na Yozefu.

⁴³Yadayi, Yaweri na Bbenaaya.

⁴⁴Abo boona bakaba baswire abakazi abanyamahanga, baitu bakabafuuhiza kimu hamu n'abaana baabo.