Read Runyoro - rutooro Ezir 3 Bible Online

Ezir 3 - Runyoro - rutooro bible

Ezir 3

¹Okwezi okwa musanju obukwahikire, batabani ba Isirairi bali omumbuga z'owaabo, abantu bakesoroleza Yerusaalemu, baaba bantu bamu.

²Nubwo haimukire Yeswa mutabani wa Yozadaki, hamu na banyakatagara bagenzi be, na Zerubbabbeeri mutabani wa Seralityeri hamu n'ab'oruganda rwe, baayombekera MUKAMA Ruhanga wa Isirairi itambiro ery'okuhongerahoga ebihongwa eby'okwokya, nkooku kyahandiikirwe omubiragiro bya Musa omuntu wa Ruhanga.

³Baata itambiro omu kiikaro kyalyo, habwokuba bakaba nibatiina abantu ab'ensi ezi, itambiro eri, niryo baahongerahoga MUKAMA ebihongwa eby'okwokya ebya nyenkya n'ebyakairirizi.

⁴Baasemezaaga ekiro eky'obugenyi obw'enkaande nkooku kyahandiikirwe kandi baahongaga ebihongwa eby'okwokya ebya buli kiro, nibarorra ha muhendo, nibahondera ekiragiro, nkooku kikaba nikyetaagwa buli kiro,

⁵eki obukyahwaga, baahongaga ebihongwa eby'okwokya eby'oruteekerro, ebihongwa eby'okwokya ebyahongwaga okwezi kuli mboneko; na ha biro bya MUKAMA ebikuru ebindi, n'ebihongwa ebya buli muntu yahaga MUKAMA eby'okwegondeza.

⁶Okuruga ha kiro eky'okubanza eky'okwezi okwa musanju, nubwo baatandikire kuhongera MUKAMA ebihongwa eby'okwokya. Baitu omusingi ogw'enju ya MUKAMA gukaba gutakatandikirwe.

⁷Sente bakaiha aboombeki n'ababaizi, ebyokulya, ebyokunywa n'amagita, baabiha Abasidoni n'Abataya, basombe emiti emikogoto bagiihe Lebbanooni bagihikye ha nyanja na Yopa, Sirasi omukama wa Paasa akaba abaikiriize.

⁸Omumwaka ogwa kabiri bamazire okuhika Yerusaalemu ha Nju ya MUKAMA, omukwezi kwakabiri Zerubbabbeeri mutabani wa Seralityeri, na Yeswa mutabani wa Yozadaki, nubwo baatandikire hamu n'abandi abasigaireho hali bagenzi baabo, banyakatagara, Abaleevi naabo boona abaarugire omubunyagwa baija Yerusaalemu. Bakakoma Abaleevi okurugirra ha b'emyaaka abiri ey'obukuru n'okweyongerayo, nubo barolerre omulimo ogw'okwombeka Enju ya MUKAMA.

⁹Yeswa hamu na batabani be n'ab'oruganda rwe, Kadumyeri na batabani be, batabani ba Yuda, bakatandika okurolerra abantu abaakoraga omunju ya Ruhanga, nibakonyerwa batabani ba Henadaadi n'Abaleevi, batabani baabu n'ab'oruganda rwabo.

¹⁰Aboombeki obubaamazire kutandika omusingi ogw'Enju ya MUKAMA, banyakatagara bajwaire ebyokujwara byabo bairra omumaiso, baakwasire engwara, Abaleevi nabo hamu na batabani b'Asafu, bairra omumaiso bakwasire ebitaasa, bahaisanize MUKAMA nka Daudi omukama wa Isirairi oku yaragiire;

¹¹bakazina nibagarukanganamu, nibahaisaniza, nibasiima MUKAMA bati: “Habwokuba murungi, habwokuba engonzi ze ezitagarukirra hali Isirairi, ziikaraho ebiro byona.” Abantu boona bakatokera haiguru, nibahaisaniza MUKAMA, nubwo omusingi ogw'Enju ye gwatandikirwe.

¹²N'obwakubaire abaingi bakaba nibatokera haiguru habw'omuhimbo baitu baingi ha baanyakatagara n'Abaleevi n'abeebembezi ab'amaju ga baisenkurubo, abagurusi abakaba baboine omusingi ogw'enju egi nigutandikwa, bakatamu ekyoboobo;

¹³abantu batasobole kwahukaniza iraka ly'okusemererwa ha iraka ery'abantu abarukurra, habwokuba bakaba nibatoka muno, kandi iraka lyabo likaba nirihulirwa hara.