Read Runyoro - rutooro Ezir 4 Bible Online

Ezir 4 - Runyoro - rutooro bible

Ezir 4

¹Omu kasumi ako, abanyanzigwa ba Yuda na Benyamiini obu baahuliire abo abaazaahwirwe ngu nibombekera MUKAMA Ruhanga wa Isirairi Enju buhyaka,

²bakagenda omba Zerubbabbeeri na hali abakuru ab'amaju g'abaisenkurubo, baabagambira bati: “Katwombeke hamu na inywe; ngira naitwe, turamya Ruhanga omu oumuramya, kandi tutaaha nitumutambira ebyonzira okuruga omukasumi k'Esalihadoni omukama w'Asiriya ayatuleesire hanu.”

³Baitu Zerubbabbeeri, Yeswa, n'abandi abasigaireho ha bakuru ab'amaju g'abaisenkurubo omu Isirairi, baabagambira bati: “Timwina bukwatane hamu naitwe, nukwo mutwombekese enju ya Ruhanga; baitu itwe itwenka, niitwe turaayombekera MUKAMA Ruhanga wa Isirairi, Sirasi omukama wa Paasa nkooku yaturagiire.”

⁴Abantu abasi b'ensi, nukwo kuterebura abantu ba Yuda, baabatiinisa kwombeka,

⁵baataho n'okugulirra abandi b'amagezi babatange okuhikiriza eki bakaba bategekere kukora, akasumi koona aka Sirasi omukama wa Paasa, noobwakubaire okuhikira kimu ha ngoma ya Daliyo omukama wa Paasa.

⁶Omukasumi k'Ahaswehero, akyatiire engoma ati, abantu bakahandiika, nibanyegerra enzaarwa za Yuda na Yerusaalemu.

⁷Kandi omukasumi k'Atagizakiseesi, Bisiraamu, Mesiredaasi, Tabeeri n'abandi abasigaireho ha bagenzi baabo, bakahandiikira Atagizakiseesi omukama wa Paasa; ebbaruha egi, ekahandiikwa omu Rwaramaika, nukwo yahindurwa.

⁸Rrehumu omudumizi mukuru na Simusahi omuhandiiki, bakahandiikira Atagizakiseesi omukama ebbaruha n'erega Yerusaalemu, ebigambo byayo nibyo binu;

⁹Ebbaruha enu ehandiikirwe: Rrehumu omudumizi omukuru, Simusahi omuhandiiki, n'abandi abasigaireho hali bagenzi baabo, abacwi b'emisango, abalemi abakuru, abanyoro, Abapaasa, abantu ab'Ereki, Ababbabbilooni, abantu ba Suusa, nubo Ab'Erama,

¹⁰n'amahanga agandi agasigaireho, Osinapaara omukuru kandi ow'ekitiinisa aga yasuuhwire yagatwara omumbuga za Samaliya, n'omu kicweka ekindi eky'Isaza eriri nseeri y'ekisaaru,

¹¹enu niyo kopi ey'ebbaruha eibaatwekere: Abairu bawe, nubo abantu ab'ensi ey'obuseeri, bw'ekisaaru, nibakuramukya.

¹²Hati nitukumanyisa Abayudaaya abaarugire owaawe oku baija owaitu kunu, bakagenda Yerusaalemu. Nibombeka buhyaaka orubuga ruli orwaayemere kandi orubi; kutagira ebisiika babimazire, bali ha misingi.

¹³Waitu Rukiraabasaija nitukumanyisa, orubuga runu obururaayombekwa buhyaaka n'ebisiika bikahwa, abantu tibarukwija kuha omusoro, ehooza rundi obusuuru, kandi sente ez'obukama niziija kukeeha.

¹⁴Hati nkooku turukulya ha kisura ky'ekikaali, tikituhikiriire okurora omukama naaswazibwa, nukwo kutuma abantu kumumanyisa,

¹⁵nukwo baserre omu kitabu eky'ebihandiiko byaswenkuru. Omu kitabu ky'ebihandiiko ebi, nuho orukwija kurorra kandi nuho oraamanyira orubuga oru nkooku rwaayemere, nkooku rutalibaniza abakama n'ensi, kandi obwemi nkooku bwaarugire omurubuga oru okuruga ira. Eki nikyo kyaruleetire kuhwerekerra.

¹⁶Kinu nikyo turukumanyisa omukama, orubuga oru obururaayombekwa buhyaaka, n'ebisiika byarwo bikahwa, obu omunsi ey'obuseeri bw'ekisaaru toligaruka kutungayo kantu.

¹⁷Omukama akagarukamu ati: “Nimpandiikira Rrehumu omudumizi omukuru, Simusayi omuhandiiki, na bataahi baabu abandi abasigaireho abanyakwikara Samaliya n'omu bicweka ebindi eby'ensi ey'obuseeri bw'ekisaaru, nimbaramukya.

¹⁸Ebbaruha eimwatutwekiire, bakaginsomera kurungi.

¹⁹Nkaragira, baaserra, kikeetegerezibwa okuruga ira orubuga runu nkooku rwaikaire nirurwanisa abakama, obwemi n'obutahurra tiburuhwamu.

²⁰Abakama ab'obusobozi abaalemaga ensi yoona ey'obuseeri bw'ekisaaru, abaasasurwaga omusoro, ehooza n'obusuuru, bakalema Yerusaalemu.

²¹Habweki, oteho ekiragiro, abantu abo balekere aho, n'orubuga rutagaruka kwombekwa okuhika obundakaragira.

²²Ekintu eki otakigirra obugara; habwaki omukama ayongera kugwerwa akabi?”

²³Kopi y'ebbaruha y'omukama Atagizakiseesi obu yamazire kusomerwa Rrehumu, Simusayi omuhandiiki na bataahi baabu, batabandaale, bakagenda bwango baahikaho Abayudaaya abakaba bali Yerusaalemu, baabaaragiza amaani n'obusobozi balekere aho kwombeka orubuga.

²⁴Nubwo omulimo ogw'okwombeka Enju ya MUKAMA eya Yerusaalemu gwayemeriire; gukeemerra okuhika omu mwaka ogwa kabiri ogw'engoma ya Dariyo omukama wa Paasa.