Read Runyoro - rutooro Ezir 6 Bible Online

Ezir 6 - Runyoro - rutooro bible

Ezir 6

¹Hanyuma, Daliyo omukama nubwo yaragiire, baaserre omunsi Bbabbulooni, omunju enyakurumu amaahurro ebihandiiko nambere byayahurwaga.

²Kandi baaserra omurubuga orukuru Akimesa, orunyakuli omu kicweka ky'ensi ekya Mediya, baasangaho omuzingo gw'empapura ogukaba guhandiikirweho: “Ekyokwijukya.”

³Omumwaka ogw'okubanza ogw'engoma y'omukama Sirasi, omukama ogu akaturukya ekiragiro ekirukukwata ha nju ya Ruhanga naagamba ati: “Enju egi eyombekwe buhyaaka, ebe kiikaro ekiraatambirwamuga ebyonzira, kandi ekiraaleetwamuga ebihongwa eby'okwokya; obwemi bwayo sentimita enkumi ibiri mu rukaaga nkaaga na itaano, obugazi bwayo, nazo sentimita enkumi ibiri murukaaga nkaaga na itaano,

⁴omukoba gw'ebisiika enkarra isatu ez'amabaale n'orukarra rumu orw'embaaho; sente ez'okusasura, iruge omu lyahurro erya sente z'obukama.

⁵Ebikwato eby'enju ya Ruhanga, ebya zaabbu n'eby'efeeza, Nebbukadeneeza ebi yaihire omunju ya Ruhanga eya Yerusaalemu yabireeta Bbabbulooni, bigarurweyo kandi biretwe omunju ya MUKAMA eya Yerusaalemu, buli kintu bakigarre omu kiikaro kyakyo; obite omunju ya Ruhanga.

⁶“Habweki, Tatenayi omulemi w'ekicweka ky'ensi eky'obuseeri bw'ekisaaru Sesarabbozenayi, n'abalemi abakuru bagenzi banyu abanyakuli omukicweka ky'ensi obuseeri bw'ekisaaru, mubeesungusule;

⁷omulimo ogw'enju ya Ruhanga enu mugurugeho: Muleke omulemi w'Abaayudaya, n'abakuru baabo, nubo bombeke buhyaaka enju ya Ruhanga enu omukibanja kyayo.

⁸Ekindi, nintaho ekiragiro ekirukukwataho eki muraakorra abakuru b'Abaayudaya ha kwombeka buhyaka enju ya Ruhanga; abasaija banu, basasurwe bwango sente zaabo zoona, hataroho kusiibyaho, ziruge ha sente ezinyakutaaha omunsaho y'obukama, nugwo omusoro ogunyakuruga omu kicweka ky'ensi eky'obuseeri bw'ekisaaru.

⁹Kyona ekirukwetaagwa, nk'enimi ento, entaama, entaama empaya, rundi ebuguma kuba kihongwa eby'okwokya ebya Ruhanga ow'iguru, engano, ekisura, eviini rundi amagita, banyakatagara aba Yerusaalemu ebi baraabaga nibeetaaga, ebi bibaheebwege buli kiro hatali kusaraho,

¹⁰nukwo batambirege Ruhanga ow'iguru ebyonzira ebi asiima, kandi basabire omukama n'abaana be.

¹¹Ninyongera kutaho ekiragiro ekindi: Obu halibaho omuntu ahindura ekiragiro kinu, omurabba gulisomorwa ha nju ye, omuntu ogu aguhanikweho, enju ye eriforwa nk'etuumo y'obusa bw'ente.

¹²Ruhanga ayakomere okuramizibwaga omu kiikaro eki naakabuuleeze omukama weena, rundi abantu boona abaligorra omukono kuhindura rundi kuseesa enju ya Yerusaalemu. Nyowe Daliyo, nataho ekiragiro; ekiragiro eki ky'okukwatirwa kimu.”

¹³Hanyuma Tatenayi omulemi omukuru, ow'ensi ey'obuseeri bw'ekisaaru, Sesarabbozenayi na bagenzi baabo, baakora n'obwekambi bwona omukama Daliyo eki yagambire.

¹⁴Abakuru b'Abaayudaya bakombeka kandi bakatunga omugisa, Hagai omurangi na Zekariya mutabani wa Ido nkooku baarangire, Enju yabo baagimara Ruhanga owa Isirairi nkooku yabaragire, na Sirasi, Daliyo n'Atagizakiseesi omukama wa Paasa nkooku baaragiire;

¹⁵hakiro ekya kasatu eky'okwezi okwa mukaaga okw'engoma ya Daliyo omukama, enju nubwo yahoire.

¹⁶Abantu aba Isirairi, banyakatagara n'Abaleevi, n'abandi ha nzaahi abaagarwirwe, bakasemeza n'omuhimbo ekiro eky'okweza enju ya Ruhanga.

¹⁷Hakiro eky'okweza enju ya Ruhanga egi, bakahonga enimi kikumi, entaama empaya bbikumi bibiri, ebyaana by'entaama ebikumi bbina n'empaya z'embuzi ikumi na ibiri zibe kihongwa eky'okuganyiza ebibi, nk'enganda za Isirairi oku ziri ikumi na ibiri.

¹⁸Baata banyakatagara omubitebe byabo, n'Abaleevi omubiikaro byabo, bakolege omulimo gwa Ruhanga omunsi Yerusaalemu nkooku kyahandiikirwe omukitabu kya Musa.

¹⁹Hakiro ekya ikumi na bbina eky'okwezi okw'okubanza, enzaahi abaagarwirwe bakasemeza ekiro kikuru eky'okwijuka obugenyi obw'okuhingurwaho.

²⁰Habwokuba banyakatagara n'Abaleevi bakaba beeyeriize hamu; boona bakaba batarukuzira. Nukwo kwitira enzaahi boona, akataama ak'okwijuka obugenyi obw'okuhingurwaho, habwa banyakatagara bagenzi baabo, na habwabo bonka;

²¹akataama ako kakaliibwa abantu ba Isirairi abakaba bazaahukire, na boona abakaba beeteeraniize nabo beeyiihireho obubi obw'abantu ab'ensi egi, baaramya Ruhanga owa Isirairi.

²²Bakamara ebiro musanju, nibasemeza n'omuhinbo ekiro kikuru eky'okwijuka obugenyi obw'emigaati etatumbisiibwe; habwokuba MUKAMA nuwe abahaire omuhimbo ogu, kandi ataahizeemu omukama w'Asiriya omutima ogw'okubagirra embabazi, nukwo kubongera ha mulimo ogw'enju ya Ruhanga, Ruhanga owa Isirairi.