Read Runyoro - rutooro Ezir 7 Bible Online

Ezir 7 - Runyoro - rutooro bible

Ezir 7

¹Ebi obubyahoire, omubulemi bwa Atagizakiseesi omukama wa Paasa, Ezira mutabani wa Seraaya, Seraaya w'Azaliya, Azaliya wa Hirikiya,

²Hirikiya wa Salumu, Salumu wa Zadoki, Zadoki wa Ahitubu,

³Ahitubbu w'Amariya, Amaliya w'Azaliya wa Merayoosi,

⁴Merayoosi wa Zerahiya, Zerahiya wa Huuzi, Huuzi wa Bbuuki,

⁵Bbuuki w'Abisuha, Abisuha wa Fenehaasi, Fenehaasi wa Eryeza, mutabani w'Arooni nyakatagara omukuru;

⁶Ezira ogu akaruga Bbabbulooni. Akaba ali muhandiiki anyakumanyire kurungi ebiragiro bya Musa, MUKAMA Ruhanga owa Isirairi ebi akaba ataireho; omukama akamuha byona ebi yasabire, habwokuba MUKAMA Ruhanga we yamugirraga embabazi.

⁷Omu mwaka ogwa musanju ogwobulemi bwa Atagizakiseesi omukama, abamu habantu ba Isirairi, habanyakatagara n'Abaleevi, abazini n'abalinzi, n'abaheereza ab'Enju ya MUKAMA nabo bakagenda Yerusaalemu.

⁸Ezira akahika Yerusaalemu omukwezi okwa kataano, omumwaka ogwamusanju ogwobulemi bw'omukama ogu;

⁹habwokuba hakiro eky'okubanza eky'okwezi okw'okubanza, nubwo yarugire Bbabbulooni, ha kiro eky'okubanza eky'okwezi okwa kataano, nikyo yataahiireho Yerusaalemu, habwokuba omukono gwa Ruhanga we gwamwikarahoga.

¹⁰Habwokuba Ezira omutima gwe akaba agumaliize ha kwega Ebiragiro bya MUKAMA, na ha kwegesa ebigambo bye omu Isirairi.

¹¹Enu niyo kopi ey'ebbaruha, omukama Atagizakiseesi ei yahaire Ezira nyakatagara omuhandiiki ayayegere muno ebigambo by'Ebiragiro bya MUKAMA n'ebigambo bye ebi yagambiire Isirairi.

¹²“Atagizakiseesi omukama w'abakama naahandiikira Ezira nyakatagara omuhandiiki w'Ebiragiro bya Ruhanga ow'omwiguru.

¹³Hati, nintaho ekiragiro ekirukwikiriza buli omu ha bantu ba Isirairi, rundi banyakatagara baabo rundi Abaleevi ab'omubukama bwange, ow'arukwegondeza kugenda Yerusaalemu, naikirizibwa kugenda na iwe.

¹⁴Habwokuba otumirwe omukama hamu n'abahi be ab'amagezi musanju, okagulirize hali Yuda na Yerusaalemu, nookuraatira Ebiragiro bya Ruhanga wawe ebiwahairwe,

¹⁵n'okutwara efeeza na zaabbu, omukama n'abahi be ab'amagezi ebibaahaire Ruhanga owa Isirairi habw'okwegondeza, Ruhanga ogu anyakwikara Yerusaalemu,

¹⁶hamu n'efeeza yoona, na zaabbu eyoraasanga omunsi eya Bbabbulooni, n'ebihongwa eby'okwegondeza, Enju ya Ruhanga, eya Yerusaalemu.

¹⁷Sente ezi, ozikwate mpora, ozigulemu ente enimi, entaama empaya, ebyana by'entaama, hamu n'ebihongwa byabyo eby'ebyokulya, n'eby'okunywa, obihonge ha itambiro ery'omunju ya Ruhanga eya Yerusaalemu.

¹⁸Iwe hamu na bagenzi bawe, kyona kyona ekimurukusiima kukoza efeeza n'ezaabbu egi, mubikole, Ruhanga wawe nkooku arukugonza.

¹⁹Ebikwato ebyahairwe okukora omulimo ogw'enju ya Ruhanga, obihongere Ruhanga wawe,

²⁰ekyorukwetaaga kutunga, okiihe omu lyahurro ly'omukama.

²¹“Nyowe Atagizakiseesi omukama, nintaho ekiragiro ekirukukwata h'abakeeto boona ab'omunsi ey'obuseeri bw'ekisaaru; kyona kyona Ezira nyakatagara omuhandiiki w'Ebiragiro bya Ruhanga ow'iguru ekyarukukwetaagaho, kikorwe bwango,

²²okugarukira ha bicweka by'efeeza kiloguraamu enkumi isatu, ebirengo by'engano debe ezirukukira h'ataano naitaano, entugiro z'eviini kikumi, entugiro kikumi ez'amagita, n'ekisura kyona ekirukwetaagwa.

²³Kyona kyona ekirukuragirwa Ruhanga kikorwe kihikirizibwe habw'enju ya Ruhanga ow'iguru, aleke kubiihirirwa omukama n'abatabani be.

²⁴Kandi nitukumanyisa, nkooku kitali ky'ebiragiro okutaho omusoro, ehooza n'obusuuru ha banyakatagara n'omu, ha Baleevi, ha bazini, ha balinzi, abaheereza b'enju ya Ruhanga, rundi abaheereza abandi ab'enju ya Ruhanga enu.

²⁵“Kandi iwe Ezira, okome abacwi b'emisango, abato n'abakuru abaraacweraga emisango abantu boona ab'omunsi ey'obuseeri bw'ekisaaru, abo abanyakumanyire ebiragiro bya Ruhanga; kandi abo abatabimanyire, obibeegese.

²⁶Weena ow'atalikwata biragiro bya Ruhanga wawe n'eby'omukama, acwerwe omusango ogumusemeriire ogw'okwitwa, ogw'okuzaahisibwa kunyagwa ebintu bye, rundi ogw'okukwatwa omu nkomo.”

²⁷MUKAMA Ruhanga owa baisenkuruitwe ayataahize omu mutima gw'omukama ekintu nka kinu: okukunisa enju ya MUKAMA eya Yerusaalemu ahaisanizibwe.

²⁸Ogu ayanyolekere engonzi ze ezitagarukirra omumaiso g'omukama, n'omumaiso g'abahi ab'amagezi abakuru. Nkaguma, habwokuba omukono gwa MUKAMA Ruhanga wange gukaba gundoho MUKAMA Ruhanga wange, nukwo kusorooza abasaija abeebembezi aba Isirairi, ngende nabo.