Read Runyoro - rutooro Ezir 8 Bible Online

Ezir 8 - Runyoro - rutooro bible

Ezir 8

¹Abo nubo abakuru ab'amaju g'abaisenkurubo, kandi obu nubwo obuzaale obwaabo abaarugire Bbabbulooni abaagenzire na nyowe, omu kasumi k'obulemi bwa Atagizakiseesi omukama:

²Omubatabani ba Fenehaasi, na Geresomu. Omu batabani ba Isamari Danyeri, omubatabani ba Daudi, Hatusi.

³Omu batabani ba Sekaniya, omubatabani ba Parosi Zakaliya, abaahandiikirwe nawe, bakahika abasaija kikumi mu ataano.

⁴Omubaana ba Pahasimowabu, Eriyehohenayi mutabani wa Zerahiya, ogu akaba ali hamu n'abasaija ebikumi bbibiri.

⁵Omu batabani ba Zatu, Sekaniya mutabani wa Yahazyeri, ogu akaba ali hamu n'abasaija ebikumi bbisatu.

⁶Omu batabani b'Adini, Ebbedi mutabani wa Yonasaani, ogu akaba ali hamu n'abasaija amakumi ataano.

⁷Habatabani ba Eramu, Yesaya mutabani w'Asaliya, akaba ali hamu n'abasaija nsanju.

⁸Omu batabani ba Sefatiya, Zebbadiya mutabani wa Mikairi, akaba ali hamu n'abasaija kinaana.

⁹Omu batabani ba Yowabbu, Obadiya mutabani wa Yehyeri, akaba ali hamu n'abasaija ebbikumi bbibiri ikumi na munaana.

¹⁰Omu batabani ba Bbani, Selomiisi mutabani wa Yosifiya, akaba ali hamu n'abasaija kikumi mu nkaaga.

¹¹Ha batabani ba Bbebbayi, Zakaliya, mutabani wa Bbebbayi, akaba ali hamu n'abasaija makumi abiri na munaana.

¹²Omu batabani ba Azigaadi, Yohanaani mutabani wa Hakataani, akaba ali hamu n'abasaija kikumi n'ikumi.

¹³Omu batabani ba Adonikaamu, abo abaizire hanyuma, ganu nugo mabara gaabo: Erifereti, Yehuli na Semaaya, bakaba bali hamu n'abasaija nkaaga.

¹⁴Omu batabani ba Biguvayi, Husayi na Zakuli, bakaba bali hamu n'abasaija nsanju.

¹⁵Abo boona nkabasorooza nabatwara ha kisaaru ekirukuseesa Ahava, oku tukateerayo orukande, twamarayo ebiro bisatu. Obu nagenzire kwetegereza abantu abo na banyakatagara, ntasangemu mwana wa Leevi n'omu.

¹⁶Nubwo nayesire Eryeza, Abyeri, Semaya, Erinasani, Yelibbu Nasani, Zakaliya na Mesuraamu abantu abakuru na Yoyaribu na Erinasaani, abakaba bali bantu barukwetegereza,

¹⁷nabatumaho Ido, owakaba ali muntu mukuru omu kiikaro Kasifiya, nabagambira ebigambo ebi baraagambira Ido na bagenzi be abaaheerezaaga omunju ya Ruhanga omu kiikaro Kasifiya, ebigambo ebi nibyo binu: Mututwekere abaheereza ab'okukora omunju ya Ruhanga waitu.

¹⁸Habw'embabazi Ruhanga waitu eziyatugirraga, bakatutwekera omusaija ow'amagezi, omu ha batabani ba Mahiri mutabani wa Leevi mwijukuru wa Isirairi, arukwetwa Serabiya, hamu na batabani be n'ab'oruganda rwe, boona hamu abantu ikumi na munaana;

¹⁹na Hasabbiya hamu na Yesaaya, omu habatabani ba Merali, hamu n'ab'oruganda rwe, na batabani baabo, boona hamu abantu amakumi abiri;

²⁰okwihaho abaheereza ebikumi bibiri n'abiri ab'omunju ya MUKAMA, omukama Daudi n'abanyoro be ababakaba basoroire kukonyera Abaleevi. Abo boona bakahandiikwa, buli muntu ibara lye.

²¹Hanyuma, ha kisaaru eki Ahava, nkarangirra nti: Itwena tusiibe, twebundaalize Ruhanga waitu, tumusabe atuhe orugendo orw'obusinge, aruhe abaana baitu n'ebintu byaitu.

²²Habwokuba, nkakwatwa ensoni okusaba omukama kumpa ekitebe ky'abaserikale n'eky'abatembi b'embaraasi ab'okutulinda abanyanzigwa obu turaaba nitugenda; habwokuba tukaba tugambiire omukama tuti: “Ruhanga waitu arolerra abo boona abanyakumuserra, abalinda kurungi, kandi abiihirirwa abo boona abamufuruka.”

²³Habweki tukasiiba, twayesengereza Ruhanga atulinde kandi akatuha ekitwamusabire.

²⁴Nubwo nasoroire banyakatagara ikumi na babiri ha banyakatagara abakuru, ganu nugo amabara gaabo: Seribbiya na Hasabbiya, n'ab'oruganda rwabo abandi ikumi.

²⁵Nkabalengera efeeza, ezaabbu, n'ebikwato, ekihongwa eky'enju ya Ruhanga waitu, omukama, abahi be b'amagezi, abanyoro be ab'ekitiinisa, n'Abaisirairi abakaba bali oku eki bakaba bahaireyo;

²⁶nkalenga ebicweka by'efeeza ebirukuhika kiloguraamu omutwaro gumu kanaana n'ebitaano, ebikwato eby'efeeza kiloguraamu enkumi isatu ebicweka kikumi, ebicweka bya zaabbu, kikumi,

²⁷ebbakuli makumi abiri eza zaabbu, ebirukuhika daliki rukumi n'ebikwato bibiri eby'omulinga omurungi ogurukwengengeta; ogw'omuhendo nka zaabbu.

²⁸Nkabagambira nti: “muli bantu ba MUKAMA abarukwera, ebikwato ebi nabyo nibyera; efeeza na zaabbu, kihongwa eky'okwegondeza, ekya MUKAMA Ruhanga owa baisenkuruinywe.

²⁹Ebikwato ebi mubirinde kandi mubyahule okuhika obumurakabirenga omumaiso ga banyakatagara, Abaleevi, n'omumaiso ag'abakuru ab'amaju aga baisenkurubo omu Isirairi abali Yerusaalemu, omubisiika omunda eby'enju ya MUKAMA.”

³⁰Aho banyakatagara n'Abaleevi baatandika kurolerra: efeeza, ezaabbu n'ebikwato ebyalengerwe, babitwale Yerusaalemu omunju ya Ruhanga.

³¹Hanyuma, ha kiro ekya ikumi na bibiri eby'okwezi okw'okubanza nubwo twarugire ha kisaaru Ahava tugende Yerusaalemu; Ruhanga waitu akatulinda, yatutabura abanyanzigwa, n'abantu abakaba beeserekere ha muhanda.

³²Twaija Yeruzalemu, oku twamarayo ebiro bisatu.

³³Ha kiro ekya kana, efeeza n'ezaabbu, nubwo byalengerwe omunju ya Ruhanga, byakwasibwa Meremoosi nyakatagara mutabani wa Uliya, nyakatagara ogu, akaba ali hamu n'Eryeza mutabani wa Fenehaasi, abo bakaba bali hamu n'abaleevi, Yobaazadi mutabani wa Yeswa na Nowadiya mutabani wa Bbinuhi.

³⁴Ebintu byona bikabarwa byalengwa, obulemeezi bwa buli kintu bwahandiikwa.

³⁵Omukasumi ako, abo abakaba barugire omubunyagwa, enzaahisibwa abakaba bagarukire, bakahongera Ruhanga owa Isirairi ebihongwa eby'okwokya: nizo enimi ikumi na ibiri habw'Abaisirairi boona, entaama empaya kyenda na mukaaga, ebyana by'entaama nsanju na musanju n'embuzi empaya ikumi na ibiri, kibe kihongwa eky'okuganyiza ebibi; ebi byona, kikaba kihongwa eky'okwokya ekyahongiirwe MUKAMA.

³⁶Kandi bakabihikya hali abalemi b'omukama, n'abalemi abakuru ab'ensi ey'obuseeri bw'ekisaaru; kandi baakonyera abantu n'enju ya Ruhanga.