Read Runyoro - rutooro Ezir 9 Bible Online

Ezir 9 - Runyoro - rutooro bible

Ezir 9

¹Ebi byona obu byamazire kukorwa, abanyoro bakaija bakampikaho baangambira bati: “Abantu ba Isirairi, abanyakatagara na Abaleevi, bateebaganize habantu ab'omunsi ezindi na ha bubi bwabo, bateebaganize ha banyakanaani Abahiiti, Abaperizi, Abayebbusi, Abamooni, Abanyamisiri n'Abamooli.

²Habwokuba, bakatwara abamu ha bahara b'abantu abo babeeswerre, banu babaswererre batabani baabo; ihanga erirukwera, nukwo, kwetabura n'abantu ab'ensi ezi. Abanyoro n'abantu abakuru nubo baabandize kukora ekintu ekibi eki.”

³Obu nahuliire ekintu eki, nkatemura eby'okujwara byange n'omunagiro gwange, nayemenya isoke n'omuleju, naikarra mpoirwemu amaani.

⁴Nubwo boona abaatukumiire habw'ebigambo bya Ruhanga owa Isirairi, habw'ekikorwa ekibi ekyakozirwe enzaahi abaagarwirwe, banyesoroliizeho, obu nkaba nyikaliire mmazirweho enkizi, okuhika ha kasumi ekyonzira eky'omu kairirizi.

⁵Akasumi ak'ekyonzira eky'omukairirizi obukaahikire, nubwo naimukire nambere nkaba nimpeitirirra, nyina ebijwaro byange n'omwegereko gwange ebitemukire, nateeza amaju, naimukiza MUKAMA Ruhanga wange emikono

⁶ningamba nti: “Ai Ruhanga wange, ensoni zimpinguraine, n'amaiso ganyengere, tinsobora kukuraramira iwe Ruhanga wange, ebibi byaitu bitumizire, kandi omusango gwaitu tigwina ha gurukugarukira.

⁷Okuruga omu busumi obwa baisenkuruitwe okuhika ha kiro kinu, tutaaha nitusiisa muno, bakama baitu na banyakatagara baitu, nikyo baanagirwe omumikono y'abakama ab'ensi ezindi, nikyo baitiirwe n'ebitara, nikyo banyagiirwe ebintu byabo, nikyo baswaliziibwe okuhika ha kiro kinu.

⁸Baitu hati, MUKAMA Ruhanga waitu, ayolekereho embabazi kutusigiraho abantu, n'okutuha ekiikaro eky'obusinge omukiikaro kye ekirukwera, nukwo atumulikire kandi atwomeeze omukiikaro kye ekirukwera, n'omubwiru bwaitu.

⁹Habwokuba tuli bairu; baitu noobu turaaba tuli bairu, Ruhanga waitu atatunagaije omubwiru bwaitu, baitu akatwooleka engonzi ze ezitagarukirra omumaiso g'abakama ba Paasa nukwo kutwomeeza twombeke enju ye, tusemeze ebikambuuro, kandi nikyo yatulindiire omunsi ya Yuda na Yerusaalemu.

¹⁰“Hati, Ai Ruhanga waitu, tugambe ki? Obu wamazire kutugirra embabazi ezirukwingana aho, tukacwa ebiragiro byawe,

¹¹ebiwataireho noobaliza omu baheereza bawe abarangi, noogamba oti: ensi eimurukwija kutaahamu kulya, niyo ensi embi, eyasiisirwe abantu ab'ensi ezindi, baagisiisa n'ebikorwa byabo ebibi ebibakoliiremu okuruga ha mutaano ogumu okuhika ha gundi.

¹²Habweki, bahara banyu mutalibasweza batabani baabo rundi inywe kuswererra batabani banyu bahara baabo, kandi mutalikisura kubaserurra obusinge n'omugisa, nubwo muliba b'amaani, mulye ebirungi by'ensi egi, kandi mugigwetere abaana banyu, ebe yabo ebiro byona.

¹³Ebi byona noobu biraaba byatuhikireho habw'ebikorwa byaitu ebibi na habw'omusango gwaitu omukooto, twetegeriize, iwe Ruhanga waitu otufubiire kake okurorra ha bibi byaitu, kandi watusigiraho abantu nka banu,

¹⁴tuligaruka kucwa ebiragiro byawe n'okuswerrana n'abantu abo abanyakukora ebintu ebibi ebi? Tolitubiihirirwa okatubuuleeza, hakaburaho n'omu asigaireho rundi abanyakutabukireho?

¹⁵Ai MUKAMA Ruhanga owa Isirairi, iwe oba mwinganiza, habwokuba haliitwe haroho ekicweka ekyatabukire nkooku turukurora ha kiro kinu. Dara itwe tuli hanu omumaiso gawe nitukwetondera; habwokuba titurukwikirizibwa kuhika omumaiso gawe.”