Read Runyoro - rutooro Neh 1 Bible Online

Neh 1 - Runyoro - rutooro bible

Neh 1

¹Binu nibyo ebigambo, Nehemiya mutabani wa Hakaliya ebi yagambire: Omu mwaka ogw'amakumi abiri, omukwezi okwa Kisileevi, obu nkaba ndi omu rubuga orukuru Suusa,

²Henaani omu ha bangenzi bange yaija aina abasaija abamu abaarugire Yuda; nkabakaguza hali Abayuda abaasigaireho, abatarazaahisiibwe, na hali Yerusaalemu.

³Bakangambira bati: “Abo abaasigaireho abanyakuli omunsi egi, abatarazaahisiibwe, bali omu kabi akatagambwa kandi nibagayibwa; ekisiika kya Yerusaalemu kikaseeseka (kyagwa hansi) kandi amalembo garwo gakookebwa omurro.”

⁴Obu nahuliire ebigambo ebi, nkaikarra narra, namara ebiro ndi omu bujune; nayongera kusiiba n'okwesengereza MUKAMA Ruhanga w'iguru,

⁵nkagamba nti: “Ai MUKAMA Ruhanga ow'iguru, ow'ekitiinisa anyakutiinwa, Ruhanga omutaitandagaano, anyakugonza abo abanyakumugonza kandi abanyakukwata ebiragiro bye;

⁶oikale otegere amatu kandi ogunwire amaiso, ohurre nyowe omwiru wawe arukukwesengereza nyamusana n'ekiro habw'abairu bawe abantu ba Isirairi, ninyetonda habw'ebibi itwe abantu ba Isirairi ebi twakozire. Ego, nyowe n'eka eya isenkuru nyowe tukasiisa.

⁷Tukakora kubi, twalema kukwata ebiragiro byawe n'ebigambo byawe ebi waragiire omwiru wawe Musa.

⁸Oijuke ekigambo eki wagambiire omwiru wawe ogu Musa, oti: ‘Obu mutaliba beesigwa, ndibararangya omu mahanga agandi;

⁹baitu obu mulinkubukira mukakwata ebiragiro byange mukahikiriza eki biragira, abantu banyu noobu baliba bararangiire ha mitaano y'ensi, ndibaihayo mbagarre omu kiikaro eki nakomere kuramizibwamuga.’

¹⁰Abo bairu bawe kandi bantu bawe nyabwawe, aba wacungwize amaani gawe n'obusobozi bwawe.

¹¹Ai MUKAMA, ohulirize okwesengereza kw'omwiru wawe, n'okw'abairu bawe abanyakugonza kukutamu ekitiinisa; kiro kinu omuhe omugisa, omusaija onu amukwatirwe embabazi.” Omu biro ebi, ninyowe naheerezaaga omukama ebyokunywa.