Read Runyoro - rutooro Neh 13 Bible Online

Neh 13 - Runyoro - rutooro bible

Neh 13

¹Ha kiro eki, bakasoma ekitabu kya Musa, abantu boona bategere amatu; haasangwamu ekyahandiikirwe ekirukugamba kiti: Hatalibaho Omwamooni rundi Omumowabbu ow'alitaaha omu kitebe kya Ruhanga;

²habwokuba abantu b'Amooni n'aba Mowabbu batahe Baisirairi omugaati n'amaizi, obu bakaba nibaruga Misiri, baitu bakaboohera Balaamu abakyeene baitu Ruhanga waitu omukyeeno akagwihamu omugisa.

³Abantu obu baahuliire ekiragiro eki, baasoroora abanyamahanga boona, baabaiha omu Baisirairi.

⁴Eki kitakabaireho, Eryasibbu ow'akaba akomerwe okurolerra ebisiika eby'enju ya Ruhanga waitu kandi ow'akaba ali nganjani ya Tobbiya,

⁵akateekaniriza Tobbiya ekisiika ekigalihiire, kara eki bakaba batairemu ekihongwa eky'ebyokulya, obubbaani, ebikwato, n'ebicweka eby'ikumi eby'engano, eviini n'amagita, ebyaheebwaga Abaleevi, abazini, n'abalinzi, ekiragiro nkooku kikaba nikiragira, kandi eki baayahuramuga ebihongwa ebya banyakatagara.

⁶Eki nambere kyabeeriireho, nyowe nkaba ntali Yerusaalemu, habwokuba omu mwaka ogw'amakumi asatu n'ebiri ogw'engoma ya Atagizakiseesi omukama wa Bbabbulooni, nkagenda mb'omukama ogu. Obu haahingwireho akasumi nkasaba omukama orusa

⁷naija Yerusaalemu, obu nubwo nazoire akabi Eryasibbu aka akaba anagiremu Tobbiya, ak'okumuteekaniriza ekisiika omu bikaali by'enju ya Ruhanga.

⁸Ekiniga kikenda kunyita, nukwo kuhungura aheeru ebintu byona ebikaba biri omu kisiika kya Tobbiya.

⁹Hanyuma naragira abantu, baasemeza ebisiika; nukwo nagarramu ebikwato eby'enju ya Ruhanga, hamu n'ekihongwa eky'ebyokulya, n'obubbani.

¹⁰Kandi nkeetegereza, emigabo y'Abaleevi nkooku etarabaheebwaga; nikyo Abaleevi n'abazini abaakoraga omulimo bakaba bairukiire, buli muntu ayegarukiire omu kibanja kye.

¹¹Aho nahana abanyoro nimbakaguza nti: “Habwaki enju ya Ruhanga yanagiriziibwe?” Boona nkabasorooza nabagarra omu biikaro byabo.

¹²Nubwo Abaayuda baaleesire kimu kya ikumi eky'engano, eviini n'amagita omu maahurro.

¹³Nakoma Selamiya nyakatagara, Zadooki omuhandiiki, Pedaaya omu ha Baleevi, babe bakeeto b'amahurro ago, mwijukuru wa Mataniya, babe bakonyezi baabo, habwokuba bakaba bali bantu beesigwa; omulimo gwabo, gukaba guli kugabira bagenzi baabo ebintu.

¹⁴Ai Ruhanga wange, onyijuke ha kintu eki, oteebwa ebirungi byona ebi nakozire hanju ya Ruhanga wange na habw'omulimo gwe ogunyakukolerwamu.

¹⁵Omu biro ebi, nkabona abantu abaajungaga ha Sabbato kandi nibaleeta engano nyingi, nibagyetwekesa enkaina zaabo nibataho n'eviini, emizaabbibbu, emitini, n'ebintu ebindi bingi ebi baaleetaga Yerusaalemu ha Sabbato; nkabahabura ha kiro eki baaguliizeeho ebyokulya.

¹⁶Abasaija aba Taaya abaikaraga omu rubuga oru, baaleetaga ebintu bingi eby'emeringo yoona, babiguza abantu ba Yuda abakaba bali Yerusaalemu.

¹⁷Nubwo najunaine abanyoro ba Yuda nabakaguza nti: “Eki nimukora kintu ki eki ekibi kiti, okusiisa ekiro kya Sabbato?

¹⁸Baisenkuru inywe tinukwo bakozire bati? Ruhanga waitu tinukwo kutuleetera akabi kanu koona, n'okukaleetera orubuga runu? Nimukyayongera kuhambiriza Ruhanga akwatirwe muno Isirairi ekiniga okukiraho, habw'okusiisa Sabbato.”

¹⁹Obwire obu bukaba nibwira amaiso omu malembo ga Yerusaalemu, Sabbato etakahikire, nkaragira nti: Enyigi ikingwe, kandi nateererra nti italikingurwa okuhika Sabbato ehoire. Kandi nkataho abamu ha baheereza bange balinde amalembo, haleme kubaho ekintu na kimu ekirukutaahibwa ha kiro kya Sabbato.

²⁰Hanyuma abasuubuzi n'abatunzi ab'ebintu ebya buli mulingo bakaraara aheeru ya Yerusaalemu dimu rundi kabiri.

²¹Baitu nkabahabura nimbakaguza nti: “Kiki ekirukubaraaza omumaiso g'ekisiika? Obu muraagaruka kuraaraho, muraarora eki ndaabakora” Okuruga obu n'okweyongerayo, batagaruke kwija ha Sabbato.

²²Kandi nkaragira Abaleevi beeyeze, nukwo baije balinde amalembo, nukwo Sabbato esemezibwe kurungi. Ai Ruhanga wange, onyijuke kandi onganyire habw'engonzi zawe ezitagarukirra.

²³Kandi omu biro ebi, nkarora Abayuda abakaba baswire abakazi aba Asidoodi, Abaamoni n'Abamowabbu;

²⁴ekicweka ekya kabiri eky'abaana baabo, baabazaaga Orunyasidoodi, bakaba batarukusobora kubaza engambo ey'Abayuda, baitu baabazaaga engambo eya buli ihanga.

²⁵Nkateera nabo empaka, nabakyeena, abamu omuli bo nabateera, nabamenya isoke; nabaragira barahire omu ibara lya Ruhanga nibagamba bati: “Mutaliikiriza mutalisweza bahara banyu batabani baabo, rundi inywe kuswererra bahara baabo batabani banyu, rundi inywe inywenka kubaswera.

²⁶Abakazi nk'abo tinubo baanagire Solomooni omukama wa Isirairi omu kibi? Omu mahanga maingi, hakaba hataroho mukama arukumusisana, Ruhanga akamugonza muno, yamufoora mukama owa Isirairi; baitu abakazi abanyamahanga, na uwe bakamunaga omu kibi.

²⁷Hati, turaahurra inywe, tukole ekibi ekikooto ekirukwingana aho, tugobeze Ruhanga waitu nituswera abakazi abanyamahanga?”

²⁸Omu ha batabani ba Yehoyada, mutabani w'Eryasibbu nyakatagara omukuru, akaba ali muko wa Sanibarati Omuhoroni; habweki namubinga yandugaho.

²⁹Ai Ruhanga oijuke abantu abo nkooku baasiisire omulimo ogw'obunyakatagara, baacwa n'endagaano ei waragaine na banyakatagara, n'Abaleevi.

³⁰Nukwo nabeereze nti nabaihaho buli kintu kyona ekinyaihanga, nagumya emirimo eya b'anyakatagara n'Abaleevi buli omu, omu mulimo gwe;

³¹nkaragira n'okuleeta enku n'emiganuro omu busumi obutairweho. Ai Ruhanga wange onyijuke, ompe ebirungi.