Read Runyoro - rutooro Neh 2 Bible Online

Neh 2 - Runyoro - rutooro bible

Neh 2

¹Omu mwaka ogw'amakumi abiri ogw'engoma y'omukama Atagizakiseesi, omu kwezi kwa Nisani, omulimo gw'eviini nkooku gukaba guli gwange, nkagikwata nagimuha nkaba ntakazookaga n'obujune nti kara koona.

²Omukama nukwo kunkaguza ati: “Kootali murwaire, habwaki noozooka oina obujune oburukwingana aho? Toli murwaire, baitu torukusemererwa.” Aho obutiini bwayenda kunyita.

³Nagarukamu omukama nti: “Hangiriza Agutamba. Ekirantanga kuba n'obujune kiraha, kandi kunu orubuga n'ekiikaro ekinyakurumu ebituuro ebya baisenkuru nyowe kifookere kitongo kandi amalembo gakyo gookibwe omurro?”

⁴Nubwo omukama yangarukiremu ati: “Hati, noosaba ki?” Aho nasaba Ruhanga ow'iguru.

⁵Hanyuma nagambira omukama nti: “Ai omukama, obu oraaba nookisiima kandi noogonza kumpa eki ndukusaba, onyikirize ngende omunsi ya Yuda, omu rubuga baisenkuru nyowe oru baaziikirwemu, ndwombeke buhyaka.”

⁶Omukama akankaguza (omugo omwikaliire ha rubaju) ati: “Oraamarayo kasumi ki, kandi oligaruka di?” Omukama akaikiriza kumpa eki namusabire, namugambira akasumi.

⁷Kandi namugambira nti: “Nkwesengeriize, ompe ebbaruha ezi ndaatwarra abalemi abakuru ab'omunsi ey'obuseeri, nukwo banyikirize okuraba omunsi yabo okuhika obu nditaaha Yuda;

⁸kandi ompe n'ebbaruha ei ndatwarra Asafu, omulinzi w'ekibira ky'omukama, erukumuragira kumpa emiti ey'okwihamu emirabba ey'amalembo ag'ekigo eky'enju ya MUKAMA, ey'okwihamu ekisiika eky'orubuga, n'ey'enju ei ndukwija kwikaramu.” Omukama akampa eki namusabire, habwokuba Ruhanga wange yangirraga embabazi.

⁹Hanyuma nkahikaho abalemi abakuru ab'ensi ey'obuseeri bw'ekisaaru, nabaha ebbaruha omukama ezi yabahandiikiire. Omukama akaba antumire hamu n'abakuru b'ihe, n'abatembi b'embaraasi.

¹⁰Baitu Sanibarati Omuhoroni, na Tobbiya omwiru Omwamooni obu baahuliire eki, bakabiihirwa muno okuhurra ngu: Haroho omuntu anyakwizire okuserurra abaana ba Isirairi obusinge.

¹¹Nkahika Yerusaalemu, namarayo ebiro bisatu.

¹²Nubwo naimukire ekiro, hamu n'abasaija bake; ntagambire muntu n'omu Ruhanga eki yantaire omu mutima kukorra Yerusaalemu. Nkaba ntaina kisoro ekindi, okwihaho eki, eki nkaba ntembere.

¹³Nkaturuka ekiro, natwarwa ogw'irembo ery'ekihanga, nahika ha iziba ly'eboha na hairembo ery'obusa, narora ebigo bya Yerusaalemu ebikaba biseesekere, n'amalembo garwo agakaba gookiibwe omurro.

¹⁴Hanyuma, nayeyongerayo hairembo ery'ensoro na ha kiyanja ky'omukama; baitu nkaba ntaina mwanya h'okurabya ekisoro eki nkaba ntembere.

¹⁵Hanyuma, nagenda ekiro, natwarwa ogw'ekihanga, narora ekisiika; nagarurwa ogw'irembo ery'ekihanga, nagarukayo.

¹⁶Abanyoro batamanye nambere nkaba ngiire, rundi eki nkaba ninkora; Abayuda, banyakatagara abantu abakuru ab'ekitiinisa, abalemi n'abandi boona abakaba nibaija kukora omulimo, nkaba ntakabagambiire.

¹⁷Hanyuma nabagambira nti: “Muboine akabi aka turumu, Yerusaalemu nkooku rwakambwirwe, n'amalembo gaarwo nkooku gookiibwe omurro? Hati nu, mwije twombeke ekisiika kya Yerusaalemu, nukwo tuleke kusekerezibwa.”

¹⁸Nkabagambira nkooku Ruhanga yanyemeriireho kandi nkooku yankonyiire, n'ebigambo omukama ebi yangambiire. Bangarukamu bati: “Twimuke tutandike kwombeka.” Baayehayo kukorra kimu omulimo.

¹⁹Baitu Sanibarati Omuhoroni, na Tobbiya omwiru Omwamooni na Gesemu Omuharabu obu baahuliire eki, baatuterra omukwazo, baatugaya nibagamba bati: “Obu nimukora ki eki?”

²⁰Nubwo nabagarukiremu nti: “Ruhanga ow'iguru naija kutuha omugisa, itwe abairu be nitwija kwimuka twombeke; baitu inywe, timwina mugabo, rundi obusobozi noobu kyakuba ekiijukyo omu Yerusaalemu.”