Read Runyoro - rutooro Neh 3 Bible Online

Neh 3 - Runyoro - rutooro bible

Neh 3

¹Hanyuma Eryasibbu nyakatagara omukuru, akaimuka hamu na bagenzi be baanyakatagara, baayombeka irembo ly'entaama. Baalyeza, baalitamu enyigi; bakalyeereza kimu okugarukira ha munaara Hananeeri.

²Abaakurasireho ogu, nubo abasaija ba Yeriko, nabo baayombeka, ayakurasire abo, nuwe Zakuru mutabani wa Imuli.

³Kandi batabani ba Hasena, bakombeka irembo ly'encu; baalitamu emirabba n'enyigi, baalitamu ebyooma eby'okukingisa enyigi, n'ebihongozo byalyo.

⁴Ayakurasire abo, nuwe Meremoosi mutabani wa Uliya, mwijukuru wa Hakozi, na uwe yayombeka. Ayakurasire abo, nuwe Mesulaamu mutabani wa Berekiya, mwijukuru wa Mesezabbeeri, na uwe yayombeka. Ayakurasire abo nuwe Zadooki mutabani wa Baana, na uwe yayombeka.

⁵Abaakurasire abo, nubo Abaatekowa, nabo baayombeka; baitu abanyoro baabo bateekambire omulimo gwa Mukama wabo.

⁶Kandi Yohiyada mutabani wa Paseya, na Mesulaamu mutabani wa Besodeya, bbo bakombeka irembo erikuru; baalitamu emirabba n'enyigi, ebyooma eby'okukinga enyigi, n'ebihongozo byalyo.

⁷Abaakurasire abo, ni Meratiya Omugibyoni, na Yadoni Omumeromoosi, abasaija aba Gibbyoni na Mizipa abaalemwaga omulemi omukuru ow'ensi ey'obuseeri bw'ekisaaru.

⁸Abakurasire abo, Uzyeri mutabani wa Haruhaaya, omuheesi wa zaabbu, nabo baayombeka. Ogu yakuratwa Hananiya, omu ha bakozi b'ebintu ebirukuboya, na uwe yayombeka; Yerusaalemu baarwimukya okuhika ha kisiika ekikooto.

⁹Ayakurasire abo, ni Rrefaaya mutabani wa Huura, omulemi ow'ekicweka ky'ensi eya Yerusaalemu, ogu na uwe akombeka.

¹⁰Abo baakuratwa Yedaaya mutabani wa Harumaafu, uwe akombeka ekicweka ekikaba kiroleriire enju ye; ogu yakuratwa Hatusi, mutabani wa Hasabuneya, na uwe yayombeka.

¹¹Malikiya mutabani wa Halimu, na Hasubbu mutabani wa Pahasimowabbu bakasemeza ekicweka ekindi n'omunaara ogw'ebyooto.

¹²Ogu akakuratwa Salumu mutabani wa Haloheesi, omulemi ow'ekicweka kya Yerusaalemu, ogu na uwe akombeka, hamu na bahara be.

¹³Hanuuni, n'abantu enzaarwa eza Zanowa, abo bakombeka irembo ery'ekihanga; bakalyombeka, baalitamu enyigi, ebyoma bya ifo eby'okulikinga, n'ebihongozo byalyo, kandi baayombeka emikono rukumi ey'ekisiika eki, okugarukira ha irembo ery'obusa.

¹⁴Malikiya mutabani wa Rrekabbu, omulemi ow'ensi ya Bbesihakeremu, nuwe yayombekere irembo ery'obusa; akalyombeka yalitamu enyigi zaalyo n'ebyoma byalyo eby'okulikinga; n'ebihongozo byalyo.

¹⁵Kandi Salumu mutabani wa Koruhoze, omulemi ow'ensi Mizipa, ogu akombeka Irembo ery'ensoro; akalyombeka yalisweka, yalitamu enyigi zalyo n'ebyooma byalyo eby'okulikinga, n'ebihongozo byalyo; kandi akombeka n'ekisiika eky'ekiyanja ekya Seera eky'omusiri gw'omukama, okuhika ha matembero aganyakuruga omu rubuga rwa Daudi.

¹⁶Ogu obu yamazire, haakurataho Nehemiya mutabani w'Azibbuki, omulemi ow'ekicweka ky'ensi Bbesi-zura, ogu akombeka ekiikaro ekinyakuroleriire egasani ya Daudi, okuhika ha kiyanja ekyalimirwe abantu, okugarukira ha nju ey'abasaija ab'amaani.

¹⁷Ogu obu yamazire, haayombeka Abaleevi, nubo banu: Rehumu mutabani wa Bbani; ogu yakuratwa Hasabbiya, omulemi ow'ekicweka eky'ensi Keira, ogu akombeka habw'ensi ye.

¹⁸Ogu obu yamazire, abaanyina baayombeka, nubo banu: Baviya mutabani wa Henadadi omulemi w'ekicweka ky'ensi eya Keyira;

¹⁹ogu yakuratwa Ezeri mutabani wa Yeswa omulemi wa Mizipa, nawe yayombeka ekicweka ekindi ekinyakuroleriire ha matemba, noogenda Sitoowa enyakwahurwamu ebyokurwana, enyakuli ha bwekubo.

²⁰Ogu obu yamazire, Bbaruki mutabani wa Zebbai, na uwe yayombeka ekicweka ekindi, okuruga ha bwekubo, okuhika ha rwigi rw'enju ey'Eryasibbu nyakatagara.

²¹Ogu obu yamazire, haayombeka Meremoosi mutabani wa Uliya mwijukuru wa Hakozi, akombeka ekicweka ekindi, okuruga ha rwigi orw'enju ey'Eryasibu, okuhika h'erukugarukira.

²²Ogu obu yamazire, haayombeka banyakatagara, abantu ab'omu kyeya.

²³Abo obu baamazire haayombeka Benyamiini na Hasubbu, baayombeka ekicweka ekirukukurataho, ekikaba kiroleriire enju yabo.

²⁴Ogu obu yamazire, haayombeka Binuyi mutabani wa Henadadi, yayombeka ekicweka ekindi, okuruga ha nju y'Azaliya, okuhika ha bwekubo.

²⁵Parali mutabani wa Uzai, uwe akombeka ekicweka ekirukukurataho, yatandikira ha kasonda k'ekisiika na ha munaara, ogw'ekikaali eky'eruguru, haihi n'ezigati ey'abalinzi. Ogu obu yamazire, haayombeka Padaya mutabani wa Parosi,

²⁶Kandi abaheereza ab'enju ya Ruhanga, abaaraaraga omu rubuga Oferi, bakombeka okuhika ha kiikaro ekinyakuroleriire omulyango ogw'amaizi, ha bukiizi obw'emoso n'omunaara ogunyakulinda Enju ya Ruhanga.

²⁷Ogu obu yamazire, Abatekowa, bakombeka ekicweka ekindi ekinyakuroleriire Omunaara, okugarukira ha kisiika eky'Oferi.

²⁸Eruguru y'irembo ery'embaraasi, nuho haayombekere baanyakatagara, buli omu naayombeka aroleriire enju ye.

²⁹Abo obu bamazire, Zadooki mutabani wa Imeri yayombeka, na uwe aroleriire enju ye. Ogu obu yamazire, hayombeka Sekaniya omulinzi ow'irembo erya Burugaizooba.

³⁰Ogu obu yamazire, Hananiya mutabani wa Selamiya, na Hanuni omwojo owa mukaaga owa Zalafu, yayombeka ekicweka ekindi. Ogu obu yamazire, haayombeka Mesuraamu mutabani wa Berekiya, yayombeka aroleriire ekisiika kye.

³¹Ogu obu yamazire, omu ha baheesi ab'ezaabbu, yayombeka okugarukira ha nju y'abalinzi ab'Enju ya Ruhanga n'ey'abasuubuzi, oroleriire irembo nambere abantu basorrokaniire, n'okuhika ha kisiika eky'eruguru ekya ha nsonda.

³²Kandi hagati y'ekisiika eky'eruguru eky'omu nsonda n'irembo ery'entaama, abaheesi ab'ezaabbu n'abasuubuzi, nubo baayombekereyo.