Read Runyoro - rutooro Neh 4 Bible Online

Neh 4 - Runyoro - rutooro bible

Neh 4

¹Sanibarati obu yahuliire ngu tukaba nitwombeka ekisiika, ekiniga kyayenda kumwita, yasekeereza Abayuda,

²yagamba omumaiso ga bagenzi n'ag'ihe rya Samaliya ati: “Abayuda enturumuki ezi, nibakora ki? Abo ebintu baraabigarraho nkooku birukwetagwa? Baraatamba ebyonzira? Omulimo gwona baraagumara omu kiro kimu? Omu ntuumo z'ehunda egi, baraihamu amabaale kandi agookeze omu kasumi ako?”

³Tobbiya omwamooni akaba amwemeriire haihi, yagamba ati: “Ego kwo, eki barukwombeka eki eboha obu eraakihikaho, ekisiika kyabo. Eky'amabaale eki niija kukiseesa!”

⁴Ai Ruhanga waitu, ohurre nkooku turukugayibwa; emigayo yabo ogibagarurre, obagarre omu banyagwa omunsi ei bakaba banyagiirwemu.

⁵Otabaganyira obubi obu barukukora kandi oteebwa ebibi byabo; habwokuba bajumire itwe abarukwombeka.

⁶Aho twayombeka ekisiika; twakihikya hagati na hagati. Habwokuba abantu bakaba nibaitanira kukora.

⁷Baitu Sanibarati, Tobbiya, Abaharabu, Abaamooni, n'Abasidoodi obu baahuliire ngu omulimo ogw'okwombeka ebisiika bya Yerusaalemu nigugenda omumaiso, kandi ngu ebinyadeere bikaba bitandikire kwigalirwa, ekiniga kyayenda kubaita.

⁸Boona nukwo kwekoba hamu kwija kurwanisa Yerusaalemu n'okugireetamu akatabanguko.

⁹Baitu tukaterra Ruhanga waitu omuranga, twataho abalinzi ab'okulinda nyamusana n'ekiro.

¹⁰Baitu Abaayuda bakagamba bati: “Abeetweki b'emitumba baatandika kuhwa amaani, kandi haroho ehunda nyingi; titurukusobora kukora ha kisiika.”

¹¹Abanyanzigwa baitu bakagamba bati: “Titurukwija kubarora rundi kumanya ekirukutugwera okuhika obu barakamara kutuhikaho, bakatandika kutwita n'okwemereza omulimo.”

¹²Abayuda abakaba babali haihi obu baizire, bakatugambira emirundi ikumi bati: “Nibaija kuruga omu biikaro byona ebi baikaramu baije batuseesire.”

¹³Na nyowe nukwo kuta abantu enyuma y'orugo, omu bicweka ebya hansi muno nambere hali omwanya, nambere harukuzooka, nabatayo nimbakurataniza ebitabu byabo nkooku biri, baina ebitara byabo, amacumu n'amata gaabo.

¹⁴Nkanaga eriiso, narora abantu nkooku beetuntwire, nukwo kubagambira hamu n'abeebembezi n'abanyoro baabo nti: “Abanyanzigwa baitu mutabatiina. Mwijuke MUKAMA ow'ekitiinisa kandi anyakutiinwa, nukwo murwanirre bagenzi baanyu, batabani baanyu, bahara baanyu, bakazi baanyu n'amaka gaanyu.”

¹⁵Abanyanzigwa baitu obu baahuliire ngu tukamanya Ruhanga nkooku aburanganiize entegeka yabo, itwena tukagaruka ha kisiika, buli muntu yagaruka ha mulimo gwe.

¹⁶Okuruga ha kiro eki n'okweyongera omumaiso, ekicweka ekya kabiri eky'abaheereza bange, bakakora ha kyombeko ekicweka ekindi, kikaikara ha gw'okulinda, baina: amacumu, engabu, amata, bajwaire ebizibaho eby'ebyoma; abeebembezi bakemerra enyuma y'enju y'Abaayuda

¹⁷abakaba niboombeka ekisiika. Nobwakubaire abo abakaba nibeetweka ebintu eby'okwombekesa, baakoraga n'omukono ogumu, omukono ogwa kabiri gukwata eky'okurwanisa;

¹⁸Buli mwombeki obu yabaga naayombeka, ekitara tikyamuburahoga. Omusaija omuteezi w'engwara, akaba andi haihi,

¹⁹nkagambira abantu ab'ekitiinisa, abanyoro, n'abandi abasigaireho nti “Omulimo nigukorwa omu mwanya oguli hara muno naitwe, ekisiika tukyenaganagireho, okuruga ha muntu omu okuhikaho ondi.

²⁰Nambere murahurra iraka ly'engwara nuho musingirwe mutwebinge Ruhanga waitu naija kuturwanirra.”

²¹Habweki, twakoraga buli kiro, okuruga ha mamba neesara okuhika ekiro enyunyuuzi ha zitandikira, ekicweka kyaitu ekya kabiri, kyakoraga ha kisiika, ekindi kiikara ha gw'okulinda kikwasire amacumu.

²²Omu kasumi ako nkagambira abantu nti: “Kiro kinu, buli musaija n'omuheereza we, araale Yerusaalemu, nukwo batulindege ekiro, bakole omulimo gundi nyamusana.”

²³Nyowe, bagenzi bange, rundi abaheereza bange, noobu bakubaire abasaija abalinzi abampondiire, busaho n'omu ayajwiremu ebyokujwara; buli omu ekyokurwanisa kye akaikara akikwasire.