Read Runyoro - rutooro Neh 5 Bible Online

Neh 5 - Runyoro - rutooro bible

Neh 5

¹Obu haahingwireho akasumi, abantu baingi abasaija n'abakazi, bakatandika kuhyemera Abayuda bagenzi baabo.

²Habwokuba hakabaho abaagambire bati: “Itwe na batabani baitu na bahara baitu, tuli baingi; kituhikiriire kutunga amagoba, nukwo tulye twomeere.”

³Kandi hakabaho n'abaagambire bati: “Nitusimba emisiri yaitu engonjo zaitu ez'emizaabbibbu n'amaju gaitu, tutunge engano, enjara y'okutumara.”

⁴Hakabaho kandi n'abaagambire bati: “Tukoohoza sente ez'okusasura omusoro gw'omukama, abaatwohoize sente, tukabasimbira emisiri yaitu n'engonjo zaitu ez'emizabbibbu.

⁵Nitusisanira kimu na bagenzi baitu bali, n'abaana baitu, nibasisana abaabo; baitu batabani baitu na bahara baitu, nitubagema obwiru, nangwa abamu omu bahara baitu, bakatungwa ira; eki titwina nkooku turaakyetanga, habwokuba abasaija abandi, nubo baina emisiri yaitu n'engonjo zaitu.”

⁶Obu nahuliire omuranga gwabo n'ebigambo ebi

⁷nkakaguza isenkati omutima, nukwo kujunaana abantu ab'ekitiinisa n'abanyoro, nkabagambira nti: “Nimusaba amagoba, buli omu naagasaba mugenzi we” Nkabasorooleza ekitebe kikooto eky'abantu,

⁸nabagambira nti: “Tukakora kyona eki twasoboire, tumazire akasumi nitucungura Abayuda bagenzi baitu abakaba baguziibwe omu mahanga; baitu inywe nimuguza bagenzi banyu, kandi nukwo baguzibwe itwe!” Bakagwibwamu akahuno, baaburwa n'eky'okugarukamu.

⁹Nkabagambira nti: “Eki murukukora, tikirukuhika. Tikibahikiriire kutiina Ruhanga waitu nukwo amaleho emigayo ey'amahanga agaatunobere?

¹⁰Ekindi, nyowe, bagenzi bange n'abaheereza bange, tubohoze sente n'engano. Amagoba tugaleke.

¹¹Kiro kinu, mubagarurre emisiri yabo, engonjo zaabo ez'emizabbibbu, engonjo zaabo ez'emizaituuni, amaju gaabo, n'ekicweka eky'ekikumi ekya sente, engano, eviini, n'amagita ebi mubaire nimubatonga.”

¹²Nubwo baagambire bati: “Ebi byona nitwija kubigarra, kandi titwagire eki turaabasaba. Kyona eki ogambire nitwija kukikora.” Nkeeta banyakatagara nabarahiza, bahikirize eki baaraganiize.

¹³Nakunkumura omunagiro gwange ningamba nti: “Weena ataahikirize kinu, Ruhanga amubinge omunju ye na ha mulimo gwe. Nukwo abingwe ati kandi aihweho buli kantu koona.” Ekitebe kyona kyagambira hamu ngu: “Ego” kyahaisaniza MUKAMA. Abantu boona bakakora nkooku baaraganiize.

¹⁴Kandi okurugirra ha kasumi akanakomiirweho okuba mulemi wabo omukuru omunsi ya Yuda, okurugirra omu mwaka ogw'amakumi abiri okuhika omu gw'amakumi abiri n'esatu ogw'okulema kw'Aruta-gizakisesi omukama, emyaka ikumi n'ebiri, nyowe rundi mugenzi wange, hatabeho ayaliire ha byokulya by'omulemi.

¹⁵Abalemi abaabandize abaaleetiire abantu obulemeezi, baabaihahoga ebyokulya n'eviini, otabaliireho ebicweka amakumi ana eby'efeeza. Abaheereza baabo nabo baayehulirrahoga abantu. Baitu nyowe eki tinakikoraga, habw'okutiina Ruhanga.

¹⁶Kandi nkagumira ha mulimo ogw'okwombeka ekisiika kinu, kandi ntatunge nsi noobwakuba emu.

¹⁷Kandi ha meeza yange, haalyahoga abasaija kikumi mu ataano, Abayuda, kandi abalemi, otataireho abo abaatwiziremu nibaruga omu mahanga agakaba gatuheriire.

¹⁸Enimi emu, n'entaama enungi mukaaga, nizo bancumbiraga kiro kimu; enkoko nazo itabuzireho, Kandi buli biro ikumi, endyanga ikumi ez'eviini; noobwakubaire hakaba haroho ebi byona, ntasabe mulemi sente ez'ebyokulya; habwokuba abantu bakaba baina bingi ebirukubalemeera.

¹⁹Ai Ruhanga, oijuke ebi nakoliire abantu banu habw'embabazi zange.