Read Runyoro - rutooro Neh 6 Bible Online

Neh 6 - Runyoro - rutooro bible

Neh 6

¹Sanibarati, Tobbiya, Gesemu Omuharabu, nabazigu baitu abandi, obu baahuliire nkooku nkaba mazire kwombeka ekisiika, kandi nkooku hakaba hatakyaroho binyadeere ebinyakukisigairemu (noobwakubaire omu kasumi ako, amalembo nkaba ntakagatairemu nyigi)

²Sanibarati na Gesemu, bakantumaho nibagamba bati: “Oije tutangatangane, omu kyaro ekimu, ha byaro eby'omu kyeya ekya Ono.” Baitu ekigendererwa kyabo, bakaba nibenda kunkora akabi.

³Na nyowe nkabatumira abakwenda ningamba nti: “Omulimo gumpinguraine tinyina kasumi k'okugenda oku. Tinsobora kwemereza omulimo habw'okwija kukurora.”

⁴Bakantumaho bati emirundi ena; nanyowe nkabagarukamu emirundi ena, nimbagambira ebigambo bimu.

⁵Ha murundi ogwa kataano, Sanibarati akantumira omuheereza we yaija, akwasire ebbaruha eyanjurwire.

⁶Binu nibyo bikaba bihandiikirwe omu bbaruha egi: Amahanga gahuliire kandi Gesemu na uwe nikyo arukugamba ngu: “Iwe n'Abayuda nimwenda kwema; nikyo murukwimukiza ekisiika; kandi niiwe orukwenda kufooka mukama wabo;

⁷kandi ngu otaireho abarangi barangirre omu Yerusaalemu ngu niiwe omukama wa Yuda. Hati nu, oije tuhanuule.”

⁸Nkamugarukamu ningamba nti: “Ebintu nk'ebi, ebi orukugamba, tibikakorwaga, noobyecwa wenka.”

⁹Habwokuba boona bakagonza kututiinisa, nibateekereza ngu: omulimo nitwija kuguleka, gubule ekikora, gufeereho aho: “Baitu Ai MUKAMA, ompe amaani.”

¹⁰Obu nagenzire omba Semaya mutabani wa Delaaya mwijukuru wa Mehetabeeri ow'akaba akiingirwe omunju ye, akangambira ati: “Tugende tutangatanganire omunju ya Ruhanga, omunju ya MUKAMA, enyigi twikinge, habwokuba nibaija kukwita, nkugambiire nti nibaija kukwita ekiro.”

¹¹Nkamugambira nti: “Mara omusaija nka nyowe, nsobora kwiruka? Musaija ki arukusisana nyowe, arukusobora kutaaha omu nju ya MUKAMA nukwo ayomeere? Tindukwija kugitaaha.”

¹²Aho nuho namanyiire kandi nuho nayetegereriize eki nikyo kyamanyisize kandi nikyo kyankengeseze nkooku ataratumirwe Ruhanga, baitu akaranga hali nyowe, habwokuba Tobbiya na Sanibbalati bakaba bamuguliriire.

¹³Akagulirirwa habw'ekigendererwa kinu. Nukwo antiinise nkole ekitahikire bansiise ibara, bambundaaze.

¹⁴Ai Ruhanga wange, oijuke byona Tobbiya na Sanibbalati ebi baakozire, kandi oijuke nomurangikati Nohadeya n'abarangi abaayenzire kuntiinisa.

¹⁵Ekisiika kikamalirizibwa ha kiro eky'amakumi abiri n'abitaano eky'okwezi okw'Eruli, omu biro amakumi ataano na bibiri.

¹⁶Abanyanzigwa baitu boona obu baahuliire ekigambo eki, amahanga goona agatwehinguliriize gaatiina, ekitiinisa kyabo kyagaruka enyuma muno; habwokuba bakamanya omulimo nkooku gwamaliriziibwe habw'obukonyezi bwa Ruhanga.

¹⁷Ekindi, omu biro ebi, abantu ab'ekitiinisa aba Yuda bakahandiikira Tobbiya ebbaruha nyingi, Tobbiya na uwe yabagarukamuga.

¹⁸Habwokuba baingi bakaba bamubohiirweho ekirahiro, habwokuba akaba ali muko wa Sekaniya, mutabani w'Aara: Kandi na mutabani we Yehohanaani akaba aswire muhara wa Mesulaamu, mutabani wa Berekiya.

¹⁹Kandi bakangambira ebirungi byona ebi yakozire, bamugarurra ebi nagambire. Tobbiya yaikaraga naantwekera ebbaruha ez'okuntiinisa.