Read Runyoro - rutooro Neh 8 Bible Online

Neh 8 - Runyoro - rutooro bible

Neh 8

¹Abantu boona bakeesorooza hamu omu kizigati ekinyakuli omu irembo ly'amaizi; baagambira Ezira omuhandiiki aleete ekitabu eky'ebiragiro bya Musa, MUKAMA ebi akaba ateeriireho Abaisirairi ha kiro eky'okubanza eky'okwezi kwa musanju.

²Ezira yakireeta omumaiso g'ekitebe eky'abasaija n'abakazi abakaba nibasobora kuhurra n'okwetegereza.

³Yakisoma aroleriire ekizigati ekinyakuli omumaiso g'irembo ery'amaizi, akakisoma okuruga nyenkya okuhika omu ihangwe, omu maiso g'abasaija n'abakazi, n'abo abakaba nibasobora kwetegereza; n'abo abakaba bataireho omutima okuhurra ekitabu ky'ebiragiro.

⁴Ezira omuhandiiki akeemerra ha kituuti ekikaba kikoliirwe kwemererwaho; haihi na uwe ha mukono gwe ogw'obulyo, hakeemerraho Matisiya, Seema, Anaya, Uliya, Hirikiya na Maaseya; kandi ha mukono gwe ogw'obumoso, haayemerraho Pedaaya, Misairi, Malikiya, Hasumu, Hasibadana, Zekaliya na Mesulaamu.

⁵Ezira yasuukura ekitabu abantu boona bamuhangire amaiso; habwokuba akaba ali haiguru y'abantu boona; kandi obu yakisuukwire, boona baayemerra.

⁶Ezira akahaisaniza MUKAMA, Ruhanga ow'ekitiinisa; abantu boona baimukya emikono baagarukamu bati: “Kisemeriire, kisemeriire”, bainama, baaramya MUKAMA, obuso bwabo nibuhikira kimu ha itaka.

⁷Kandi Yeswa, Bbaani, Serebiya, Yamiini, Akubbu, Sabetayi, Hodiya, Maaseya, Kelita, Azaliya, Yozabbaadi, Hanani, Pelaya, Abaleevi, bakakonyera abantu okwetegereza ebiragiro, batakarugire omu biikaro byabo.

⁸Bakahindura kurungi Ebiragiro bya Ruhanga, baabisoborra, abantu baabikenga.

⁹Nehemiya ow'akaba ali mulemi omukuru, Ezira nyakatagara kandi omuhandiiki, n'Abaleevi abaayegesaaga abantu, bakabagambira bati: “Ekiro kinu kikuru kandi ky'ekitiinisa, hali MUKAMA Ruhanga wanyu.” Habwokuba abantu boona obu bahuliire ebigambo balizire

¹⁰hanyuma yabagambira ati: “Irooko mugende, mweriire ebintu eby'ebisajwa, mwenywere eviini empotole kandi ogu ataina eki ateekaniriziibwe, mumutwekere ebyokulya; habwokuba ekiro kinu kikuru kandi ky'ekitiinisa hali MUKAMA waitu; muleke kukwatwa obujune, habwokuba okusemererwa kwa MUKAMA nugo maani ganyu.”

¹¹Abaleevi nukwo kuculeeza abantu boona nibagamba bati: “Muculeere, habwokuba ekiro kinu kikuru kandi ky'ekitiinisa; muleke kukwatwa obujune.”

¹²Abantu boona baagenda kulya n'okunywa, kutweka ebyokulya n'okwegonza, habwokuba bakaba beetegeriize ebigambo ebi baarangiriirwe.

¹³Ha kiro ekyakurasireho, abakuru b'amaju aga baisenkuru b'abantu boona, hamu na baanyakatagara n'Abaleevi, bakagendera hamu omwa Ezira omuhandiiki, beege ebigambo by'Ebiragiro.

¹⁴Bakasanga omu Biragiro MUKAMA ebi yaragiire Musa ebirukugamba ngu: Abaisirairi obu baraabaga omu bugenyi obw'okwezi kwa musanju, baraalege omu nsiisira,

¹⁵kandi ngu bakimanyiseege kandi bakirangirrege omu mbuga zaabo zoona eza Yerusaalemu nibagamba bati: “Mugende omu nsozi, mwiheyo amataagi ag'emizaabbibbu, emizabbibbu enyakwemereze yonka, emikadasi, emikindo, n'emiti endi enyakugira ebikoora ey'okwombekesa ensiisira, nkooku kyahandiikirwe.”

¹⁶Aho abantu baagenda baagaleeta, baayeyombekera ensiisira, buli omu yayeyombekera orusiisira rwe wenka, omu mazigati gaabo, n'omu mazigati ag'enju ya Ruhanga, n'omu kizigati eky'irembo ery'amaizi, n'omu kizigati eky'irembo ery'Efuraimu.

¹⁷Ekitebe kyona eky'abo abakaba barugire omu bunyagwa, bakeeyombekera ensiisira, nizo baaraaramu; habwokuba okurugirra omu businge bwa Yeswa mutabani wa Nuuni, okuhika ha kiro eki, abantu ba Isirairi nukwo baakoraga. Hakabaho omuhimbo ogutagambwa.

¹⁸Buli kiro, okuruga ha kiro eky'okubanza okuhika ha ky'okumalirra, yasomaga, ekitabu eky'Ebiragiro bya Ruhanga. Ekiro ekyobugenyi obu bakabusemeza okumara ebiro musanju; kandi ha kiro ekya munaana, hakabaho omukoro ogw'okumalirra, nkooku kiri omu Biragiro.