Read Runyoro - rutooro Neh 9 Bible Online

Neh 9 - Runyoro - rutooro bible

Neh 9

¹Ha kiro eky'amakumi abiri na bbina eby'okwezi kunu, abantu ba Isirairi bakasorrokana basiiba kandi bajwara eguniya,

²Abaisirairi bakeebaganiza ha banyamahanga bayesesira itaka omu mutwe baayemerra baayetonda habw'ebibi byabo na habw'obubi bwa baisenkurubo.

³Bakeemerra omu kiikaro kyabo; baasoma ekitabu kya MUKAMA Ruhanga okumara ekicweka ekya kana eky'ekiro; ekicweka ekya kana ekindi, baakimara nibeetonda, nibaramya MUKAMA Ruhanga wabo.

⁴Ha matembero g'Abaleevi, hakeemerraaho: Yeswa, Bbaani, Kadimyeri, Sebbaniya, Bbuuni, Serebbiya, Bbaani na Karani; baateerra MUKAMA Ruhanga wabo omuranga.

⁵Nubwo Abaleevi: Yeswa, Kadimyeri, Bbaani, Hasabbuneya, Seribbiya, Hodiya, Sebania na Pasahiya baagambire bati: “Mwimuke muhaisanize MUKAMA Ruhanga wanyu ebiro byona. Ibara lye ery'ekitiinisa eritaina mutaano omu kusiimwa n'omu kunyumizibwa, likugizibwe.”

⁶“Kandi Ezira akagamba ati: Iwe wenka, niiwe MUKAMA; niiwe wahangire iguru, iguru erinyakuli hara muno, na byona ebinyakurumu, ensi na byona ebinyakugiroho, amayanja na byona ebinyakugarumu; kandi ebi byona niiwe obirinda; byona eby'omwiguru bikuramya.

⁷Niiwe MUKAMA Ruhanga, ayakomere Abburahamu wamwiha omunsi Uuri ey'Abakalidaaya, wamuruka ibara Abburahamu;

⁸Okarora nkooku ali mwesigwa hali iwe, nukwo kumuraganiza kuha abaijukuru be ensi ey'Abakanaani, Abahiiti, Abamooli, Abapeereezi, Abayebbusi, n'ey'Abagirigasi; kandi eki waraganiize okakihikiriza, habwokuba oli muhikiriire.

⁹“Okarora omuhito ogwa baisenkuruitwe obu bakaba bali omunsi Misiri, kandi wahurra omuranga baakuteeriire ha Nyanja Erukutukura,

¹⁰okakora ebyamahano n'ebihuniriza omumaiso ga Faraaho, abaheereza be n'ag'abantu ab'ensi ye boona, habwokuba okamanya nkooku baakozire kubi baisenkuruitwe; okeetungira ekitiinisa eki oinakyo okuhika na hati.

¹¹Okatemera abantu bawe omuhanda wabambura nibarubata hoomere, abakaba babakurasire, okabadikya omu nziha, nk'ibaale oku lidikira omu maizi agahamire.

¹²Omu bwire bwa nyamusana, wabeebembezaaga enyomyo ey'ekicu, kandi ekiro obeebembeza ey'omurro kubamulikira n'okubooleka omuhanda ogu baraatoma.

¹³Niiwe wasirimukire ha rusozi Sinai, wabaza na bo nooyema omwiguru, wabateeraho Ebiragiro eby'amazima, wabagambira ebigambo eby'obulyo,

¹⁴niiwe wabamanyisize Sabbato yawe erukwera ey'ekitiinisa? Wabaragira ebiragiro, wabagambira ebigambo ebi warabize hali Musa omwiru wawe.

¹⁵“Enjara obu ekaba ebali kubi, niiwe wabahaire ebyokulya ebyarugire omwiguru, obu baakwasirwe iroho, niiwe wabaihiire amaizi omu mwandara, kandi niiwe wabaragiire kugenda kulya ensi ei okaba orahiire ngu oligibaha.

¹⁶“Baitu bbo na baisenkuruitwe, bakeebbanaaza baaba ngumangani;

¹⁷baayanga kuhurra, bataijuke ebyamahano ebi wakozire hagati yabo; baitu bakagumangana, baayekomera omwebembezi ow'okubagarra Misiri omu Bunyagwa. Baitu niiwe Ruhanga anyakwikara ayeteekaniize kuganyira, ow'embabazi kandi ow'engonzi, atarahuka kubiihirwa ow'engonzi ezitagarukirra, otabanagaije.

¹⁸Noobu baayekoliire enyana ei baayagize omu bintu, baagamba ngu: ‘Ogu nuwe Ruhanga wanyu ayabaihire Misiri,’ baajuma muno bati iwe Ruhanga,

¹⁹habw'embabazi zawe ezitagambwa, otabaleke omwirungu; ekicu rundi omurro ekyabeebeemberaga nyamusana n'ekiro kubooleka omuhanda otabibaiheho.

²⁰Okabaha Mwoyo wawe omurungi abeegese, otabaime byokulya kandi okabaha amaizi ag'okunywa.

²¹Okabakwatirra omwirungu okumara emyaka amakumi ana, bataina ekibabuzireho; ebyokujwara byabo bitakule, kandi batazimbe maguru.

²²Okabaha amakama n'amahanga, okabaha ensonda zoona; nukwo kulya ensi eya Sihooni omukama wa Bbasani.

²³Okakanyisa baijukuru baabo, baingana enyunyuuzi ez'iguru kandi okabaleeta omunsi ei wagambiire baisebo ngu baligitaahamu bagirye.

²⁴Na baijukuru baabo nukwo kutaaha omunsi egi bakagirya, abasi b'ensi egi, nubo Abanyakanaani, okabajemura nabo nibarora wababata omu ngaro, hamu n'abakama baabo, n'abantu ab'ensi egi, babakole nkooku barukwenda.

²⁵Bakahamba embuga ezizitiriirwe n'ensi enguuda, baakwata amaju aganyakwijwire ebintu ebirungi byona, agalimirwemu amaziba, embuga ezinyakurumu engonjo ez'emizabbibbu n'ez'emizaituuni, n'emiti enyakwana ebijuma etarukubarwa; habweki bakalya, baiguta, banyeeta, baayegondeza omu bintu ebirungi byona ebi wabahaire.

²⁶ “Baitu noobu wabakoliire ebi byona batakuhurre kandi bakakujeemera, ebiragiro byawe bakabinaga enyuma, baita abarangi bawe abaabahaburaga ngu: Bakukubukire bakakora n'ebindi bingi eby'okujuma Rahanga.

²⁷Nikyo wabalekiire abanyanzigwa baabo bababonese, obu bakaba nibabonabonesibwa, bakakuterra omuranga, okeema omu iguru wabahurra; habw'embabazi zawe ezitagambwa okabaha abajuni abaabajunire abanyanzigwa baabo.

²⁸Bakarumisa kutunga obusinge, baagaruka baakusiisira, naiwe wabalekera abanyanzigwa baabo baabalema. Baitu obu bayegarukamuga, noyema omuiguru, bakakusaba kubajuna, wabahurraga.

²⁹Okabahabura bahondere ebiragiro byawe, kyonka bbo bakagira emyehembo tibahurra ebiragiro byona ebi; omuntu owalibihondera alyomeera omubyo, kandi bakakuteera amabega, baagumya engoto yabo bayanga kuhurra.

³⁰Baitu okabagumisiriza emyaka nyingi, wabahabura na Mwoyo wawe noraba omu barangi, baitu nabwo batahurre. Nahabweki okabaleka omu mikono yabantu b'amahanga.

³¹Baitu nabwo, omumbabazi zawe enyingi muno, atabamaleho n'obu akubaire kubanagaija; habwokuba oba munyambabazi kandi Ruhanga omuganyizi.

³²“Nahabweki hati, Ruhanga waitu, owobusobozi kandi owamaani, owokutiinwa anyakulinda endagaano kandi ow'engonzi ezitayuga; okutalibana kunu okutwiziire, hali abakama baitu, ababiito baitu, abanyakatagara baitu, abarangi baitu, abaisiitwe, n'abantu bawe bona kurugirakimu omubwire bw'abakama b'Asiriya n'okuhika hati, kutakusisanira nk'okuke.

³³Baitu iwe oikaire ohikiriire omubyona ebyatugweriire kandi okakora n'amazima baitu itwe twakora kubi;

³⁴abakama baitu, ababiito baitu, abanyakatagara baitu n'abaisiitwe tibahondera ebiragiro byawe n'obwakubaire kuhuliriza ebi orukuragira, hamu n'okuhabura oku obahereza.

³⁵Batakuhereze omu bukama bwawe n'omuburungi bwawe obwingi obuwabahaire, n'omunsi enkooto kandi ey'omweru eyi wataire omu maiso gaabo; nabwo batahinduke kuleka engeso zaabu embi.

³⁶Dora itwe tuli bairu na kiro kinu, omunsi eyi wahaire baisenkuruitwe balyeege ebijuma n'omweru gwamwo, dora tuli bairu.

³⁷N'ebirungi bingi ebigirugamu bitwarwa abakama abawatuteireho kutulema habw'ebibi byaitu. Baina obusobozi ha mibiri yaitu nahante zaitu nkooku barukwegondeza kandi tuli omu mwetunturo mukooto.”

³⁸Habweki byona nitukora endagaano etarukuyuga, nitugihandiika kandi ababiito baitu, Abaleviiti baitu n'abanyakatagara baitu bagiteho emanyikirizo.