Read Runyoro - rutooro Es 1 Bible Online

Es 1 - Runyoro - rutooro bible

Es 1

¹Ahaswero ayalemaga amasaza kikumi kimu omu makumi abiri, okuruga Buhindi okugarukira Esopiya,

²obu yatiire engoma, omu rubuga orukuru Suusa, omu mwaka ogwa kasatu ogw'engoma ye

³akacumbira obugenyi abanyoro be boona, abaheereza, engabwa z'amahe aba Paasa na Media, abantu ab'ekitiinisa n'abalemi abakuru ab'amasaza, yayoleka ati obuguuda n'ekitiinisa eky'obukama bwe,

⁴yayoleka obukuru n'okunyumizibwa okw'ekitiinisa kye; okumara ebiro bingi muno, ebiro kikumi omu kinaana.

⁵Ebiro ebi obu byahingwire, omukama akacumbira obugenyi abantu boona abakaba bali omu rubuga orukuru Suusa, abantu boona ab'ekitiinisa n'abatali b'ekitiinisa. Obugenyi yacumbire, bukamara ebiro musanju omu kizigati eky'omusiri ogw'ekikaali ky'omukama.

⁶Hakaba haroho ebikingyo eby'orugoye orukozirwe omu pamba ebirukwera n'engoye eza bbururu eziboherwe n'emiguha eya kitaani enungi kandi eya kahuukya, zisomekerwe omu mpeta ez'efeeza, ibohiirwe ha nyomyo ez'amabaale, kandi hakaba haroho ebitabu eby'ezaabbu n'eby'efeeza, ebikaba biri nambere hakaba haaliriirwe amabaale agarukutukura; amabaale ag'omuhendo okukira agandi goona, n'amabaale ag'omuhendo agandi.

⁷Eby'okunywa bikaheerezibwa omu bikopo eby'ezaabbu, ebitali bya mulingo gumu, eviini eyabonekwaga omukama, ekagabirwa omukama nkooku yaragiire.

⁸Baitu omukama akaragira ati: okunywa, tikuli kw'okuhambirizibwa, akaragira abanyoro ab'omunju ati: buli muntu aheebwe eki arukwenda.

⁹Omugo Vasiti, na uwe akacumbira abakazi obugenyi omu kikaali ky'omukama Ahaswero.

¹⁰Ha kiro ekya musanju, omukama obu yanywire eviini yasasuka, yaragira: Mehumani, Bizisa, Harabona, Abagusa, Zesa, na Karakasi, abakonwa omusanju abaaheerezaaga omukama Ahaswero, abaaroleerraga eka ye,

¹¹aleete omugo Vasiti omumaiso g'omukama, ajwaire ekondo ye ey'obugo, nukwo abantu boona, n'abanyoro barole nkooku yasemiire; habwokuba akaba asemiire muno, weena ayamutahoga eriiso tiyayendaga kulimwihaho.

¹²Baitu abakonwa obu baagambiire omugo Vasiti omukama eki yaragiire, yayanga kwija. Eki kyabiihiza muno omukama.

¹³Nubwo yakagwize abantu abanyamagezi abakaba bamanyire obusumi habwokuba ekaba eri ngeso ye okwekaguza hali abantu abakaba bamanyire kurungi Ebiragiro n'okucwa emisango.

¹⁴Abantu abakaba nibamwirirra omu kitiinisa, nubo: Katiseena, Sesaali, Adimaasa, Tarusiisi, Meresi, Mariseena na Memukaani, ababiito musanju aba Paasa na Media, abo nubo abaaroraga omukama, kandi bakaba baina ebiikaro ebikuru omu bukama bwe.

¹⁵“Okugendera ha biragiro nkooku bigamba, omugo Vasiti ayayangire kukora eki yagambiirwe abakonwa omukama Ahaswero eki yaragiire, asemeriire kukorwaho ki?”

¹⁶Memukaani yagarukamu omumaiso g'omukama n'ag'ababiito naagamba ati: “Omugo Vasiti tasobezeeho omukama wenka, baitu asobezeeho n'ababiito, n'abantu boona abanyakuli omu masaza g'omukama Ahaswero.

¹⁷Habwokuba ekikorwa eki omugo eki akozire, nikiija kumanywa abakazi boona kibahambirize kugaya baibabo, habwokuba nibaija kugamba bati: ‘omukama Ahaswero akaragira omugo Vasiti kugenda omu maiso ge, omugo yayeyangira.’

¹⁸Ha kiro kya hati kinu, abakazi aba Paasa na Media, abanyakuhuliire ha kikorwa eki omugo eki ekozire, nibaija kukigambira ababiito b'omukama boona, Buli hantu, abakazi tibarukwija kutamu baibabo ekitiinisa, eki kireetereze abasaija kukwatirwa bakazi baabo ekiniga.

¹⁹Waitu Agutamba, obu oraaba n'okisiima oragize obusobozi obw'obukama, ekiragiro eki kihandiikwe omu biragiro by'Abapaasa n'Abameedi, nikigamba kiti: Omugo Vasiti, ataligaruka kuzooka omumaiso g'omukama Ahaswero; kandi empeta ye ey'obugo, omukama agihe omukazi ondi, arukukira oli oburungi; ekiragiro eki kitalihindurwa.

²⁰Ekiragiro kyawe obu kiraamara kurangirirwa omu bukama bwawe bunu bwona, noobu buraaba bugalihire buta, abakazi boona nibaija kutamu baibabo ekitiinisa, abaguuda n'abanaku.”

²¹Omukama n'abanyoro, baasiima ekigambo eki, omukama yakora Memukaani nkooku yamugambiire;

²²yatweka ebbaruha omu masaza goona, buli isaza omurulimi rwalyo, ebbaruha erukugamba eti: “Buli musaija abe n'obusobozi omunju ye, kandi abaze engambo ey'ihanga lye.”