Read Runyoro - rutooro Es 2 Bible Online

Es 2 - Runyoro - rutooro bible

Es 2

¹Ebi obu byamazire kubaho, omukama Ahaswero obu yamazire kurugwaho ekiniga, yaijuka omugo Vasiti na byona omugo ogu ebi akaba amukoliire, yaijuka n'ekiragiro eki yaragiire hali uwe.

²Hanyuma abaheereza b'omukama abaamuheerezaaga baagambire bati “Baserurre omukama abaisiki abarungi.

³Omukama akome abanyoro omu masaza ag'omu bukama bwe, basorooze abaisiki boona abarungi empikirre, babasorooleze omu kikaali Suusa, orubuga orukuru, orwalindwaga Hegai omukonwa w'omukama anyakurolerra abakazi, babahe amagita.

⁴Omwisiki omukama ou arukukira kugonza, nuwe abe mugo, omu kiikaro kya Vasiti.” Eki kikasemereza omukama, na uwe nukwo yakikozire.

⁵Omu kasumi ako, omu rubuga orukuru Suusa, hakaba haliyo Omuyudaaya ibara lye Morodekayi mutabani wa Yairi, Yairi owa Simeyi, Simeyi owa Kiisi ow'oruganda rwa Benyamiini,

⁶ow'akaba aihirwe Yerusaalemu, agenderaine omu banyagwa abaatwairwe hamu na Yekonia omukama wa Yuda, Nebukadeneeza omukama wa Babbulooni ou akaba anyagire.

⁷Nuwe akaba ayoroire Hadasa nuwe Esiteeri muhara wa isento omwisiki nuwe akaba ali “nfuuzi” ataina ise kandi ataina nyina; omwisiki akaba asemiire kandi naaligirwa. Ise na nyina obu baamazire kufa, Morodekayi yamwetongorra, yaba nka muhara we ou ayezaaliire.

⁸Ekiragiro ky'omukama obu kyarangiriirwe, kandi abaisiki baingi obu baasorooziibwe omu rubuga orukuru Suusa orwalindwaga Hegai, Esiteeri na uwe akatwarwa omu kikaali ky'omukama yakwasibwa Hegai ayalindaga abakazi.

⁹Esiteeri yagonzibwa muno Hegai, yamutaho omutima; yamuha ebintu eby'okwekunisa, yamuha ebyokulya, yamuteeraho abaisiki musanju abaakomerwe omu kikaali ky'omukama, yagenda omba Esiteeri hamu n'abaisiki aba yamukomiire, yamutwara omunju y'abakazi omu kiikaro ekirukukira oburungi.

¹⁰Esiteeri akaba atakagambire abantu be rundi ab'oruganda rwe; habwokuba Morodekayi akaba amuteereriire ati: eki otalikigamba.

¹¹Buli kiro, Morodekayi, yaikaraga naarubatarubata omumaiso g'ekizigati ky'enju y'abakazi, naagenderra kumanya Esiteeri nkooku akaba ali, kandi n'ebikaba nibiija kumubaho.

¹²Orubu orwa buli mwisiki orw'okugenda mb'omukama Ahaswero obu rwahikaga, hahingwireho ameezi ikumi n'abiri omwisiki naakuraatira ebiragiro by'abakazi; habwokuba ako nuko kakaba kali kasumi akaatairweho ak'okwesemeza nugo ameezi mukaaga ag'okwesemeza n'amagita agarumu omugaju, n'ameezi mukaaga gandi naayesemeza n'ebintu ebirukuboya n'amagita ag'esiigwa abakazi.

¹³Omwisiki obu yagendaga mb'omukama ahikiriize ebi ebigambirweho, yaheebwaga kyona eki yayendaga kutwara, nukwo aruge omunju y'abakazi, ataahe omu kikaali ky'omukama.

¹⁴Omwisiki ogu yagendaga orwebagyo, agaruka nyenkya bukiire, ataaha omunju ey'abakazi ey'akabiri eyalindwaga Saasigazi omukonwa w'omukama, ayaroleerraga abakazi. Omwisiki ogu, mb'omukama tiyagendayoga kabiri, rundi omukama amugondeze muno; obu omwisiki ogu, nubwo yatumwahoga, baija nibeeta ngu: “omwisiki nanka.”

¹⁵Orubu orw'okugenda mb'omukama, orw'Esiteeri muhara w'Abihairi isento Morodekayi, ayamwetongoliire yamufoora nka muhara we ou yayezaaliire obu rwahikire; atasabe kintu na kimu, okwihaho eki kyonka, Hegai omukonwa w'omukama eki yamugambiire. Boona abaaboine Esiteeri, baamusiima muno.

¹⁶Obu baamuhikize mb'omukama Ahaswero, baamutahya omu kikaali kye eky'obukama omu kwezi okwa ikumi, nukwo okwezi okwa Tebesi, omu mwaka ogwa musanju ogw'engoma ye.

¹⁷Omukama yamugonza muno okukira nkooku akaba agondeze abakazi abandi boona. Esiteeri akalyamu omukama Ahaswero omutima okukira Abaisiki abandi boona, nukwo kumujweka ekondo ey'obugo, yamufoora mugo, yamugarra omu kiikaro kya Vasiti.

¹⁸Hanyuma, omukama yacumbira abanyoro be n'abaheereza be boona obugenyi obutagambwa; obugenyi obu bukacumbwa habwa Esiteeri. Kandi yaganyira abantu ab'omumasaza ge kutaha musoro, yagaba ebisembo bingi nkooku omukama agaba.

¹⁹Abaisiki obu baasorozibwe obwakabiri, Morodekayi akaba aikaliire ha irembo ly'omukama.

²⁰Omu kasumi ako, Esiteeri akaba atakagambire ab'oruganda rwe rundi ihanga lye, nkooku Morodekayi akaba amuteereriire; habwokuba yahuurraga Morodekayi nkooku yakamworoire.

²¹Omu biro ebi, Morodekayi obu yaikarraga ha irembo ly'omukama, Bigisaana na Teresi, ababiri ha bakonwa b'omukama abaalindaga omulyango baakwatwa ekiniga, baacwa amagezi ag'okukwata omukama Ahaswero.

²²Ekintu eki, Morodekayi yakimanya, yakigambira omugo Esiteeri omugo yakimanyisa omukama.

²³Ekintu eki obu kyayetegereziibwe, kyagumibwa nkooku kiri ky'amazima abasaija abo bombi baabahanika ha muti. Ekintu eki kikahandiikwa omu kitabu eky'obusinge bw'abakama, omukama naarora ati.