Read Runyoro - rutooro Es 3 Bible Online

Es 3 - Runyoro - rutooro bible

Es 3

¹Ebi obu byamazire kubaho, omukama Ahaswero, akakuza Hamani omwagagi, mutabani wa Hamedasa, akamuta omumaiso, yamukiza abanyoro abakaba bali hamu na uwe.

²Abaheereza b'omukama boona abaikaraga ha irembo ly'omukama, bakainama, baatamu Hamani ekitiinisa; habwokuba omukama nukwo yaragiire. Baitu Morodekayi akanga kwinama n'okumutamu ekitiinisa.

³Nubwo abaheereza b'omukama, abaikaraga ha irembo lye baakagwize Morodekayi bati: “Kiki ekirukukucwisa ekiragiro ky'omukama?”

⁴Obu baabazaaga na uwe buli kiro tiyayendaga kuhurra ebi barukugamba bakagambira Hamani nukwo barole ebigambo bya Morodekayi obu biraaba biina omugaso; habwokuba akabagambira nkooku ali Muyudaaya.

⁵Hamani obu yaboine Morodekayi nkooku ayangire kumwinamira n'okumutamu ekitiinisa, ekiniga kyayenda kumwita.

⁶Atagonze kukwata Morodekayi wenka, baitu habwokuba bakaba bamumanyisize ihanga lya Morodekayi yacwa amagezi Abayudaaya boona, nubo abantu ba Morodekayi, abakaba bali omu bukama bw'Ahaswero bwona.

⁷Omu kwezi okw'okubanza nukwo okwa Nisani, omu mwaka ogwa ikumi n'ebiri ogw'engoma y'omukama Ahaswero, bakateera Puulimu, nuko akaruuru; baakateeraga buli kiro omumaiso ga Hamani; baakateeraga buli kwezi kwa Adara; nukwo bamanye obwire oburahikirizaho eki bali batekanize kukora.

⁸Hamani yagambira omukama ati: “Haroho ihanga erirarangire hona omubukama bwawe, eribaganizibwe omu bantu abali omu masaza gona ag'obukama bwawe. Ebiragiro byabu tibirukusisana ebyamahanga agandi. Kandi abantu abo tibarukukwata biragiro by'omukama, habweki omukama tarukusemerra kubagumisiriza.

⁹Waitu Agutamba obu oraaba nookisiima, ragira, abantu abo bahwerekerezibwe, ndaasasura talenta abo abanyakurolerra omulimo gw'omukama, etalenta z'efeeza omutwaro gumu, bagyahule omu maahurro g'omukama.”

¹⁰Omukama nubwo yayejwire ha rukomo empeta ey'emanyiikirizo ye, yagiha Hamani omwagagi, mutabani wa Hamedasa omunyanzigwa w'Abayudaaya.

¹¹Omukama yagambira Hamani ati: “Dara sente, n'abantu mbabo obeekonyeze nkooku orukwenda.”

¹²Ha kiro ekya ikumi na bisatu eky'Okwezi okw'okubanza, abahandiiki b'omukama nubwo baayesirwe, baahandiika ekihandiiko Hamani nkooku yaragiire baakitwekera abakama abaahara; kikahandiikwa omwibara ly'omukama Ahaswero kiroho n'emanyikirizo ye.

¹³Abamatalisi baatwara ekihandiiko omu masaza goona ag'obukama, kikaba nikiragira okuhwerekereza, okwiita n'okumaraho Abayudaaya boona, abato n'abakuru, abakazi n'abaana omukiro kimu, ekiro kya ikumi nabisatu okwezi kwa ikumi n'ebiri nukwo okwezi kw'Adara; n'okunyaga ebintu byabu nk'eminyago.

¹⁴Kopi y'ekihandiiko yarangiirwa omu mahanga goona, ekiragiro kyamanyisibwa omu masaza goona ngu geetekanirize ekiro eki.

¹⁵Abamatalisi barahuka kutwaara ekihandiiko ky'omukama kandi ekiragiro kyaadumirwa omurubuga orukuru Suusa. Hamani n'omukama baikarra kunywa amarwa, baitu orubuga Suusa rwaba omumwetunturo mwingi.