Read Runyoro - rutooro Es 4 Bible Online

Es 4 - Runyoro - rutooro bible

Es 4

¹Morodekayi obuyayetegeriize byoona abikaba bikozirwe, yataagura engoye ze, yajwara eguniya, yayesera iju kandi yagenda hagati y'orubuga, nateera omukungo ogukooto ateireho n'okurra.

²Yagenda ha mulyango ogw'irembo ly'omukama, kyonka atataahe omunda, habwokuba, hakaba hataroho muntu n'omu anyakujwaire eguniya, ayaikirizibwaga kutaaha irembo ly'omukama.

³Omu masaza goona, hoonahoona ekiragiro n'ekigambo ky'omukama ha byahikire, Abayudaaya bakaba omu bujune obutagambwa, baasiiba, baarra, baateera empamo abaakira obwingi omuli bbo, bakajwara eguniya babyama omu iju.

⁴Abaisiki b'Esiteeri n'abakonwa be, obu baizire baamugambira, obujune bwayenda kumwita. Yatwekera Morodekayi engoye z'okujwara omukikaro ky'eguniya baitu uwe yazanga.

⁵Nubwo yayeta Hasaki, omu habakonwa b'omukikaali, ayakomerwe kumuroleera. Agende omba Morodekayi ayetegereze ekinyakuroho kandi nkooku kyaizire.

⁶Hasaki yagenda omba Morodekayi ow'akaba ali omu ikuute erigalihire ery'orubuga, omumaiso g'irembo ly'omukama,

⁷Morodekayi yamusubirra byona ebyamugweriire, yamugambira omuhendo gwa sente Hamani ezi akaba anihiize kuta omulyaahurro, kakuba Abayudaaya boona baitwa. Amugambe agende asabe omukama, amwesengereze aganyire abantu be.

⁸Yahereza Hasaki kopi ey'ekiragiro ekikaba kirangirirwe omu Suusa, nikiragira kuhwerekereza Abayudaaya boona. Morodekayi yamusaba akitwarre Esiteeri, namusoborra ebintu nkooku biri.

⁹Hasaki akagenda yagambira Esiteeri Morodekayi ebi akaba agambire.

¹⁰Hanyuma, Esiteeri yabaza na Hasaki, yamugambira ebigambo ebi araagambira Morodekayi, nibyo binu:

¹¹“Abaheereza b'omukama boona, n'abantu boona abanyakuli omumasaza g'omukama, bamanyire ngu, kakuba omusaija rundi omukazi agenda mb'omukama omu kikaali eky'omunda, ateesirwe, haroho ekiragiro kimu kyonka kiti; abantu abo baitwege, okwihaho ogu, omukama ou oihireho ogu arayolekeza omwigogwe, habwokuba omu kikaali ky'omukama, oina obusinge okukira abandi boona.”

¹²Baagambira Morodekayi ebya Esiteeri yakozire.

¹³Nukwo Morodekayi yaragira bagarukemu Esiteeri bati: “Otateekereza omu mutima gwawe oti iwe olijunwa mukikaali ky'omukama okukira Abayudaaya abandi!

¹⁴Kakuba oculeera omu kasumi nka kanu, Abayudaaya balihuumuzibwa kandi balijunwa ab'omukiikaro ekindi, baitu iwe n'eka ya sso mulihwerekerra nooha amanyire rundi habwa akasumi nka kanu nikyo wafookiire mugo?”

¹⁵Esiteeri yabagambira kugarukamu Morodekayi bati:

¹⁶“Irooko ogende osorooze Abayudaaya boona abanyakuli omu rubuga Suusa musiibe kandi munsabire mumale ebiro bisatu; yagenda, yakora byona Esiteeri ebi yamuragiire. Nyowe n'abaisiki bange naitwe nukwo turaakora. Hanyuma y'eki ninyija kugenda mb'omukama nobu kiraba nikicwa ebiragiro. Obu ndafa habwokukikora kanfe.”

¹⁷Nubwo Morodekayi yarugireho kandi yakora buli kimu ekya Esiteeri yamuragiire kukora.