Read Runyoro - rutooro Es 5 Bible Online

Es 5 - Runyoro - rutooro bible

Es 5

¹Ha kiro ekya kasatu, Esiteeri akajwara ebyokujwara bye eby'obugo, yazooka omu kikaali eky'omunda, omukaaruziika y'omukama, enyakuroleriire ekisiika ky'omukama. Omukama akaba asingire ha kitebe kye eky'obukama, omu kikaali omunda, aroleriire omulyango oguleeta omu kikaali,

²omukama obu yaboine omugo Esiteeri ayemeriire omu kikaali, yamusemerererwa, yamwolekeza n'omwigo ogw'ezaabbu ogu akaba akwasire nubwo Esiteeri yairiire haihi, yakwata ha ntuli y'omwigo.

³Omukama yamukaguza ati: “Kiki omugo Esiteeri? Ngambira, eki orukwenda, noija kukitunga, noobu oraayenda ekicweka eky'obukama bwange.”

⁴Esiteeri yagarukamu ati: “Nzaire, ninkusaba hamu na Hamani, mwije kiro kya hati, mwije ha bugenyi obu nkuteekaniriize.”

⁵Nubwo omukama yagambire ati: “Hamani araha? Arahuke bwango, tukole omugo eki arukwenda” Aho, omukama na Hamani baagenda ha bugenyi Esiteeri obu yateekaniize.

⁶Obu bakaba nibanywa eviini, omukama yakaguza Esiteeri ati: “Ngambira eki orukwenda, noija kukitunga ninyija kukuha kyona eki oraasaba, noobu oraayenda ekicweka eky'obukama bwange.”

⁷Baitu Esiteeri yagarukamu ati: Ekindukwenda kandi eki ndukusaba nikyo kinu:

⁸“Omukama obu araaba nankorra ekirungi akaikiriza kumpa eki ndukusaba, aije hamu na Hamani ha bugenyi obu ndukwija kubateekaniriza, obu nubwo ndaakora omukama nkooku agambire.”

⁹Kiro eki, Hamani akagenda asemeriirwe muno kandi akyanganukire. Baitu obu yaboine Morodekayi omu irembo ly'omukama, Morodekayi ogu tiyayoleka kikorwa na kimu eky'okutamu omuntu ekitiinisa, eki kikabiihiza muno Hamaani.

¹⁰Baitu akagumiisiriza yataaha omunju; yatuma abantu bamwetere banywani be, yasaba namukazi we Zeresi agende ha bugenyi, okwihaho nyowe nyenka. Andaaliize kugenda n'omukama nyenkya.

¹¹Hamani yasubirra ekitinisa ky'obuguuda bwe, n'obwingi bwabaana be, n'omulingo gwona omukama yamukulizemu, kandi nkooku yamumunyumiize okukira abakuru n'abairu b'omukama.

¹²Hamani akongeraho nabinu: “Ego, omugo Esiteeri ataikirize muntu ondi weena kugenda n'omukama habugenyi obuyatekaniize kwihaho nyowe nyenka.

¹³Baitu eki tikiina eki kirukungasira, obu ndukurora Morodekayi Omuyudaaya aikaliire ha mulyango gw'omukama.”

¹⁴Nubwo mukazi we Zeresi na banywani be boona baamugarukiremu bati: “Ragira, bakole akabaaho ak'oburaiha obw'emikono amakumi ataano, ijo nyenkya, osabe omukama, aragire bahanikeho Morodekayi; nukwo ogende ha bugenyi osemeriirwe hamu n'omukama.” Ekiteekerezo eki Hamani yakisiima, yaragira baakora akabaaho.