Read Runyoro - rutooro Es 6 Bible Online

Es 6 - Runyoro - rutooro bible

Es 6

¹Kiro eki omu bwire bw'ekiro, omukama atasobole kugwijagira; yaragira baleete ekitabu ekyahandikirwemu ebikorwa ebyahingwire, eby'obusinge bw'abakama, baabisomera omukama.

²Hakaba harumu ekintu ekihandiikirwe ekirukwoleka Morodekayi nkooku akaba abalize hali Bigisaana na Teresi, ababiri ha bakomwa b'omukama, abaalindaga omulyango, kandi abakaba bacwire amagezi ag'okukwata omukama Ahaswero.

³Omukama akakaguza ati: “Eki, Morodekayi kikamuleetera kitiinisa ki rundi ihaiso ki?” Abaheereza b'omukama baagarukamu bati: “Busaho kintu eki yakoliirwe.”

⁴Omukama yayongera yakaguza ati: “N'oha ogu anyakuli omu kizigati?” Omukasumi ako, Hamani nubwo akaba yakataaha ati omu kizigati eky'aheeru ey'ekikaali ky'omukama, abaze na uwe nkooku Morodekayi araahanikwa ha kabbaho aka akaba amukoliire.

⁵Abaheereza b'omukama baagambira omukama bati: “Hamani dara we nguli, ayemeriire omu kizigati” naayenda kukurora omukama yagamba ati: “mumwete arugeyo.”

⁶Hamani yataaha, omukama yamukaguza ati: “Omuntu omukama ou arukugonza muno kutamu ekitiinisa, tumukorre ki?” Hamani yayekaguza ati: “Nooha omukama ou asobora kugonza kutamu ekitiinisa okukira nyowe?”

⁷Nukwo kumugarukamu ati:

⁸omuntu ogu omukama ou arukugonza muno kutamu ekitiinisa, bamuleetere ebijwaro eby'obukama, omukama ebi yajwaire, embaraasi ei yatembere, enyakujwekerwe ha mutwe ekondo y'obukama;

⁹omu ha banyoro b'omukama arukukirra ekitiinisa, bamuhe ebyokujwara n'embaraasi; ajweke omuntu ogu omukama ou arukugonza kutamu ekitiinisa, amurabye omu ikuute ly'orubuga, atembere embaraasi, amwebembiire naarangirra ati: “omuntu omukama ou araagonza kutamu ekitiinisa, nukwo araakolerwa ati.”

¹⁰Hanyuma omukama yagambira Hamani ati: “Rahuka bwango, twara ebijwaro n'embaraasi, nkooku ogambire, nukwo okole Morodekayi Omuyudaaya anyakwikaliire ha mulyango gw'omukama. Byona ebi ogambire, otasigayo na kimu.”

¹¹Aho Hamani yakwata ebijwaro yajweka Morodekayi, yamutembya ha mbaraasi, yamurabya omu ikuute ly'orubuga naarangirra ati: “Omuntu ogu omukama ou arukugonza kutamu ekitiinisa, nukwo araakolerwa ati.”

¹²Hanyuma Morodekayi yagaruka ha irembo ly'omukama. Baitu Hamani yagaruka bwango omuka ye ayeswekeriire ha mutwe, obujune buraaliire kumwita.

¹³Yasubirra mukazi we Zerezi na banywani be boona, byona ebyamugweriire. Nubwo abasaija be abanyamagezi na mukazi we Zeresi baamugambiire bati: “Morodekayi ogu anyakukugarwize hansi obu araaba ali Muyudaaya, tolimusingura, mazimakwo oraamwinamiraga.”

¹⁴Obu bakaba nibakyabaza, abakonwa b'omukama baahika, baaleeta bwango Hamani ha bugenyi Esiteeri obwakaba ateekaniize.