Read Runyoro - rutooro Es 7 Bible Online

Es 7 - Runyoro - rutooro bible

Es 7

¹Aho, omukama na Hamani baataaha obugenyi, hamu n'omugo Esiteeri

²Obu bakaba nibanywa eviini ha kiro ekya kabiri, omukama yayongera yakaguza Esiteeri ati: “Omugo Esiteeri nooyenda ki? Ngambira, noija kukitunga noosaba ki? Noobu oraasaba ekicweka eky'obukama bwange, oraakitunga.”

³Nubwo omugo Esiteeri yagarukiremu ati: “Waitu Agutamba, obu oraaba nongirra embabazi, ondekere obwomeezi bwange, eki nikyo ndukusaba, kandi olekere abantu bange obwomeezi bwabo, eki nikyo ndukugonza muno.

⁴Habwokuba nyowe n'abantu bange, tukagurwa, twitwe, tuhwerekerezibwe, tubuuleezibwe. Kakuba twabaire tuguliirwe kutungwa kwonka, kuba bairu rundi bazaana, tinaakugambire kantu; habwokuba omuhito gwaitu tigurukulengesanizibwa n'okufeerwa kw'omukama.”

⁵Hanyuma omukama Ahaswero yakaguza omugo Esiteeri ati: “Nooha ogu, kandi ali nkaha arukuteekereza kukora ekintu nk'eki?”

⁶Esiteeri yagarukamu ati: “Nuwe omuhiiganiza kandi omunyanzigwa! Nuwe Hamani”, imira ogu Hamani yakwatwa obutiini omumaiso gaomukama n'omugo.

⁷Omukama yaruga omu bugenyi, ekiniga nikyenda kumwita, yagenda omu musiri gw'ekikaali, baitu Hamani uwe obu yayetegeriize omukama nkooku akaba amaliriire kumwita, yasigara ayesengereze omugo Esiteeri atabule obwomeezi bwe.

⁸Omukama yaruga omu musiri ogw'ekikaali, yagaruka nambere bakaba nibanywera eviini, omu kasumi ako, Hamani akaba ali ha kitabu, Esiteeri eki akaba abyamireho; omukama nukwo kugamba ati: “Mawe omusaija onu naasa kuhamba omugo, na nyowe nindora nti, omu kikaali kyange kyonyini?” Omukama obu akaba atakamizire kugamba ebigambo ebi, abakonwa baasweka Hamani amaiso.

⁹Nubwo Harabona, omu ha bakonwa abaaheerezaaga omukama yagambire ati: “Akabbaho, Hamani aka yakoliire Morodekayi, ayagambire ebigambo ebyajumire omukama, kali omunju ya Hamani, oburaiha bwako emikono amakumi ataano.”

¹⁰Omukama yagamba ati: “Nuko mumuhanikeho.” Hamani nukwo baamuhanikire bati, ha kabbaaho aka akaba akoliire Morodekayi. Omukama nubwo yarugwaho ekiniga. Aaa, nukwo kiba. “Ogu bateekerra rubogo, guba rutanga.”