Read Runyoro - rutooro Es 8 Bible Online

Es 8 - Runyoro - rutooro bible

Es 8

¹Ha kiro eki, omukama Ahaswero, enju ya Hamani omunyanzigwa w'Abayudaaya, yagiha omugo Esiteeri. Morodekayi yahikibwa hali omukama, habwokuba Esiteeri akaba amazire kumumanyisa nkooku amwinaho obuzaale;

²omukama yayeiha empeta ye ey'ekaba eroho emanyiikirizo ye, ei akaba aihireho Hamani, yagiha Morodekayi. Esiteeri yaha Morodekayi okurolerra enju ya Hamani.

³Hanyuma, Esiteeri, akagaruka yabaza n'omukama, yamugwa ha bigere, yamwesengereza ataireho n'okurra, afuuhye entegeka embi ey'okurwanisa Abayudaaya, Hamani Omwagagi ei akaba ategekere.

⁴Omukama yayolekeza Esiteeri n'omwigo ogw'ezaabbu.

⁵Esiteeri yaimuka yayemerra omumaiso g'omukama. Yagamba ati: “Waitu nzaire, obu oraaba nongirra embabazi, eki obu oraaba nookisiima, kandi na nyowe obu ndaaba ninkusemeza oragire bahandiike ekiragiro eky'okudibya ebbaruha ezaabagirwe Hamani Omwagagi mutabani wa Hamadasa, ezi yahandiikire okuhwerekereza Abayudaaya abanyakuli omu masaza g'omukama goona.

⁶Ndisobora nta kugumiisiriza kurora akabi akarukwizira abantu bange? Nsobora kugumiisiriza kurora ab'oruganda rwange nibahwerekerra?”

⁷Omukama Ahaswero nubwo yagambiire omugo Esiteeri na Moradekayi Omuyudaaya ati: “Enju ya Hamani ngihaire Esiteeri uwe bamuhanikire ha kabaaho, habwokuba abaire naija kuhwerekereza Abayudaaya.

⁸Hati, noikirizibwa kuhandiika omu ibara ly'omukama nkooku orukwenda, kyona ekirukukwata ha Bayudaaya, okiteho emanyiikirizo n'empeta y'omukama; habwokuba ekiragiro ekinyakuhandiikwa omu ibara ly'omukama, kikateebwaho emanyikirizo n'empeta ye, eki tikisobora kudibibwa.”

⁹Omu kasumi ako omu kwezi okwa kasatu, nukwo okwa Savani, ha kiro eky'amakumi abiri na bisatu, abahandiiki b'omukama bakeetwa; baahandiika ekiragiro, nibatamu byona Morodekayi ebi yaragiire Abayudaaya, abaamasaza, abalemi abakuru, n'abanyoro ab'amasaza goona, okuruga India okugarukira Esopiya, Omasaza kikumi mu abiri, buli isaza omu mpandiika yalyo, buli ihanga omu ngambo yalyo, Abayudaaya nabo, omu mpandiika yabo n'omu ngambo yabo.

¹⁰Ekihandiiko eki, kikahandiikwa omu ibara ly'omukama Ahaswero, kyateebwaho emanyiikirizo n'empeta ye, kandi ebbaruha ikatwarwa baamatalisi abatembere, embaraasi ezirukwiruka muno, ezaayekonyesibwaga ha mulimo gw'omukama, ezaihirwe omu igana ly'omukama zaatendekwa.

¹¹Ebbaruha ezi, omukama nuho yaikiririize Abayudaaya ab'omu mbuga zoona kwesorooza n'okwerwanaho, baite, bahwerekereze, babuuleeze ihe ryona erya buli ihanga rundi buli isaza, erisobora kulengaho kubaseesira, hamu n'abaana n'abakazi baabo, banyage, ebintu byabo,

¹²ha kiro kimu, omu masaza goona ag'omukama Ahaswero, ha kiro ekya ikumi na bisatu eby'okwezi okwa ikumi n'abiri, nukwo okwezi okw'Adara,

¹³Ekopi ey'ebbaruha eyahandiikirwe nubwo yarangiriirwe, kiri kiragiro omu masaza goona, kandi habwokuba kiragiro eky'amahanga goona ha kiro eki, Abayudaaya bakeeteekaniza okuhoora abanyanzigwa baabo enzigu.

¹⁴Aho baamatalisi bakatemba embaraasi zaabo ezikaba niziiruka muno, ezaayekonyezibwaga ha mulimo gw'omukama, baagenda bwango, omukama nkooku akaba aragiire; ekiragiro kyarangiirwa omu rubuga orukuru Suusa.

¹⁵Nubwo Morodekayi yarugire omumaiso g'omukama ajwaire ebijwaro by'obukama ebya bbururu n'ebirukwera, ajwaire ekondo eya zaabbu ey'ekitiinisa n'omwenagiro ogwa kitaani enungi mali eya kahuukya, obu orubuga Suusa, niruteera akoogo kandi nirusemererwa muno.

¹⁶Abayudaaya bakajwerwa omusana, baatunga okusemererwa, omuhimbo n'ekitiinisa.

¹⁷Omu masaza n'omu mbuga zoona, ekiragiro n'ekigambo kye nambere byarangiriirwe, Abayudaaya bakatunga okusemererwa n'omuhimbo baacumba obugenyi kandi baahuumura. Kandi baingi abaarugire omu mahanga ag'ensi egi, baayeyeta Bayudaaya, habwokuba baabatiinaga muno.