Read Runyoro - rutooro Es 9 Bible Online

Es 9 - Runyoro - rutooro bible

Es 9

¹Omu kwezi okwa ikumi n'abiri, nukwo okw'Adara, ha kiro ekya ikumi na bisatu eky'okwezi oku, ekiragiro n'ekigambo ky'omukama obu bikaba biri haihi kuhikirizibwa, ha kiro kyonyini, Abunyanzigwa b'Abayudaaya eki baanihirrahoga kubalema, baitu ekyahanwirwe kyagarurwa ha kiro Abayudaaya eki baakulemiireho abazigu baabo,

²Abayudaaya ab'omu masaza goona ag'omukama Ahaswero, bakeesorooleza omu mbuga zaabo kukwata abaayendaga kubakoraho akabi, busaho n'omu ayasoboire kubeemerra omumaiso, habwokuba abantu boona baabatiinaga.

³Abakuru boona ab'amasaza, abalemi abakuru, n'abakozi ab'omu kikaali ky'omukama, nabo bakakonyera Abayudaaya, habwokuba nabo baatiinaga Morodekayi.

⁴Habwokuba Morodekayi akaba ali muntu w'ekitiinisa omu kikaali ky'omukama, akaba ali murangaanwa omu masaza goona; habwokuba Morodekayi ogu yagendaga naayeyongera obusobozi.

⁵Abayudaaya, bakatema abanyanzigwa baabo n'ebitara, baabaita baabateera akatuumo baabahwerekereza, bona abakaba babanobere, baabakora nkooku barukwenda.

⁶Omu rubuga orukuru Suusa mwonka, bakaitamu abantu ebikumi bbitaano baabahwerekereza,

⁷kandi baitu: Parisamidasa, Dabaifooni, Asipaasa,

⁸Poraasa, Adalia, Aridasa,

⁹Parimasiita, Arisai, Aridai na Viasaaza,

¹⁰abaana ikumi batabani ba Hamani mutabani wa Hamedasa omunyanzigwa w'Abayudaaya; baitu ebintu byabo batabikwateho.

¹¹Ha kiro eki kyonyini, abaagwire omu rubuga orukuru Suusa, bakamanyisibwa omukama.

¹²Omukama nukwo kugambira omu Esiteeri ati: “Omu rubuga orukuru Suusa, Abayudaaya baisireyo abantu ebikumi bitaano, omuli abo, baitiiremu abaana ikumi batabani ba Hamani. Lero basuzire ki, omu masaza g'omukama agandi! Hati nooyenda ki? Noija kukitunga. Ekindi kiki eki orukwenda? Nakyo noija kukitunga.”

¹³Esiteeri yagarukamu ati: “Waitu Kabumba obu oraaba nookisiima oikirize Abayudaaya abanyakuli omu rubuga Suusa na nyenkya bakole ekiragiro ekya kiro kinu nkooku kirukugamba. Kandi oragire abaana ikumi batabani ba Hamani nabo bahanikwe ha kabbaho.”

¹⁴Aho omukama yaragira ati: eki nukwo kikorwe; ekiragiro kyarangirirwa omu rubuga Suusa, abaana ikumi batabani ba Hamani bahanikwa ha kabbaho.

¹⁵Ha kiro ekya ikumi na bbina eky'okwezi kw'Adara, Abayudaaya abakaba bali omu rubuga Suusa, bakagaruka baayesorooza, baitu abantu ebikumi bisatu abo abakaba bali omu rubuga Suusa; baita ebintu byabo batabikwateho.

¹⁶Abayudaaya abandi abakaba bali omu masaza g'omukama, nabo bakeesorooza kwerwanaho, baayejuna abanyanzigwa baabo, baabaitemu emitwaro musanju, hali abo abakaba babanobere; baitu ebintu byabo batabikikwateho.

¹⁷Eki kikabaho ha kiro ekya ikumi na bisatu eby'okwezi kw'Adara, kandi ha kya ikumi na bbina, baahuumura, ekiro eki baakifoora ky'obugenyi kandi ky'okusemererwa.

¹⁸Baitu Abayudaaya abakaba bali omu rubuga Suusa, bbo bakeesorooza ha kiro ekya ikumi na bbisatu na ikumi na bbina, baahumura ha kya ikumi na bbitaano, eki nikyo baafoora kiro ky'obugenyi n'okusemererwa.

¹⁹Habweki Abayudaaya ab'omu byaro, abaaraaraga omu mbuga ezitazitiriirwe, ekiro ekya ikumi na bbina eky'okwezi kw'Adara, nikyo baafoire kiro ky'okusemerrwa kandi ky'obugenyi, kandi ky'okuhuumura, ekiro eky'okutwekerranganaho ebisembo.

²⁰Morodekayi akahandiika ebintu ebi byona, yatwekera ebbaruha Abayudaaya boona abakaba bali omu masaza goona ag'omukama Ahaswero, aba haihi n'aba hara

²¹abatereere baijukege kujaguza ekiro ekya ikumi n'abbina eky'okwezi kw'Adara, n'ekiro kyaikumi n'abitano, buli mwaka,

²²kandi ebiro ebi, Abayudaaya ebi baajunirweho abanyanzigwa baabo, okwezi oku baarugiiremu omu bujune baaba omu kusemererwa, oku baarugiiremu omu maganya baagaruka omu kuhuumura; ebiro ebi babifoolege biro by'obugenyi n'okusemererwa, biro by'okuheeranganaho ebintu ebirungi, n'okugabiirraho ebisembo.

²³Aho Abayudaaya baatandika kukora nkooku bakaba batandikire, Morodekayi nkooku akaba abahandiikiire.

²⁴Habwokuba Hamani Omwagagi mutabani wa Hamadasa, omunyanzigwa w'Abayudaaya boona, akaba agobiize Abayudaaya abahwerekereze, kandi akaba atiire Pulimu, niryo itomo abasasangule kandi abahwerekereze;

²⁵baitu Esiteeri obu yahikire omumaiso g'omukama, yaragira omu buhandiiki naagamba ati: Amagezi amabi aga yacwire kugobeza Abayudaaya nuwe gakoleho, uwe na batabani be, nubo bahanikwe ha kabaaho.

²⁶Ebiro ebi, nikyo baabyetiire Pulimu, nibagendera ha kigambo Pulimu. Habweki Abayudaaya habw'ebi byona ebikaba bihandiikirwe omu bbaruha egi, n'ebi, ebi baaboine omu kintu eki, na habw'ebi ebyabagweriire,

²⁷nukwo kwekorra ekiragiro bakakyegumizaaho kimu hamu n'abaijukuru baabo, na boona abaateeraine nabo ekiragiro eki nikigamba kiti: “Ebiro ebi ebibiri baraabikuzaaga buli mwaka ha kasumi akaatairweho, obuhandiiki nkooku burukugamba.”

²⁸Ebiro ebi, biijukwege kandi bikuzibwege abantu boona, ab'obusinge obuliija, aba buli nju, aba buli isaza kandi aba buli mbuga, kandi ngu Abayudaaya, ebiro binu ebya Pulimu, batalibidibya, kandi n'abaijukuru baabo, batalirekerra kubiijuka.

²⁹Hanyuma omugo Esiteeri muhara w'Abihairi, na Morodekayi, nubwo baakozire ekihandiiko eky'obusobozi, nibagumya ebbaruha egi eya kabiri eyahandiikirwe hali Pulimu.

³⁰Abayudaaya boona bakatwekerwa ebbaruha, omu masaza kikumi omu abiri na musanju ag'obukama bw'Ahaswero negondeza Abayudaaya obusinge n'okugwagwana,

³¹neegamba eti: “Ebiro ebi ebya Pulimu bisemezibwege ha kasumi kabyo akaatairweho Morodekayi Omuyudaaya n'omugo Esiteeri nkooku baaragiire Abayudaaya, kandi nkooku bbo bonka baayeteeriireho ekiragiro hamu n'abaijukuru baabo ha kigambo ky'okusiiba n'okuteera empamo.”

³²Ekiragiro ky'omugo Esiteeri nikyo kyagumize okukuzaaga ebiro ebi ebya Pulimu, ekiragiro eki kyahandiikwa omu kitabu. Obukuru bwa Aswero na Morodekayi.