Read Runyoro - rutooro Kurug 1 Bible Online

Kurug 1 - Runyoro - rutooro bible

Kurug 1

¹Ganu nugo amabara gabatabani ba Isirairi abaizire Misiri hamu na Yakobbo, buli omu n'eka ye.

²Rubbeni, Simyoni, Leevi, na Yuda;

³Isakara, Zebburuni na Benyamiini;

⁴Daani na Nafutaali; Gaadi na Aseeri.

⁵Abantu boona ab'oruzaaro rwa Yakobbo, baahikaga nsanju. Yosefu uwe akaba aikaire ira Misiri.

⁶Hanyuma Yosefu yafa na bagenzi be boona, n'abantu boona ab'akasumi ako.

⁷Baijukuru ba Isirairi bakazaara abaana baingi muno baakanya, baaba b'amaani muno; baijura ensi yoona Misiri.

⁸Omu biro ebi, omukama omuhyaka ow'akaba atamanyire Yosefu, akatandika kulema Misiri.

⁹Omukama ogu akagambira abantu ati: “Abantu ba Isirairi, batuhinguraine obwingi n'amaani.

¹⁰Tubacwere amagezi, baleke kweyongera kukanya, kakuba tucwekerwa obulemu, nibaija kwekoba n'abanyanzigwa abarukuturwanisa, bairuke omunsi.”

¹¹Nahabweki, bakabateeraho abakuru b'emirimo bababonese nibabaha emirimo ey'amaani. Bakombekera Faraaho embuga ez'okwahuramu nizo zinu: Pisomu na Ramuseesi.

¹²Nkooku baagenzire nibongera kubabonesa emihito, nukwo Abaisirairi baagenzire nibeeyongera kukanya kandi nukwo baijwire ensi yoona nubwo Abamisiri, baatinire muno Abaisirairi.

¹³Nubwo kubaragira kukora n'amaani,

¹⁴baabasaaliza nibabaha emirimo ey'amaani, nibabasambisa obudongo, nibababumbisa amatafaali, nibabakozesa emirimo yoona ey'aheeru; buli mulimo gwona ogu baakoraga baagubakozesaaga n'amaani.

¹⁵Kandi, omukama wa Misiri yaragira abazaalisa, rundi abasehenyi[1] omu nuwe Sifura, ondi nuwe Puha,

¹⁶yabagambira ati: “Obu muraabaga nimuzaalisa abakazi Abahebburaayo, mukarora hazairwe omwana omwojo, mumwitege; obu araabaga mwisiki, mumulekege.”

¹⁷Baitu abazaalisa abo, bakaba bali bakazi abarukutiina Ruhanga, tibaakora eki omukama wa Misiri yabaragiire, abaana aboojo, na bo baabalekaga bali boomeezi.

¹⁸Omukama wa Misiri nukwo kweta abazaalisa yabakaguza ati: “Kiki ekibakozeseze kinu, mwayanga kwita abaana aboojo?”

¹⁹Abazaalisa bagambira Faraaho bati: “Abakazi Abahebburaayo tibarukusisana abakazi Abanyamisiri, b'amaani kandi nibazaara omuzaalisa atakabahikireho.”

²⁰Ruhanga nukwo kukorra abazaalisa abo ebirungi; abantu Abaisirairi baakanya, baaba b'amaani muno.

²¹Abazaalisa abo habw'okutiina Ruhanga, na bo yabaha amaka n'okuzaara abaana.

²²Nubwo Faraaho yaragiire abantu be naagamba ati: “Abaana aboojo boona abaraazaarwaga Abahebburaayo, mubanagege omu kyambu Nairo, baitu abaisiki boona, mubaleke boomeere.”