Read Runyoro - rutooro Kurug 10 Bible Online

Kurug 10 - Runyoro - rutooro bible

Kurug 10

¹MUKAMA Ruhanga yagambira Musa ati: “Genda hali Faraaho, habwokuba agumanganiize omutima gwe n'emitima ey'abaheereza be, nukwo nyoleke eby'amahano byange omuli bo.

²Habweki olisubirra abaana bawe n'abaijukuru bawe nkooku nadomadomeze Abamisiri, nimbakora eby'amahano, nukwo mumanye nyowe nyenka ndi MUKAMA Ruhanga.”

³Nubwo Musa na Arooni baagenda hali Faraaho baamugambira bati: “MUKAMA Ruhanga ow'Abahebburaayo naagamba ati: ‘Olihikya nkaha kwanga kunyebundaaliza? Ikiriza abantu bange bagende bampeereze.

⁴Baitu obworaayanga kwikiriza abantu bange kugenda, kiro kya nyenkya ninyija kuleeta enzige omunsi yawe,

⁵zisweke ensi yoona, itaka lireke kurorwa, zirye byona ebi mwasigaize, orubaale ebi rutaratiire, niziija kulya emiti yanyu yoona, enyakumezire omu bwerre.

⁶Niziija kwijura omu maju gawe, ziijule omu maju ag'abaheereza bawe boona n'omu maju ag'Abamisiri boona, niziija kuba nyingi muno, baisiinywe na baisenkuru inywe ezi batakabonahoga, bakaba okuba omunsi okuhikya kiro kinu.’ ” Musa yaruga hali Faraaho yagenda.

⁷Abaheereza ba Faraaho baamukaguza bati: “Omusaija ogu, alitutalibaniza kuhikya nkaha? Ikiriza abantu be bagende baheereze MUKAMA Ruhanga wabo tokeetegeriize Misiri nkooku esiisikaire.”

⁸Nubwo Faraaho yatuma abantu kweta Musa na Arooni bagaruke, obu baizire, yabagambira ati: “Mugende muheereze MUKAMA Ruhanga wanyu, baitu ab'okugenda, nabo nibaha?”

⁹Musa yagarukamu ati: “Nitwija kugenda n'abantu baitu, amagana gaitu ag'entaama n'ag'embuzi, n'ag'ente, habwokuba, nitwija kukorra MUKAMA Ruhanga obugenyi.”

¹⁰Faraaho yagamba Musa na Arooni ati: “MUKAMA Ruhanga araaba ali nainywe obundabaikiriza mukagenda n'abaana baanyu abato! Eki nikyeyoleka nkooku mwina ekintu ekibi eki mutegekere kukora, habweki, tindukubaikiriza mukagenda.

¹¹Inywe abasaija ninywe mugende muheereze MUKAMA Ruhanga, habwokuba eki nikyo murukugonza.” Musa na Arooni baabingwa mumaiso ga Faraaho.

¹²Nubwo MUKAMA Ruhanga yagambiire Musa ati: “Gorra omukono gwawe ogwoleke ensi ya Misiri, nukwo haijemu enzige, zinyaake ensi yoona, ziriire kimu ekimera kyona ekyasigirweho orubaale.”

¹³Aho Musa yaimukya omwigo gwe, yagwoleka ensi ya Misiri, MUKAMA Ruhanga yaleeta omuyaga ogwa Buturukaizooba, gwateera nyamusana yoona n'ekiro kyona, obwire kwija kukya, gukaba guleesire enzige.

¹⁴Zaahika omunsi yoona eya Misiri, zaagisweka yoona, enzige enyingi ezitakabonwahoga kandi ezitalibaho.

¹⁵Zikaswekera kimu ihanga lyona, ensi yaijwamu omwirima, zaaliira kimu ebimera byona eby'omunsi egi, n'ebijuma byona eby'emiti ebikaba bisigirwe orubaale. Ensi yoona eya Misiri, etasigarwemu kanyansi, rundi kakoora na kamu, akabisi.

¹⁶Nubwo Faraaho yayesire bwango Musa na Arooni yabagambira ati: “Nsiisire hali MUKAMA Ruhanga wanyu kandi nsiisire hali inywe.

¹⁷Hati mbeesengeriize, munganyire ekibi kyange, murundi gunu gwonka, mwesengereze MUKAMA Ruhanga wanyu, anjune omuhito gunu gwonka.”

¹⁸Musa yaruga omumaiso ga Faraaho yayesengereza MUKAMA Ruhanga.

¹⁹MUKAMA Ruhanga yaleeta omuyaga ogw'amaani ogwa Bugwaizooba, gwaimukya enzige, gwaziseesa omu Nyanja ey'ebitoogo, busaho ruzige na rumu orwasigaire omunsi Misiri.

²⁰Baitu MUKAMA Ruhanga nabwo yagumanganiza omutima gwa Faraaho, tiyaikiriza Abaisirairi kugenda.

²¹Kandi MUKAMA Ruhanga yagambira Musa ati: “Gorra omukono gwawe, ogwoleke iguru, omwirima kasira guteere omunsi, abantu bahumahume.”

²²Musa yagorra omukono gwe, yagwoleka iguru, omwirima kasira gwateera omunsi Misiri, okumara ebiro bisatu,

²³abantu tibaasobora kurorangana, kandi hatabeho n'omu ayasoboire kuruga nambere akaba ali, baitu Abaisirairi nambere bakaba bali, hatabeyo mwirima.

²⁴Faraaho yatuma beete Musa na Arooni yabagambira ati: “Mugende muheereze MUKAMA Ruhanga, mugende n'abaana baanyu, kyonka, amagana ganyu, ag'entaama, ag'embuzi n'ag'ente, gasigale, na itwe.”

²⁵Baitu Musa yagamba ati: “Nangwa, osemeriire otwikirize tutwale ebisoro eby'okutamba n'eby'okuhonga byokeze hali MUKAMA Ruhanga waitu.

²⁶Ente zaitu, nazo tusemeriire kugenda nazo, busaho n'emu eraasigara, habwokuba ezimu hali zo, nitwija kwikozesa kuhereza MUKAMA Ruhanga waitu, kandi titumanyire ekiraatukonyera kuheereza MUKAMA Ruhanga okuhikya obu turaahikayo.”

²⁷Baitu MUKAMA Ruhanga akagumanganiza omutima gwa Faraaho tiyabaikiriza kugenda.

²⁸Nubwo Faraaho yagambira Musa ati: “Ndugaho ogende, oyerinde, ntaligaruka kukurora, ekiro eki ndigaruka kukurorraho, buli wafa.”

²⁹Musa yagarukamu ati: “Eki ogambire kya mazima, toligaruka kundora.”