Read Runyoro - rutooro Kurug 11 Bible Online

Kurug 11 - Runyoro - rutooro bible

Kurug 11

¹MUKAMA Ruhanga yagambira Musa ati: “Nkyasigaize ekifubiro kimu eki ndukwija kuleetera Faraaho na Misiri yoona, nubwo alibalekera mugende, kandi obu, alibalekerra kimu inywena, tihalisigara n'omu.

²Gambira abantu bagende, buli musaija, agende hali omusaija Omunyamiriri anyakumuheriire, n'omukazi, agende hali omukazi Omunyamiriri anyakumuheriire, amusabe amabaale ag'omuhendo, ag'efeeza n'ag'ezaabbu.”

³MUKAMA Ruhanga yaha Abamisiri omwoyo omurungi, ogw'okugonza Abaisirairi, kandi ekindi, Musa ogu, akaba ali muntu mukuru omunsi Misiri, abaheereza ba Faraaho n'abantu boona, baamutamuga ekitiinisa.

⁴Musa yagambira Faraaho ati: “MUKAMA Ruhanga agambire ati: ‘Ekiro omu itumbi, ndaaraba omunsi Misiri,

⁵emizigaijo yoona ey'abantu ba Misiri, na buli kintu kyona ekizigaijo, nikiija kufa, okubaandiza ha muzigaijo gwa Faraaho omukama, okuhika ha muzigaijo gw'omuzaana n'omuzigaijo gw'ebitungwa.

⁶Ensi yoona eya Misiri, eraateera empamo ezitakabahoga kandi ezitaligaruka kubaho.

⁷Baitu omu bantu ba Isirairi n'omu bintu byabo, tihaabeyo kabi, noobwakubaire embwa teehuune, nubwo muraamanya MUKAMA Ruhanga nkooku asoroire Abamisiri hali Abaisirairi.’

⁸Nubwo, abaheereza bawe banu boona, baraija banyinamire, bantemu ekitiinisa nibagamba bati: ‘Ruga hanu ogende, iwe n'abantu bawe boona aboolema.’ Hanyuma y'eki, nubwo ndigenda.” Nubwo Musa yaruga omumaiso ga Faraaho abiihiirwe muno.

⁹MUKAMA Ruhanga yagambira Musa ati: “Faraaho tarukwija kubahurra, obu nubwo ndyongera kukora eby'amahano omunsi Misiri.”

¹⁰Eby'amahano ebi byona, Musa na Arooni bakabikorra mu maiso ga Faraaho, baitu MUKAMA Ruhanga yagumanganiza omutima gwe, tiyaikiriza Abaisirairi kuruga omunsi ye.