Read Runyoro - rutooro Kurug 13 Bible Online

Kurug 13 - Runyoro - rutooro bible

Kurug 13

¹MUKAMA Ruhanga akagambira Musa ati:

²“Mumpongere emizigaijo yoona; ekintu kyona ekizigaijo omu bantu ba Isirairi; eky'abantu n'eky'ebisoro, kyange.”

³Musa akagambira abantu ati: “Mwijukege, ekiro eki mwarugiire Misiri, hamukaba muli bairu. Kinu nikyo ekiro MUKAMA Ruhanga ekiyabaihiire Misiri habw'amaani ge, nahabweki muleke kulya omugaati ogutumbisiibwe.

⁴Kiro kinu, omu kwezi okw'Abbibbu nikyo murugireemu Misiri.

⁵Kandi MUKAMA Ruhanga obwalibahikya omunsi ey'Abakanaani, Abahiiti, Abamooli, Abahiivi, n'Abayebusi, ei yarahiire baisenkuru inywe nkooku mulihaabwa, ensi enungi ijwire amata n'obwoki, muhikirizeege omurwa gunu, omu kwezi kunu.

⁶Mumalege ebiro musanju, nimulya emigaati etatumbisiibwe, kandi ha kiro ekya musanju, habehoga ekiro kikuru eky'obugenyi obw'okutamu MUKAMA Ruhanga ekitiinisa.

⁷Emigaati etatumbisiibwe, niyo eriibwege okumara ebiro musanju. Omuli inywe hatalizookamu omugaati ogutumbisiibwe omunsi yanyu yoona, hatalizookamu ekitumbisa, rundi omugaati ogutumbisiibwe.

⁸Ekiro kikuru obu kiraatandikaga, mugambirege abaana baanyu muti: ‘Kinu nikitwijukya MUKAMA Ruhanga eki yatukoliire, obu twarugire Misiri.’

⁹Ekiro eki, kiraabaga kiijukyo, kirisisana nk'ekintu ekiboherwe ha mukono, rundi ha buso bwanyu; kiraabaijukyaga kwongera kumanya, n'okweza Ebiragiro bya MUKAMA Ruhanga, habwokuba, MUKAMA Ruhanga nuwe yabaihire Misiri; akabaihisaayo obusobozi bwe obutagambwa.

¹⁰Buli mwaka, muhikirizeege ekiragiro kinu, omu kasumi kaakyo akaatairweho.”

¹¹“MUKAMA Ruhanga obu alibahikya omunsi ey'Abakanaani, nkooku yabarahiire, kandi nkooku yarahiire baisenkuru inywe, akagibaha,

¹²mwihiremu MUKAMA Ruhanga emizigaijo yoona. Emizigaijo yoona eyamagana gaanyu, eyerukwetwa mpaya, eraabaga ya MUKAMA Ruhanga.

¹³Omuzigaijo gwona ogw'endogoyi ogucunguzeege omwana gw'entaama, rundi obu muliba mutarukwenda kugucungura, mugumyole ebikya.

¹⁴Kandi omu biro eby'omumaiso, batabani baanyu obu balibakaguza bati: ‘Eki nikimanyisa ki?’ Mubagarukemu muti, “MUKAMA Ruhanga, akatwiha Misiri, omu bwiru, yatwihisaayo obusobozi bwe.

¹⁵Habwokuba, Faraaho obu yayangire kutulekera, MUKAMA Ruhanga akaita emizigaijo yoona eya Misiri, ey'abantu n'ey'ebisoro. Nikyo tutambirra MUKAMA Ruhanga emizigaijo yoona empaya: baitu emizigaijo yoona eya batabani baitu, tugicungura.

¹⁶Okukora muti, karabaaga karorwaho, rundi nk'ekintu ekiboherwe ha mikono, rundi ha buso; kubaijukya, MUKAMA Ruhanga nkooku yabaihire Misiri, n'obusobozi bwe obutagambwa.”

¹⁷Faraaho obu yaikiriize abantu bagende, Ruhanga atabarabye omuhanda ogw'ensi ey'Abafirisiti, noobwakubaire nugwo gukaba guli gwa haihi. Habwokuba, akagira ati: “Abantu banu obu baraarora ngu baina kurwana obulemu, batakuhinduraga ebiteekerezo byabo, bakagaruka Misiri.”

¹⁸Baitu akabeetoorooza, yabarabya omuhanda ogw'irungu, nibeebinga Enyanja ey'ebitoogo. Abantu ba Isirairi bakaruga Misiri baina ebintu by'okurwanisa.

¹⁹Kandi Musa, akatwara amagufa ga Yosefu habwokuba Yosefu akaba arahiize abantu ba Isirairi naagamba ati: “Kiro kimu Ruhanga alyoleka nkooku abarolerra, ha kiro eki, obu muliba nimugenda, mutalisiga amagufa gange.”

²⁰Baayeyongerayo, baaruga Sukosi, baagonya Etamu, ha nsaro y'irungu.

²¹Nyamusana, MUKAMA Ruhanga yabeebemberaga ali omu nyomyo ey'ekicu, nukwo abooleke omuhanda, kandi omu bwire bw'ekiro, yabeebemberaga ali omu nyomyo ey'omurro, kubamulikira nukwo basobole kugenda nyamusana n'ekiro.

²²Nyamusana, enyomyo y'ekicu, kandi ekiro, enyomyo y'omurro, tizababurahoga.