Read Runyoro - rutooro Kurug 14 Bible Online

Kurug 14 - Runyoro - rutooro bible

Kurug 14

¹Hanyuma, MUKAMA Ruhanga akagambira Musa ati:

²Gambira abantu ba Isirairi, bagaruke enyuma, bateere orukande omumaiso ga Pihahiirosi hagati ya Migidoli n'enyanja, haihi na Baalizefoni; muteere orukande eruguru yayo, haihi n'enyanja.

³Habwokuba, Faraaho naija kuteekereza ati: “Abaisirairi nibeenjeera omunsi, irungu libakingiiremu.”

⁴Ninyija kumugumanganiza omutima abahondere enyuma nukwo musingule n'ihe rye lyona, kandi eki, kindeteere ekitiinisa; Abamisiri nukwo baammanye nkooku ndi MUKAMA Ruhanga. Nabo nukwo baakozire bati.

⁵Faraaho omukama wa Misiri obu yagambiirwe ngu Abaisirairi bacwiire, uwe n'abaheereza be, baatunga ekiteekerezo kindi ha bantu abo, baagamba bati: “Mawe kinu tukakora kintu ki, kwikiriza Abaisirairi kuturugaho, bakaleka kutuheereza?”

⁶Nukwo kuteekaniza ekigaali kye, yaramaga n'ihe rye.

⁷Yakomamu ebigaali rukaaga ebirukukira oburungi n'ebigaali ebindi ebya Misiri, byona biina bakuru babyo.

⁸MUKAMA Ruhanga yagumanganiza omutima gwa Faraaho omukama wa Misiri, yahondera Abaisirairi abakaba nibagenda bataina butiini.

⁹Abamisiri, ihe ryona erya Faraaho, abatembi b'enkaina n'ab'ebigaali baabahondera, baabasanga batiire orukande ha rubaju rw'enyanja beesunguswiire Pihahiirosi haihi na Baalizefoni.

¹⁰Faraaho obu yairiire haihi, Abaisirairi bamurora naija, baarora Abamisiri nibaija babahondiire. Baatiina muno; baakunga MUKAMA Ruhanga.

¹¹Kandi baakaguza Musa bati: “Misiri, hakaba hataliyo bituuro ebinyakuziikwamu abantu, nikyo watwihiireyo, twije tufeere omwirungu linu?”

¹²Kinu tinikyo twakugambiire tukyali Misiri tuti: “Oleke tukorre Abamisiri? Habwokuba, kyakubaire kirungi itwe kukorra Abamisiri, okukira kugwa omwirungu linu.”

¹³Musa yabagarukamu ati: “Muleke kutiina mugume, kiro kinu nimwija kurora MUKAMA Ruhanga eki araakora kubajuna; Abamisiri aba murukurora hati, timuligaruka kubarora obundi.

¹⁴MUKAMA Ruhanga naija kubarwanirra, inywe mugume buguma.”

¹⁵MUKAMA Ruhanga yakaguza Musa ati: “Kiki ekirukukutaagisa? Gambira Abaisirairi barubate, bagende omumaiso.

¹⁶Imukya haiguru omwigo gwawe, ogorre omukono gwawe ha nyanja, ogibaganizemu habiri, Abaisirairi bagyambuke nibarubata haitaka eryomere.

¹⁷Ninyija kugumanganiza emitima y'Abamisiri, nabo babahondere, kandi abantu baraampa ekitiinisa habw'okusingura Faraaho n'ihe rye lyona.

¹⁸Obu ndaamara kusingura Faraaho, n'abasaija be aba ha mbaraasi, n'abatembi b'ebigaali, nubwo Abamisiri baraamanya nkooku nyowe ninyowe MUKAMA Ruhanga.”

¹⁹Nubwo malaika wa Ruhanga ayayebeemberaga ekitebe kya Isirairi yarugire omumaiso yagaruka enyuma yabo.

²⁰Yagya hagati y'Abamisiri n'Abaisirairi. Ekicu kyazaara omwirima; obwire bwakya hataroho kitebe ekirozire ekindi.

²¹Nubwo Musa yagorra omukono gwe ha nyanja; MUKAMA Ruhanga yaleeta omuyaga ogw'amaani ogwa Burugaizooba, gwateera ekiro kyona, gwabaganizamu habiri amaizi g'enyanja, haabamu omuhanda ogw'itaka eryomere.

²²Abantu ba Isirairi baagwerra omu nyanja nibarubata ahoomere, amaizi gali nk'ekisiika ha rubaju rwabo orw'obulyo n'orw'emoso.

²³Abamisiri baabahondera baagwerra omu nyanja hagati babahondiire, ihe lyona erya Faraaho, abatembere embaraasi n'abarukugendera omu bigaali.

²⁴Emamba obu ekaba eri haihi kusara, MUKAMA Ruhanga ali omu nyomyo y'omurro n'ey'ekicu yarora Abamisiri yabaleetera obutiini,

²⁵yaboha enyamuziga ez'ebigaali byabo, baalemesibwa kugenda omumaiso; baagamba bati: “Twiruke, turuge hanu, MUKAMA Ruhanga naabarwanirra, naarwanisa itwe Abamisiri.”

²⁶Nubwo MUKAMA Ruhanga yagaambiire Musa ati: “Gorra omukono gwawe ha nyanja, nukwo amaizi gagaruke gamire Abamisiri abanyakutembere ebigaali n'abo abatembere embaraasi.”

²⁷Nubwo, Musa yagorra omukono gwe ha nyanja, obwire obu bukaba nibugenda kukya, enyanja yagaruka nambere ekaba erugire, Abamisiri baatandika kwiruka nibaatangatangana nayo, MUKAMA Ruhanga yabanaga omu nyanja hagati yabahwerekereza.

²⁸Amaizi gaamira ihe ryona erya Faraaho: abatembi b'ebigaali n'abatembi b'embaraasi abakaba bahondiire Abaisirairi omu nyanja; ha bantu abaingi abo boona, busaho n'omu ayasigaireho.

²⁹Baitu Abaisirairi baayambuka enyanja nibarubata ha itaka eryomere, amaizi gali nk'ekisiika ha rubaju rwabo orw'obulyo n'orw'obumoso.

³⁰Kiro eki, MUKAMA Ruhanga nukwo yajunire ati Abaisirairi, yabaiha omu bulemi bw'Abamisiri; Abaisirairi baarora emitumbi y'Abamisiri egaraamiriire ha Musa gw'enyanja.

³¹Abaisirairi obu baarozire obusobozi MUKAMA Ruhanga obu ayolekere omu kurwanisa Abamisiri, abantu boona baatiina MUKAMA Ruhanga, bamwikiriza, hamu na Musa omuheereza we.