Read Runyoro - rutooro Kurug 16 Bible Online

Kurug 16 - Runyoro - rutooro bible

Kurug 16

¹Ekitebe kyona ekya Isirairi, kyaimukya kyaruga Elimu, kyahika omwirungu lya Siini, erinyakuli hagati y'Elimu na Sinai, ha kiro ekya ikumi na bitaano eby'okwezi kwa kabiri, bamazire kuruga omunsi Misiri.

²Obu bakaba bali omwirungu, ekitebe kyona ekya Isirairi, baatontorromera Musa na Arooni,

³nibagamba bati: “Kakuba MUKAMA yatwitiire Misiri. Haakiri oku twaikaraga nitulya enyungu z'enyama, n'ebyokulya nitwiguta; eki watwihiireyo nukwo kutuleeta omwirungu linu kutwisa enjara.”

⁴Nubwo MUKAMA Ruhanga yagambira Musa ati: “Okuruga hati, ninyija kubanagiraga ebyokulya ebirukuruga omwiguru, abantu baraagendaga basorooze ebyokulya eby'ekiro kimu, nukwo mbalenge ndole, obu baraaba nibasobora kuhondera ebiragiro byange rundi tibarukusobora.

⁵Ha buli kiro kya mukaaga, obu baraabaga nibasorooza ebyokulya, basoroozege, bakizeeho emirundi ebiri ebi basorooza buli kiro.”

⁶Nubwo, Musa na Arooni baagambira Abaisirairi boona bati: “Nimwija kumanya MUKAMA Ruhanga nkooku ali nuwe yabaihire Misiri.

⁷Kandi nyenkya, muraarora ekitiinisa kya MUKAMA habwokuba ahuliire nkooku murukumuhyemera, muleke kugira nimuhyemera itwe; itwe, niitwe baha aba murukutontorromera?”

⁸Musa yagamba ati: “Orwebagyo, MUKAMA araabahaga enyama ey'okulya, na nyenkya abahe ebyokulya ebirukumara. Ekirukumukozesa eki, habwokuba ahuliire okutontorroma kwanyu oku murukutontorromera itwe. Mutagira nimuhyemera itwe, baitu nimuhyemera MUKAMA.”

⁹Musa yagambira Arooni ati; “Gambira ekitebe kyona eky'Abaisirairi ngu: ‘bairre haihi omumaiso ga MUKAMA habwokuba ahuliire okutontorroma kwabo.’ ”

¹⁰Arooni obu akaba nakyabaliza ekitebe eky'abantu ba Isirairi, baimukya amaiso haiguru, aho ekitiinisa kya MUKAMA kyazooka omu kicu.

¹¹MUKAMA Ruhanga yagamba Musa ngu:

¹²“Okutontorroma kw'Abaisirairi nkuhuliire; bagambire oti: ‘Omu kairirizi, baralya enyama, kandi nyenkya, balye ebyokulya baigute, obu nubwo baraamanya nkooku ndi MUKAMA Ruhanga wabo.’ ”

¹³Orwebagyo, haija endahi zaijura orukande, kandi nyenkya, hagwa orume rwayehinguliriza orukande.

¹⁴Orume obu rwakire, baarora ha ruguru y'obunyansi obw'irungu eri, obuntu oburungi obutoito oburukusisana orume bugwire hansi.

¹⁵Abaisirairi obu baarozire obuntu obu, baakaguzangana bati: “Bunu buki?” Habwokuba bakaba batabumanyire. Musa yabagambira ati: “Ebi nibyo byokulya MUKAMA Ruhanga ebi abahaire kulya.

¹⁶Kinu nikyo MUKAMA aragiire naagamba ati: ‘Buli omu omuli inywe, asorooze maanu nyingi ei asobora kulya akaiguta, buli muntu asorooze ekiihuro kinu, ekirukumara abantu abanyakuli omu ka ye.’ ”

¹⁷Abaisirairi nukwo baakozire; abamu baasorooza bingi, abandi bike.

¹⁸Obu babirengere, omu ndengo, omuntu ayasoroize ebingi atasagiseeho, kandi ogu ayasoroize ebike akasanga aina ebikumumara. Buli muntu akasorooza orulengo rw'ebyokulya ebi asobora kulya akaiguta.

¹⁹Musa yabagambira ati: “Buli muntu abirye abimale, hatabaho ayayahuraho, ngu binu ndaabirya nyenkya.”

²⁰Baitu batahikiriize Musa eki yabagambiire, abamu baayesigiraho ebyokulya ebya nyenkya, ekyarugiremu, byagaga, byazaara enzito, Musa yababiihirirwa.

²¹Ebyokulya ebi, baabisoroozaga buli kiro omu bwire bwa nyenkya, buli muntu yasoroozaga ebi akusobora kulya akaiguta, omusana obu gwasarraga nibihwerra.

²²Ha kiro ekya mukaaga, abantu baasoroozaga ebyokulya babikizaaho emirundi ebiri, buli muntu yasoroozaga orulengo orw'ebiro bibiri. Abeebembezi b'abantu, baagenda baagambira Musa, uwe yabagarukamu ati:

²³“Kinu nikyo MUKAMA Ruhanga yaragiire ati: ‘Nyenkya kiro kikuru ky'okuhuumura, Sabbato erukwera ya MUKAMA Ruhanga, mwokye ebi murukugonza kwokya, mucumbe ebi murukugonza kucumba, ebisigaireho, mubyahule, biraalibwa kiro kya nyenkya.’ ”

²⁴Baabyahura okuhikya ha kiro kya nyenkya nkooku Musa yabaragiire, tibyagaga kandi tibyazaara nzito.

²⁵Musa yabagambira ati: “Hati mubirye, habwokuba kiro kinu, Sabbato ya MUKAMA, timurukwija kusanga ebyokulya omu bwerre.

²⁶Omu biro mukaaga, muraasoroozaga ebyokulya, baitu ha kiro ekya musanju, niyo Sabbato, tibyabeyoga.”

²⁷Ha kiro ekya musanju, abantu abamu baagenda kusorooza, baitu tibaabisangayo.

²⁸MUKAMA yakaguza Musa ati: “Mulihikya nkaha kwanga kukwata ebiragiro byange ebi nataireho?

²⁹Murole, MUKAMA akabaha Sabbato, habwokuba ha kiro kya mukaaga, MUKAMA abaha ebyokulya eby'ebiro bibiri, buli muntu aikale omu kiikaro kye.”

³⁰Kiro kya musanju, abantu tibaakora mulimo, kyaaba kiro ky'okuhuumura.

³¹Abaisirairi, ebyokulya ebi baabyetaga maanu, ekaba neesisana obujuma bw'enjagi, neeyera, neenura nk'otugaati otunyakucumbisiibwe otukozirwe obwoki.

³²Musa yabagambira ati: “Kinu nikyo MUKAMA Ruhanga aragiire ngu: ‘Mwahule endengo emu, mugyahule okumara ebiro bwanyu byona nukwo abaijukuru baanyu, balirora ebi yabaliisize omwirungu, obu yabaihaga omunsi Misiri.’ ”

³³Musa yagamba Arooni ati: “Kwata ebibindi, otemu endengo emu eya maanu, ogite omumaiso ga MUKAMA ikaleyoga ebiro banyu byona.”

³⁴Arooni yagita omumaiso g'esanduuko ey'endagaano, ikaleyo, nkooku MUKAMA Ruhanga akaba aragiire Musa.

³⁵Abaisirairi baalya maanu, okumara emyaka makumi ana, okuhikya obu baahikire omunsi eyaikarwamuga abantu, bakalya maanu okuhikya ha mutaano ogw'ensi ya Kanaani.

³⁶Ekiihuro eky'Abaisirairi baragiirwe kusorooza habwa buli muntu kyainganaga nka kiloguraamu ibiri.