Read Runyoro - rutooro Kurug 17 Bible Online

Kurug 17 - Runyoro - rutooro bible

Kurug 17

¹Ekitebe kyona eky'Abaisirairi kyairrayo, kyaruga omwirungu erya Siini, baagenda nibagoonya nkooku MUKAMA Ruhanga akaba abaragiire. Baateera orukande Refidimu, aho hatabeho maizi agabantu kunywa.

²Abantu nukwo kuhyemera Musa nibagamba bati: “Tuhe amaizi g'okunywa.” Musa yabakaguza ati: “Nimunkunganirizaaki? Nimulengera ki MUKAMA?”

³Abantu baayeyongera kukwatwa muno iroho, baatontorromera Musa baamukaguza bati: “Kiki eki watwihiire Misiri kwija kutwisa iroho, itwe n'abantu baitu, n'ente zaitu?”

⁴Nubwo Musa yataagira MUKAMA naagamba ati: “Abantu banu ndaabagira nta? Bali haihi kunteera amabaale.”

⁵MUKAMA yagarukamu Musa ati: “Genda orabe omumaiso g'abantu oina abamu ha bakuru ba Isirairi; ogende okwasire omwigo guli, ogu watiize ekyambu Nairo.

⁶Ninyija kwemerra omumaiso gawe, haihi n'omwandara ogwa Holebbu; iwe oteere omwandara, nigwija kurugwamu amaizi, nukwo abantu banywe.”

⁷Musa eki akakikora Abaisirairi boona bamuroleriire. Musa ekikaro eki, yakiruka ibara Masa (amakuru gaakyo kulenga) na Meriba (amakuru gaakyo kukungana), habwokuba Abaisirairi bakakunganiza Musa kandi baalenga MUKAMA nibagamba bati; “MUKAMA ali na itwe rundi nangwa?”

⁸Nubwo haizire Abaamaleki baarwana n'Abaisirairi, omu kiikaro Refidu.

⁹Musa yagambira Yoswa ati: “Tukomeremu abasaija, mugende murwanise Abaamaleki; kiro kya nyenkya, ndaayemerra ha mutwe gw'akasozi, nkwasire omwigo gwa Ruhanga.”

¹⁰Nubwo Yoswa yakora nkooku Musa yamuragiire, yarwana n'Abaamaleki; Musa, Arooni na Hura, baatemba ha mutwe gw'akasozi.

¹¹Akasumi koona Musa aka yamaraga aimukize haiguru omukono gwe, Isirairi yabingaga, akasumi koona aka yamaraga agugarwire hansi, Abaamaleki baabingaga.

¹²Baitu emikono ya Musa yateba, abantu nukwo kumuleetera ibaale, yaliikarraho. Arooni na Hura, baabangirra emikono ye, omu, ha rubaju orumu, n'ondi ha rubaju orundi; emikono ye tiyagaruka kuteba okuhikya izooba obu lyagwire.

¹³Yoswa yatematema Abaamaleki n'empirima.

¹⁴MUKAMA yaragira Musa naagamba ati: “Ebigambo binu obihandiike omu kitabu, abantu baikalege nibabiijuka. Ogambire Yoswa nkooku ndihwerekereza Abaamaleki bataligaruka kwijukwa omunsi.”

¹⁵Musa yayombeka itambiro, yaliruka ibara: MUKAMA nuwe Bendera yange.

¹⁶Naagamba ati: “Ninyimukya ebendera ya MUKAMA. MUKAMA ararwanisaga Abaamaleki ebiro byona.”