Read Runyoro - rutooro Kurug 18 Bible Online

Kurug 18 - Runyoro - rutooro bible

Kurug 18

¹Yesero nyakatagara wa Midiani, isezaara Musa, akahurra byona ebi Ruhanga yakoliire Musa n'Abaisirairi abantu be, kandi nkooku MUKAMA yaihire Abaisirairi omunsi Misiri.

²Omu kasumi ako, Yesero isezaara Musa, yatwara Zipora muka Musa, yamugarra omwa iba, habwokuba iba akaba amubingire na batabani be babiri.

³Omu hali bo, ibara lye nuwe Geresomu, (eki yamurukiire ibara eri, habwokuba akagamba ati: “Mbaire ndi munyaihanga omunsi etali y'owaitu.”)

⁴Ibara ly'owa kabiri, nuwe Eryeeza habwokuba akagamba ati: “Ruhanga wa isenyowe, nuwe yankonyiire, yantabura empirima ya Faraaho.”

⁵Yesero isezaara Musa akaija n'abatabani ba Musa, na muka Musa, yasanga Musa omwirungu, ha Rusozi rwa Ruhanga, nambere akaba atiire orukande.

⁶Omuntu omu obu yamanyisize Musa ati: “Sozaara ngunu aizire kukurora, aina mukazi wawe na batabani bawe babiri.”

⁷Musa yaturuka yagya kutangirra isezaara, yainama muno yamugwa omu kifuba; baaramukyangana, baataaha omu Heema.

⁸Nubwo Musa yasoboorra isezaara ebi byona MUKAMA yakozire Faraaho n'Abaamisiri habw'Abaisirairi, yamutendera obulemeezi bwona obwabagweriire bali omu muhanda, kandi nkooku MUKAMA yabubajunire.

⁹Yesero yasemererwa muno habw'okuhurra ebirungi byona ebi MUKAMA ebi yakoliire Abaisirairi, n'eky'okubajuna okubaiha omu mikono y'Abaamisiri.

¹⁰Yesero yagamba ati: “MUKAMA akugizibwe ayabajunire yabaiha omu busobozi bw'Abanyamisiri na Faraaho.

¹¹Hati namanya MUKAMA nkooku ali mukuru okukira embandwa zoona, habwokuba akajuna abantu be yabaiha omu busobozi bw'Abaamisiri abaabeehemberahoga.”

¹²Yesero isezaara Musa yahongera ekihongwa ekyokeze n'ebyonzira ebindi, Arooni n'abakuru ab'enganda eza Isirairi baija kulya ebyokulya na Yesero isezaara Musa, bali omumaiso ga Ruhanga.

¹³Obwire obu bwakiire, Musa yaikarra kucwera abantu emisango, abantu baayemerra bamwehinguliriize okuruga nyenkya okuhikya orwebagyo.

¹⁴Isezaara Musa obu yarozire byona ebi Musa arukukorra abantu, yakaguza ati: “Eki, eky'orukukora abantu kiki? Habwaki oikarra wenka, abantu bakeemerra bakwehinguliriize okuruga nyenkya okuhikya orwebagyo?”

¹⁵Musa yagarukamu isezaara ati: “Abantu baija nambere ndi kunkaguza ebya Ruhanga,

¹⁶obu baba n'empaka, baija nambere ndi mbacweremu, mbamanyisa ebiragiro bya Ruhanga ebi yataireho.”

¹⁷Isezaara Musa yamugarukamu ati: “Eki orukukora tikirukuhika.

¹⁸Noija kwejwahya ojwahye n'abantu bawe, omulimo orukukora gukuhinguraine, torukusobora kugukora wenka.

¹⁹Hati, leka nkuhe amagezi kandi Ruhanga aikale na iwe. Oraakuratiraga abantu hali Ruhanga, omuhikyeho ebigambo byabo.

²⁰Obeegesege ebiragiro bye ebi yataireho kandi obooleke omuhanda ogu basemeriire kurabamu n'ebintu ebi basemeriire kukora.

²¹Ekindi, omu bantu okomemu abasaija ab'amagezi, abarukutiina Ruhanga, abarukwesigwa, abatagonza kulya nguzi. Abantu abo, obahe okurolerra abantu abandi, baleme ebitebe by'abantu: enkumi, ebikumi, amakumi ataano, na ikumi.

²²Abo nubo baikalege nibacwera abantu emisango, baitu iwe bakuleeterege ebintu eby'amaani byonka, ebike, babicwemuga bonka; aho omulimo guraakwanguhira, nukwo mubagane obulemeezi.

²³Obu oraakora eki, na Ruhanga akakwoleka ati, nubwo olisobora kugumira omulimo ogu, kandi abantu abo boona baligaruka owabo bo n'obusinge.”

²⁴Nubwo Musa yahurra byona ebi isezaara yamugambiire, yakora byona ebi yagambire.

²⁵Musa yakoma abantu ab'amagezi, yabaiha omu Baisirairi, yabafoora bakuru ab'okurolerra abantu, babe balemi ab'okulema emitwe y'abantu enkumi, ebikumi, amakumi ataano, na ikumi.

²⁶Abantu abaakomerwe baikara nibacwera abandi emisango, ey'amaani yonka niyo baatwarraga Musa, baitu obusango obukebuke bwona, baabumaraga bonka.

²⁷Nubwo Musa yaraga isezaara agende, isezaara yagaruka omunsi y'owabo.