Read Runyoro - rutooro Kurug 19 Bible Online

Kurug 19 - Runyoro - rutooro bible

Kurug 19

¹Okwezi okwa kasatu, Abaisirairi barugire omunsi Misiri, ha kiro eki kyonyini nubwo bahikire omwirungu lya Sinai.

²Abaisirairi obu baarugire Refidimu, baateera orukande omwirungu, omumaiso g'orusozi Sinai.

³Musa yatemba ha rusozi hali Ruhanga, MUKAMA yayema omu rusozi, yayeta Musa yamugambira ati; “Genda ogambire Abaisirairi, baijukuru ba Yakobbo, oti:

⁴Murozire ebi nkozire Abaamisiri, kandi inywe nkooku mbaheekiire ha mapapa nk'isamba nabeereetera.

⁵Nahabweki okuruga hati, obu muraahurra eki ndukugamba, mukahikiriza endagaano yange, muliba bantu bange bweremera omu bantu boona, habwokuba ensi yoona yange.

⁶Hali nyowe, muliba bukama bwa banyakatagara kandi ihanga erirukwera, ebigambo ebi, nibyo ogende ogambire Abaisirairi.”

⁷Kandi, Musa yaija yasorooza bakuru b'abantu, yabagambira ebigambo ebi MUKAMA yamuragiire.

⁸Abantu boona baagarukiramu hamu bati: “Byona MUKAMA ebi agambire, turaabikora.” Musa, ebigambo by'abantu, yabirangira MUKAMA.

⁹MUKAMA yagambira Musa ati: “Ninyija nambere oli, ndi omu kicu ekinyakukwasire, nukwo abantu basobole kuhurra, obu ndaaba nimbaza na iwe, kandi bakwikirize ebiro byona.” Nubwo, Musa na uwe yagambira MUKAMA ebigambo by'abantu.

¹⁰MUKAMA yaragira Musa ati: “Genda oyete abantu, kiro kya hati na nyenkya, obagambe boogye eby'okujwara byabo.

¹¹Kandi ha kiro kya kasatu, nikyo MUKAMA alisirimukiraho, aije ha rusozi Sinai, abantu boona nibarora.

¹²Olibooleka ha balyemerra bakagarukira, obagambire ngu: ‘Mutalitemba mukahika ha rusozi, rundi kukwata orusozi ha rutandikira. Weena alikwata ha rusozi, aliitwa.

¹³Hatalibaho muntu ow'alikwataho, alirukwataho, aliterwa amabaale rundi aliraswa. Obu kiriba kisoro rundi ali muntu, talyomeera.’ Engwara obu erigamba, abantu bairre haihi n'orusozi.”

¹⁴Musa yasirimuka orusozi, yaija nambere abantu bali, yabeeza, baayogya eby'okujwara byabo.

¹⁵Yabagambira ati: “Ekiro kya kasatu, kibasange mweteekaniize, mutairra haihi omukazi weena.”

¹⁶ Ha kiro ekya kasatu nyenkya, enkuba zaabbwatuka, haabaho emirabyo, haazooka ekicu ekikwasire kiri ha mutwe gw'orusozi, engwara yagamba n'iraka ery'amaani abantu boona abakaba bali omu rukande, baakankana.

¹⁷Nubwo Musa yaiha abantu omu rukande baije kutangatangana Ruhanga baayemerra hansi y'orusozi.

¹⁸Orusozi Sinai rukaba ruswekerwe omwika, habwokuba MUKAMA akarusirimukaho, ali omu murro. Omwika ogwarugahoga gwasisanaga ogw'ekikoomi; orusozi rwona rwatengeeta muno.

¹⁹Engwara obu yagendaga neeyeyongera kugamba n'amaani, Musa abaza, Mukama amugarukamu omu nkuba.

²⁰MUKAMA yasirimuka ha rusozi Sinai, yayeta Musa aije ha mutwe gw'orusozi. Musa yatemba ha rusozi.

²¹MUKAMA yagambira Musa ati: “Sirimuka ohabule abantu batagaruka bakaruga ha beemeriire kulinguza MUKAMA abaingi omuli bo tibaikara kuhwerekerra.

²²Kandi banyakatagara abanyakwirra haihi MUKAMA beeyeze, taikara kubabiihirirwa akabaita.”

²³Musa yagambira MUKAMA ati: “Abantu tibasobora kutemba rusozi Sinai, habwokuba iwe wenka, niiwe waturagiire noogamba oti: Orusozi, muruteho emitaano, abantu ha baraayemeerra bakagarukira, kandi murweze.”

²⁴MUKAMA yamugarukamu ati: “Sirimuka ogende, kandi ogaruke hanu, hamu na Arooni, otaikiriza banyakatagara n'abantu kutambuka omutaano, bakatemba MUKAMA nambere ali, taikara kubabiihiririrwa akabaita.”

²⁵Nubwo, Musa yasirimuka orusozi, yahikaho abantu yabagambira ebigambo ebi.