Read Runyoro - rutooro Kurug 2 Bible Online

Kurug 2 - Runyoro - rutooro bible

Kurug 2

¹Omusaija ow'oruganda rwa Leevi akaswera omu ha baijukuru ba Leevi.

²Omukazi yatwara enda, yazaara omwana omwojo; obu yaboine nkooku ali mwana murungi muno, yamusereka okumara ameezi asatu.

³Obu yaboine atakyasobora kwongera kumusereka yamuserurra ekigega ekinyakurukirwe omu bifunjo, yakihoma n'ibumba, yakisiiga orweju; yakitamu omwana, yakita omu rugoro, ha mwegeego gw'ekyambu Nairo.

⁴Munyanya omwana akeemerra haraho, arole ekiraamubaho.

⁵Omu kasumi ako, muhara wa Faraaho yaija kwoga ha kyambu, abazaana be baikara nibarubatarubata haihi n'ekyambu; muhara wa Faraaho yarora ekigega kiri omu rugoro, yatuma omu ha bazaana be akireete.

⁶Obu yakifundukwire, yasangamu omwana narra. Yamugirra embabazi yagamba ati: “Onu omu ha baana Abahebburaayo.”

⁷Nubwo, munyanya omwana yakaguza muhara wa Faraaho ati: “Ngende omu bakazi Abahebburaayo nkwihireyo omukazi ow'araamulera?”

⁸Muhara wa Faraaho yamuragira ati: “Genda.” Omwisiki yagenda yayeta nyina omwana.

⁹Muhara wa Faraaho yaragira omukazi ogu ati: “Omwana onu, mutwale omunderre, ndikuha empeera.” Nubwo, omukazi yatwara omwana yamulera.

¹⁰Omwana obu yakuzire, yamugarurra muhara wa Faraaho yaba mwana we. Muhara wa Faraaho yamuruka ibara Musa, habwokuba akagamba ati: “Nkamwiha mu maizi.”

¹¹ Musa obu yakuzire, kiro kimu, akagenda kubungira abantu ab'ihanga lye, yarora nkooku bali ha muhito; yarora Omunyamisiri naateera Omuhebburaayo, omu ha bantu ab'ihanga lye.

¹²Yamagamaga kunu n'oku, obu yaboine hataroho muntu n'omu, yaita Omunyamisiri, yamusereka omu musenyi.

¹³Obu yagarukireyo kiro kindi, yarora Abahebburaayo babiri nibarwana. Yakaguza omuntu ayakozire kubi ati: “Mutaahi wawe noomutura ki?”

¹⁴Omusaija yamugarukamu ati: “Nooha ayakuhaire obusobozi obw'okutulema n'okutucwera emisango? Nooyenda kunyita nkooku waisire Omunyamisiri?” Nubwo Musa yatiina, yagamba ati: “Mazima kwo, ekintu eky'okwita omuntu, kimanyirwe boona”.

¹⁵Faraaho obu yahuliire Musa nkooku aisire omuntu, yacwa amagezi ag'okumwita. Musa yairukaho Faraaho, yagenda kwikara omunsi Midiani.

¹⁶Musa obu akaba aikaliire haiziba rubaju, abaisiki musanju, bahara ba nyakatagara owa Midiani, baija kutaha amaizi, baijuze amaato, beesere amagana ga ise bo.

¹⁷Abaliisa abandi baija baababinga; baitu Musa yaimuka yabarwanirra, yabeseerra amagana gaabo.

¹⁸Obu baataahire omu ka, isebo Rweri yabakaguza ati: “Leero hati, mwanguhire muta?”

¹⁹Baamugarukamu bati: “Haroho Omunyamisiri anyakutujunire abaliisa, yatutahira amaizi, yatweseerra amagana gaitu.”

²⁰Yakaguza bahara be ati: “Omusaija ogu ali nkaha? Kiki ekimubasigisizeyo? Mumwete aije alye ebyokulya.”

²¹Musa yaikiriza kwikara n'omusaija ogu, kandi omusaija ogu, yamuha muhara we Zipora amuswere.

²²Zipora yazigaija omwana omwojo, Musa yamuruka ibara Geresomu; habwokuba akagamba ati: “Mbaire ndi munyaihanga omunsi etali y'owaitu.”

²³Obu haahingwireho emyaka nyingi, omukama wa Misiri yafa. Abantu ba Isirairi baasinda muno nibasalizibwa obwiru. Baataaga, nibaserra ow'okubakoonyera. Habw'okusaalizibwa obwiru, okutaaga kwabo,

²⁴Ruhanga yahurra okutaaga kwabo, yaijuka endagaano ei yaragaine na Abburahamu, Isaaka, na Yakobbo.

²⁵Yarora abantu ba Isirairi, yamanya obujune bwabo.