Read Runyoro - rutooro Kurug 21 Bible Online

Kurug 21 - Runyoro - rutooro bible

Kurug 21

¹Ruhanga yagambira Musa ati: Binu nibyo biragiro ebi oliteeraho Abaisirairi.

²Obu oligura omwiru Omuhebburaayo, akole okumara emyaka mukaaga, omu mwaka ogwa musanju, asobora kugenda, aba atakyaina eki arukusasura.

³Obu aliba yaizire ali omu, agende ali omu; obu aliba yaizire na mukazi we agende na mukazi we.

⁴Kakuba mukama we amuha omukazi, omukazi ogu akamuzarra abaana, aboojo rundi abaisiki, omukazi n'abaana baraabaga bantu ba mukama we, omusaija agende wenka nkooku yaizire.

⁵Baitu omwiru kakuba agamba bbwa ati: “Ningonza mukama wange, mukazi wange n'abaana bange, tindukwenda kuruga omu bwiru,”

⁶mukama we alimuleeta omumaiso ga Ruhanga amuhikye ha rwigi, rundi ha biti by'emiryango. Mukama we nubwo alimudubura okutu n'orukatu, okuruga obu, aikale ali mwiru we ebiro byona.

⁷Omuntu obu atunda muhara we kuba muzaana, omuzaana ogu taikirizibwa kuruga omu ka nkooku abairu bakora.

⁸Omuzaana ogu, mukama we obu aliba atarukuteerana na uwe, habwokuba tarukumusemerra, obu amwikirize bamucungule; mukama we tarukwikirizibwa kumuguza abanyamahanga, habwokuba obu, naaba amukozire kubi.

⁹Kakuba aba amukomiire omutabani, amutwale nkooku atwara muhara we.

¹⁰Kakuba aswererra omutabani omukazi ondi, ow'okubanza, atalimukeehyaho ebyokulya, eby'okujwara n'okumwarra n'emirimo y'obuswere.

¹¹Kakuba atamukorra ebintu ebisatu ebi, omuzaana ogu asobora kugenda, atarukusabwa kusasura sente n'emu.

¹²Weena anyakuteera omuntu akamwita, na uwe, aitwe.

¹³Baitu obu aliba atamweserekeriire, bakarwana omu kurwana okwa butoosa akafa, akamugwaho habw'obutandwa, ka mbooleke ekiikaro eki asemeriire kwirukiramu akesereka.

¹⁴Baitu omuntu kakuba aseesira mutaahi we kumwita omu bugobya, mumwihe omu itambiro lyange, agende aitwe.

¹⁵Weena anyakuteera ise rundi nyina, asemeriire kwitwa.

¹⁶Weena anyakwiba omuntu akamutunda rundi akamutunga, asemeriire kwitwa.

¹⁷Weena anyakukondereza ise rundi nyina, asemeriire kwitwa.

¹⁸Kakuba abantu bakungana, omu akateera mutaahi we ibaale rundi akamuteera entomi, kiteerwa akalema kufa baitu akazingikwa ha kitabu,

¹⁹kakuba atega akeemerra, akatandika kugendera ha mwigo, kiteera ogu, taabege na musango. Kyonka asasule habw'akasumi oli akayamazire ha kitabu, kandi asasule sente zoona ezaamurwaize, okuhikya akizire.

²⁰Omuntu kakuba ateera omwiru we rundi omuzaana we, akamuteeza omwigo, omwiru rundi omuzaana akagwerekeera, asemeriire afubirwe.

²¹Baitu omwiru rundi omuzaana kakuba amaraho ekiro kimu rundi bibiri atakafiire, omuntu ogu tasemeriire kufubirwa, habwokuba akamuguza sente ze.

²²Abasaija kakuba barwana, omu hali bo akahuumira omukazi aina enda, enda ekarugamu, hateeyongiire kubaho akabi kandi, omusaija ayamuhuumiire asemeriire kuleha kyona iba omukazi eki araamucwera, baitu nasigikira nkooku abacwi b'emisango bacwire.

²³Kakuba heeyongera kubaho akabi akandi, ekifubiro kirabaga ky'amaani; omwisi na uwe aitwe.

²⁴Eriiso lirehwe eriiso, eriino lirehwe eriino, omukono gulehwe omukono, ekigere kirehwe ekigere;

²⁵anyakwokeze ondi, na uwe bamwokye, anyakuhutaize ondi, na uwe ahutaazibwe, anyakutiire omuntu ekifufu, na uwe ateerwe ekifufu.

²⁶Omuntu kakuba ateera omwiru we rundi omuzaana we, akamwihamu eriiso, aleke omwiru rundi omuzaana ogu ayetwale nkooku arukwenda, egi niyo ndehwa ey'eriiso lye.

²⁷Kakuba amwiha eriino, omwiru rundi omuzaana ayetwale nkooku arukwenda, egi niyo ndehwa ey'eriino lye.

²⁸Ente kakuba ecumita omuntu, omusaija rundi omukazi, ekamwita, ente egi esemeriire eterwe amabaale, kandi enyama yayo ereke kuliibwa, baitu mukama w'ente taabege na musango.

²⁹Baitu ente egi, obu eraaba esangwa ecumita, eki mukama wayo bakakimugambira, baitu yalema kugirinda, obu eriita omuntu, abe musaija rundi mukazi, ente egi eterwe amabaale kandi mukama wayo, na uwe aitwe.

³⁰Kakuba acwerwa kuleha alehe kyona eki acwerirwe, baitu akize obwomeezi bwe.

³¹Ente egi kakuba ecumita, ekaita omwana w'omuntu ondi, omwojo rundi omwisiki, mukama w'ente egi afubirwe nkooku ekiragiro kirukuragira.

³²Kakuba ente ecumita omwiru w'omuntu rundi omuzaana we, ekamwita, mukama wayo asemeriire kusasura mukama w'omwiru rundi mukama w'omuzaana, ebicweka by'efeeza makumi asatu, kandi ente eterwe amabaale.

³³Kakuba omuntu aleka embiso eyesamiriire, rundi kakuba alima obuhya akabuleka atabuswekere, ente rundi enkaina y'omuntu ekagwa omu mbiso rundi omu buhya obu,

³⁴mukama w'embiso rundi ow'obuhya obu, alehere mukama w'ekisoro ekinyakufiire, uwe atwale omutumbi.

³⁵Kakuba ente y'omuntu ehutaaza ey'ondi, hanyuma ekafa, abantu abo bombi, batunde egi enyomeezi, omuhendo ogunyakugirugiremu, bagwinganize, kandi ente enyakufiire, bagibagane orusinga.

³⁶Ente egi, obu eraaba emanyirwe ngu esangwa ecumita ezindi, baitu mukama wayo yalema kugirinda, ente enyakufiire agirehemu ente endi, uwe atwale enyakufiire.