Read Runyoro - rutooro Kurug 22 Bible Online

Kurug 22 - Runyoro - rutooro bible

Kurug 22

¹Kakuba omuntu aiba ente rundi entaama, akagiita rundi akagiguza eri nyomeezi, ente emu, agirehemu ente itaano, kandi entaama emu, agirehemu entaama ina.

²Asemeriire kuleha, baitu obu araaba atanyina kintu eky'okuleha, atundwe habw'obusuma bwe. Kakuba ekisoro eki aibire asangwa nakyo kikyali kyomeezi, obu eraaba eri nte rundi nkaina rundi ntaama, agirehe emirundi ebiri.

³Kakuba omusuma akwatwa naacwa enju omu bwire bw'ekiro bakamuteera akafa, busaho ow'arukujunaanwa habw'okuseesa esagama ye.

⁴Baitu kakuba aitwa obwire bumazire kukya, anyakumwisire ajunaanwe.

⁵Kakuba omuntu ayonesa omusiri gw'omuntu ondi, rundi kakuba aliisiza omu rugonjo rwe, rundi akasibura ekisoro kye kikoona omusiri gwe, akwate ebibyarwa ebirukukira oburungi ebi ayereze omu musiri gwe, rundi omu rugonjo rwe, abirehere mukama w'omusiri ogunyakwonerwe.

⁶Kakuba omusaija acumika oruhiira rukokya irungu, rukarabamu rukahika mumusiri gw'omuntu ondi rukookeza kimu entuumo y'engano enyakugesirwe, rundi enyakwemeriire omu musiri, ogu ayateekiire oruhiira, nuwe asemeriire kuleha ebintu byona ebinyakusiisikaire.

⁷Omuntu kakuba ayahuza omutaahi sente rundi ebintu ebindi, kubimulindira, ebintu ebi mukama w'enju bakabimwibirra, omusuma kakuba akwatwa, ebintu ebi aibire, abirehe emirundi ebiri.

⁸Baitu omusuma kakuba atakwatwa, kiibirirwa, nuwe mukama w'enju arahire naimukya omukono gwe hali Ruhanga, okugumya nkooku yakwasire rundi atarakwasire ha bintu by'omutaahi mugenzi we.

⁹Kyona ekinyakusiisa obwesige, kakibe kwiba ente, enkaina, entaama, eby'okujwara rundi ebintu ebindi byona ebinyakwibwa, omuntu eki arukugumya ati: “Mazimakwo nukwo kiri.” Abantu abo bombi, baleetwe omukiikaro ky'okuramizaamu, ogu Ruhanga ou alisingisa omusango, nuwe alireha ebintu by'omutaahi mugenzi we emirundi ebiri.

¹⁰Kakuba omuntu ahereka omutaahi enkaina, ente rundi entaama, rundi ekisoro ekindi kyona, hanyuma kikafa rundi kikahutaara, rundi kikanyagwa abanyanzigwa hataroho muntu akiboine,

¹¹boombi barahirangane nibaimukya omukono hali MUKAMA Ruhanga, okugumya kiherekwa nkooku atarakwasire ha kintu kya mutaahi we.

¹²Baitu kiherekwa kakuba bamwibaho ekisoro eki, asemeriire kulehera mukama wakyo.

¹³Kakuba kiitwa enyamaiswa, omutumbi gwakyo aguleetere mukama wakyo kumunanura, tasemeriire kulehesibwa habw'ekisoro ekinyakwisirwe enyamaiswa.

¹⁴Kakuba omuntu atiiza ekisoro ky'omutaahi, kikahutaara rundi kikamufeerekerra amazire kukiiha omu ba mukama wakyo, asemeriire kuleha kyona eki arukusabwa.

¹⁵Kakuba kihutaara rundi kifa, mukama wakyo aroho, kitiizibwa tasemeriire kuleha, kakuba kiba kipangisiibwe kukora omulimo, omuhendo ogu baragaine kukipangisa, nugwo gusemeriire kusasurwa.

¹⁶Kakuba omusaija asoonasoona omwisiki atamanyire musaija akabyama na uwe, amujuge amuswerre kimu.

¹⁷Kakuba ise omwisiki ayanga kumumuha, omusaija naasemerra alehesibwe sente ezi bajuga abaisiki abatamanyire basaija.

¹⁸Abarogo mutalibaikiriza kwomeera.

¹⁹Omuntu wena anyakusiihana n'ekisoro, asemeriire aitwe.

²⁰Weena anyakuhongera embandwa ebyonzira, atali MUKAMA ogu asemeriire kuhwerekerezibwa.

²¹Otalikora kubi omunyaihanga rundi kumutuntuza, habwokuba na iwe okaba oli munyaihanga omunsi Misiri.

²²Otalibonabonesa enfaakati rundi enfuuzi.

²³Kakuba obabonabonesa bakanterra omuranga, mazima ndihurra okutaabaana kwaabo;

²⁴ndibiihirwa muno nkwise empirima, bakazi bawe balifooka nfaakati, abaana bawe babe nfuuzi.

²⁵Kakuba oyohoza sente zawe, omu ha bantu bange abanaku ab'orukwikara nabo, otalimutonga kandi otalimuhambiriza kukuha amagoba.

²⁶Kakuba mutaahi wawe ogu omunaku akusimbira ekijwaro kye, okimugarurre bwango obwire butakaizire,

²⁷habwokuba nikyo kyesweko kye kandi nikyo kijwaro kye, kakuba otakimugarurra, ekindi eki araayesweka kiraha? Kakuba anterra enduuru, ninyija kumuhurra, habwokuba ngira embabazi.

²⁸Otalijuma Ruhanga rundi kukondereza omulemi ow'abantu b'owanyu.

²⁹Otalikerererwa kuhonga ebyoyereze, ebyokulya rundi eviini enyakurugire omu bijuma. Abaana bawe aboojo emizigaijo, obampongerege;

³⁰nukwo okolege oti ente zawe, entaama zawe, omuzigaijo gwona ogw'ente rundi ogw'entaama, gwikalege na nyinagwo okumara ebiro musanju, ha kiro ekya munaana, ogumpongere.

³¹Mube bantu bange abanyakweziibwe, habweki, mutalirya enyama y'ekisoro ekinyakwisirwe enyamaiswa, muginagirege embwa.