Read Runyoro - rutooro Kurug 23 Bible Online

Kurug 23 - Runyoro - rutooro bible

Kurug 23

¹Otalibiiha ebisuba, otalisagika ebigambo rundi ebikorwa eby'omuntu omubi, okaba kaiso ow'ebisuba.

²Olekege kuteerana n'ekitebe eky'abantu abarukugenda kukora kubi. Otaliha obwakaiso obw'ebisuba noohondera abaingi, habwokugenderra kuburanganiza obwinganiza.

³Omukucwa omusango otalisagika omunaku ngu habwokuba munaku.

⁴Kakuba osanga ente rundi enkaina ey'omunyanzigwa wawe ehabire, ogihabule ogimuleetere.

⁵Kakuba orora enkaina ey'omuntu ayakunobere egwire, ebintu bigyejumikiire, otaligireka hansi n'ebintu ebi, gikonyere ogiimukye.

⁶Olekege kuburanganiza obwinganiza omu musango, okuhenderra omunaku.

⁷Oyerinde kucwa omusango ogw'okuhenderra, kandi otaliita omuntu atanyina musango rundi anyakuhikiriire, habwokuba nyowe MUKAMA, omuntu omubi tindimwihaho musango.

⁸Otalirya enguzi omurundi na gumu, habwokuba enguzi esiikiriza abalemi kandi eburanganiza obulyo bw'abo abarukubaza amazima.

⁹Otalikora kubi omunyaihanga; omanyire omutima gw'omunyaihanga nkooku guteekereza, habwokuba na inywe mukaba muli banyamahanga omunsi Misiri.

¹⁰Omu myaka mukaaga, mubyalege embibo omu itaka lyanyu, mugese ebiryereze.

¹¹Baitu omu mwaka ogwa musanju, muliteneke kwonka, mulirekege lihuumule, limereze abanaku ab'ensi yanyu ebyokulya, kandi ebirisigaramu, biriibwe ebisoro eby'omu kisaka. Omusiri gwawe ogw'emizabbibbu, n'orugonjo rwawe orwa oliva, nabyo nukwo obikolege oti.

¹²Omu biro mukaaga, okolege emirimo yawe yoona, baitu ha kiro ekya musanju, ohuumulege, ente yawe n'enkaina yawe, nabyo bihuumule, mutabani w'omuzaana ou waguzire n'omunyaihanga, bagarukwemu amaani.

¹³Taho omutima byona ebi nkugambiire. Otaliramya abaruhanga abandi n'obwakubaire kubagambaho.

¹⁴Emirundi esatu buli mwaka, munkorrege obugenyi.

¹⁵Mwijukege ekiro ekikuru eky'emigaati etatumbisiibwe, nkooku nabaragiire; mulyege emigaati etatumbisiibwe okumara ebiro musanju, omu kasumi akaatairweho, omu kwezi kw'Abbibbu, habwokuba nukwo mwarugiiremu Misiri. Hatalibaho aliija omumaiso gange ngaronsa.

¹⁶Muracumbaga obugenyi obw'ekiro eky'omuganuro ogw'ebintu byanyu ebi mwereze omu misiri yanyu, ebyarugire omu kutalibana kwanyu. Ha mpero y'omwaka, muracumbaga obugenyi obw'okuhunika, obu muraabaga nimuhunika ebi mwaihire omu misiri yanyu, ebyarugire omu kutalibana kwanyu.

¹⁷Emirundi esatu buli mwaka, omusaija weena azookege omumaiso ga MUKAMA Ruhanga.

¹⁸Otalihonga esagama ey'ekyonzira kyange hamu n'ekintu ekitatumbisiibwe, rundi kuleka ebisajwa eby'ekihongwa kyange bikaikaraho okuhikya nyenkya.

¹⁹Ebintu ebirukukira oburungi eby'omuganuro ebi oraayezaaga omwitaka lyawe, obitege omu nju ya MUKAMA Ruhanga wawe. Ekyana ky'entaama, otalikicumbira omu mata ga nyinakyo.

²⁰Ninyija kubatumira malaika ow'okubooleka omuhanda, abahikye omu kiikaro eki nabaraganiize.

²¹Mumuhurre kandi muhikirize ebi araagamba, muleke kumwemera, habwokuba obu muraakora ekibi, tarukwija kubaganyira, mmuhaire obusobozi bwange.

²²Kakuba mumuhurra kurungi, mukakora byona ebi ndukugamba, ndiba munyanzigwa w'abanyanzigwa baanyu, ndwanise abanyakubarwanisa.

²³Malaika wange obu alibeebembera akabahikya hali Abamooli, Abahiiti, Abaperezi, Abakanaani, Abahiivi n'Abayebusi, abo boona ndibahwerekereza.

²⁴Mutaliinamira embandwa zaabo, mukazihereza, n'okukora ebyabo baitu mubahwerekerereze kimu, museese enyomyo ez'amaramizo gazo.

²⁵Muramye MUKAMA Ruhanga wanyu, nubwo ndiha omugisa ebyokulya byanyu n'amaizi ganyu, mbakize orufu.

²⁶Omunsi yanyu, tihalibamu mukazi ow'aliihamu enda rundi engumba, ndibaha kuhangaara emyaka nyingi.

²⁷Abantu abo, ndibatiinisa inywe mutakahikireyo, ndiburanganiza boona aba muliba nimuhikamu, ndibinga abanyanzigwa baanyu, babairuke.

²⁸Ndisindika enwa zibabanzeeyo, zibinge Abahiivi, inywe mutakahikireyo.

²⁹Abantu banu tindibabinga kubahigiza omu kasumi k'omwaka gumu, ensi etalikara kusigara kwonka, ebisoro eby'omu kisaka bikakanya bikatandika kubarwanisa.

³⁰Ndaagendaga nimbabinga mpora, mpora, babahigize, okuhikya obu mulikanya, mukatwara ensi yaabo.

³¹Ndibateeraho emitaano okuruga ha Nyanja Ey'Ebitoogo okuhika ha nyanja ey'Abafirisiti, kandi okuruga ha irungu okuhika ha kyambu Efuraate. Abantu enzaarwa z'ensi ndibahayo omu mikono yanyu, mubabinge omunsi yaabo.

³²Mutalikora nabo endagaano rundi kugikora n'embandwa zaabo.

³³Bataliikara omunsi yanyu, tibaikara kubaleetereza kunsiisira; habwokuba obu baliramya embandwa zaabo, mali mali ogu guliba guli mutego hali inywe.