Read Runyoro - rutooro Kurug 24 Bible Online

Kurug 24 - Runyoro - rutooro bible

Kurug 24

¹MUKAMA yagambira Musa ati: “Mwije nambere ndi, iwe na Arooni, Nadabu, Abihu n'abantu nsanju ab'omu bakuru ba Isirairi, mundamize hara.

²Musa wenka nuwe anyirre haihi, baitu abandi baikale hara, ataija n'abantu abandi.”

³Musa yaija yagambira abantu byona MUKAMA ebi yagambire n'ebi yaragiire, abantu boona baagarukiramu hamu bati: “Byona MUKAMA ebi agambire turaabikora.”

⁴Musa yahandiika ebigambo byona MUKAMA ebi yagambire. Musa yaimuka nyenkya kara, yayombeka itambiro hansi y'orusozi, n'enyomyo ikumi na ibiri nk'omuhendo ogw'enganda za Isirairi oku guli.

⁵Yaragira abasigazi ab'omu bantu ba Isirairi baheyo ebihongwa ebyokeze kandi bahongere MUKAMA ebyonzira eby'enimi, habwokusaba obusinge.

⁶Musa yakwata ekicweka eky'esagama yakita omu bbeseni, ekicweka ekisigaireho, yagimiisira itambiro.

⁷Hanyuma yakwata ekitabu ekihandiikirwemu endagaano, yakisoma n'iraka likooto, boona bahuliriize; abantu boona baagamba bati: “Ebi byona MUKAMA araagiire turaabikoraga kandi turaabihikirizaaga.”

⁸Musa yakwata esagama, yagimiisira abantu naagamba ati: “Enu niyo sagama ey'endagaano MUKAMA ei akozire na inywe, ebigambo by'ekitabu kinu nkooku birukugamba.”

⁹Nubwo Musa na Arooni, Nadabu, Abihu, n'abantu nsanju ab'omu bakuru ba Isirairi, baatemba ha rusozi, baarora Ruhanga owa Isirairi,

¹⁰hansi y'ebigere bye, hakaba nihasisana nka haliriirwe amabaale ag'omuhendo mwingi agarukwetwa Safiro, nihazooka nk'iguru, obu liba likiire kurungi.

¹¹Abakuru b'abantu aba Isirairi, MUKAMA atabakoleho kabi, bakamurora, baalya, baanywa n'obusinge.

¹²MUKAMA Ruhanga yagamba Musa ati: “Temba onsange ha rusozi, oikaleyo, ninyija kukuha ebibbali by'amabaale, ebinyakuroho ebiragiro n'eby'okuduuma, ebi mpandiikire obyegese abaana ba Isirairi.”

¹³Musa yaimuka hamu n'omuheereza we Yoswa, yatemba ha rusozi rwa Ruhanga.

¹⁴Yagambira abakuru ba Isirairi ati: “Mutulindirre hanu, okuhikya obu turaagaruka, nabasigira Arooni na Hura, omuntu weena ow'araaba n'ekigambo eki arukwenda kumumarra, abahikeho.”

¹⁵Nubwo Musa yatemba ha rusozi, orusozi rwaswekwa ekicu.

¹⁶Ekitiinisa kya Ruhanga kyazooka kandi kyaikara ha rusozi. Orusozi rwaswekwa ekicu okumara ebiro mukaaga; ha kiro kya musanju, MUKAMA yayeta Musa, ali omu kicu hagati.

¹⁷Abaisirairi baarora ekitiinisa kya MUKAMA ha mutwe gw'orusozi nikisisana omurro kahwerekereza.

¹⁸Musa yataaha omu kicu, yatemba ha rusozi, akamarayo ebiro makumi ana nyamusana n'ekiro.