Read Runyoro - rutooro Kurug 25 Bible Online

Kurug 25 - Runyoro - rutooro bible

Kurug 25

¹MUKAMA yagambira Musa ati,

²Gambira abaana ba Isirairi, bandeetere ebihongwa, weena anyakwina omutima ogw'engonzi, omwiheho ekintu okindeetere.

³Binu nibyo bintu ebi baraakuha: Zaabbu, efeeza, n'omulinga.

⁴Engoye ez'erangi eya kaneke, eya kahukya, eya kagaaju, n'eza kitaani enyakurangirwe kurungi ebyoya by'embuzi;

⁵empu ezisemeziibwe kurungi ez'entaama, ez'engonge, embaaho ez'emiti emisisa,

⁶amagita ag'okuta omu taara, ebiboya eby'okuta omu magita ag'okwesiiga n'eby'okwongera kuboyesa eseeta.

⁷Amabaale ag'erangi ezitali zimu, n'obubaale obw'okuhunda, obw'okuhunda ekanzu ey'okuheererezaamu n'ekya ha kifuba.

⁸Obagambe bankorre ekiikaro ekirukwera, nukwo mbaikale hagati.

⁹Byona eby'okukozesa Eheema hamu n'ebikwato byamwo, ebirukukwata ha nsisana yayo, ebi ndukukwoleka, obikole nkooku mbikwolekere.

¹⁰Bankorre esanduuko ey'okwahuramu endagaano, bagikole omu mbaaho ez'emiti emisisa, obura bwayo mita emu, obugazi bwayo kicweeka kya mita, n'obwemi bwayo kicweeka kya mita.

¹¹Ogisiige na zaabbu enungi omunda n'aheeru, yoona ogyehingulirize n'omugoma gwa zaabbu.

¹²Ogihesire empeta ina eza zaabbu, ozite ha maguru gayo ana; ibiri ha rubaju orumu, n'ibiri ha rubaju orundi.

¹³Obaije emango ez'omuti omusisa, ozisweke na zaabbu.

¹⁴Emango ezi, ozisomeke omu mpeta ezinyakuli ha mbaju zaayo, nizo muraahimbirahoga esanduuko.

¹⁵Emango ezi, ziikaleho isomekerwe omu mpeta ez'esanduuko, italisomorwamu.

¹⁶Omu sanduuko egi, nuho ote endagaano ei ndaakuha.

¹⁷Hanyuma, okole ekitebe eky'okuganyirirraho, ekya zaabbu enungi, obura bwakyo, kibe sentimita kikumi mwikumi, obugazi bwakyo sentimita nkaaga na mukaaga.

¹⁸Okole ebihange bibiri ebyamapapa ebya zaabbu ebiheesirwe n'enyondo, obite orubaju n'orubaju.

¹⁹Ekihange ekimu kibe ha rubaju orumu n'ekindi ha rundi. Zaabbu ei wakozeseze ekitebe eky'okuganyirirraho, niyo okozese ebihange ebi.

²⁰Ebihange ebi, byanjurre amapapa gaabyo, bisiikirize ekitebe eky'okuganyirirraho, buli kihange kihindukire kitaahi kyaakyo, biroleriire ekitebe eky'okuganyirirraho.

²¹Ekitebe eky'okuganyirriraho, okite ha ruguru y'esanduuko kandi omu sanduuko omunda, otemu endagaano ei ndaakuha.

²²Obu nuho turaatangatanganiraga, kandi ha ruguru y'ekitebe eky'okuganyirirraho ekinyakuli hagati y'ebihange bibiri ebinyakuli ha sanduuko ey'endagaano, nuho ndaabalizaaga na iwe, ha byona ebinyakuli omu biragiro ebi mpaire abaana ba Isirairi.

²³Okole emeeza ey'omuti ogw'omusisa; obura bwayo mita emu, obugazi, kicweeka kya mita n'obwemi kicweeka kya mita.

²⁴Ogisiige zaabbu enungi mali, kandi ogiteho omugoma ogw'ezaabbu okugyehinguliriza.

²⁵Ogiteho orubbalaza orukuhika ekiganja kimu obugazi, okugyehinguliriza, kandi ogukugire na zaabbu.

²⁶Ogikorre empeta za zaabbu ina, ozibohe ha nsonda zaayo ina, ezinyakuli ha maguru gaayo ana.

²⁷Empeta ez'okukwata emango ez'okwetwekeraho emeeza, ziteebwe haihi n'orubbalaza.

²⁸Obaije emango z'omusisa ozisiige zaabbu, nizo ihimbirwehoga emeeza.

²⁹Ogikorre esahaani n'ebibindi eby'okukwatiramu obubbani. Ogibumbire ebbakuli n'ejaagi eby'okwiturramu ebihongwa eby'ekyokunywa; ebi byona, obikole omu zaabbu enungi mali.

³⁰Emeeza, eteekwe omumaiso g'Esanduuko y'Endagaano, kandi omugaati ogurukwera ogumpongiirwe, guteebwege ha meeza egi obutoosa.

³¹Okole ekikondo ky'etaara kya zaabbu enungi mali. Entobo n'omurundi eby'ekikondo eki, bikorwe omu zaabbu enyakusemeziibwe kurungi; ebyakyo oteho ebitutu n'emitwe yabyo, byona bikorwe omu kintu kimu, n'ekikondo.

³²Kibe n'amataagi mukaaga, agarukukiruga omu mbaju, omu rubaju orumu harugemu amataagi asatu, n'omu rundi harugemu asatu.

³³Buli itaagi ha mataagi ago omukaaga, libeho ebyakyo bisatu, ebirukusisana nk'ebyakyo ebirukurabya, biina ebitutu n'emitwe.

³⁴Ha kikondo ky'etaara kyonyini, habeho ebikopo bbina, ebirukusisana ebijuma bya alimonda, hamu n'emitwe yabyo, n'ebyakyo.

³⁵Hansi ya buli gumu ha migogo esatu ey'amataagi asatu, habeho ekitutu kimu.

³⁶Emitwe, amataagi n'ekikondo, byona bikorwe omu kintu kimu ekya zaabbu enungi eheserwe.

³⁷Okikorre etaara musanju; etaara ezi, zihanikwe nizigendererwa, nukwo zimulike omwanya ogw'omumaiso g'ekikondo.

³⁸Oruhana n'orusaniya bikorwe omu zaabbu enungi muno.

³⁹Okwate kiloguraamu asatu na itaano eza zaabbu enungi muno, niyo okolemu ekikondo ky'etaara, n'ebintu ebindi ebi byona.

⁴⁰Ogenderre muno kubikora, noororra ha kisisani eki nakwolekiire ha rusozi.