Read Runyoro - rutooro Kurug 26 Bible Online

Kurug 26 - Runyoro - rutooro bible

Kurug 26

¹Okole Eheema yange eyokwikaramu; omunda y'Eheema ogikozese emitanda erukwera, ogikoze emitanda erukwera. Ogikozese entimbe ikumi eza kitaani enungi egerekaniziibwe hamu, etabwirwemu n'ehuuzo eza kaneke, eza kahukya n'ezirukugaajuka. Engoye ezi ozibazirreho amajooba g'ebisisani bya bakerubbi.

²Engoye zoona zibe z'orulengo rumu. Obura obw'orugoye runu, bube mita ikumi na ibiri obugazi mita ibiri.

³Engoye itaano igerekanizibwe hamu, n'ezindi itaano iteranizibwe.

⁴Ha mukugiro ogw'orugoye orw'aheeru, ha ngoye itaano ezigerekaniziibwe hamu, oteho tundu ez'ehuuzo eya kaneke, nukwo okole oti ha mukugiro ogw'engoye eziteraniziibwe hamu.

⁵Obazirirre tundu makumi ataano ha mukugiro gw'engoye itaano ez'okubanza na tundu makumi ataano, ozite ha mukugiro ogw'orugoye orundi orunyakuli omu ngoye itaano eza kabiri eziteeraniziibwe hamu.

⁶Okole ebikwaso ebya zaabbu, makumi ataano, engoye ibiri ezi, oziteeranize n'ebikwaso, nukwo ebe Heema emu enyakuhikiriire.

⁷Kandi okole ebikingyo ikumi na kimu omungoye zikozirwe kuruga omu bwoya bwembuzi; bisweke Eheema.

⁸Obura obwa buli kikingyo, bube mita ikumi na itaano; obugazi obwa buli kikingyo, bube bwa mita ibiri, ebikingyo ikumi na kimu ebi, binganaingane.

⁹Ebikingyo bitaano, obigerekanize, birugwemu ekikingyo kimu, ebikingyo ebindi mukaaga, obigerekanize hamu, nabyo birugwemu ekikingyo ekindi kimu, ekikingyo ekya mukaaga, okiteere enkubo ibiri, kikinge omumaiso g'Eheema.

¹⁰Ha mukugiro ogw'ekikingyo eky'aheeru, ha bikingyo ebitaano eby'okubanza ebigerekaniziibwe hamu, oteho tundu makumi ataano, ha mukugiro ogw'ekikingyo eky'aheeru, ha bikingyo ebya kabiri ebigerekaniziibwe hamu, naho oteho tundu makumi ataano.

¹¹Okole ebikwaso eby'omulinga makumi ataano, obisomeke omu tundu ezi, Eheema ogiteeranize, nukwo ebe Heema emu enyakuhikiriire.

¹²Ekicweka eky'ebikingyo ekinyakusigaireho, ekicweka kyakyo kisweke enyuma y'Eheema.

¹³Ekicweka ekinyakusigaireho, kiikale nikirengiizira ha mbaju zombi ez'Eheema, kugisweka.

¹⁴Eheema, ogikorre ekisweko eky'empu ezinyakuhazirwe kurungi ez'entaama n'ez'engonge.

¹⁵Okole embaaho ez'obwemi, ez'omuti omusisa ez'okwemerezaaho Eheema.

¹⁶Obura obwa buli rubbaho, mita itaanu, n'obugazi bwarwo kicweeka kya mita.

¹⁷Buli rubbaho, rube n'obwina bubiri h'okuteeranirizibwa n'orundi; embaaho zoona ez'Eheema, nukwo ozikole oti.

¹⁸Okole embaaho makumi abiri ez'okuta ha mukono ogw'obulyo,

¹⁹okole obucuba obw'efeeza makumi ana bw'okutahyamu embaaho ezi amakumi abiri, obwina bubiri, n'obucuba bubiri, obw'okuta hansi eya buli rubbaho.

²⁰Ha rubaju orwa kabiri orw'Eheema, orw'omukono ogw'obumoso,

²¹okole embaaho makumi abiri n'obucuba bwazo obw'efeeza, obucuba bubiri, obw'okuta hansi eya buli rubbaho orundi.

²²Okole embaaho mukaaga ez'okuta omu kicweka eky'enyuma eky'Eheema, obukiizi obwa Bugwaizooba.

²³Okole embaaho ibiri ez'okuta omu burugu obw'ekicweka eky'enyuma eky'Eheema.

²⁴Embaaho ezi, zaahukane hansi baitu haiguru, ziteeranire ha mpeta ey'okubanza, zombi nukwo zibe ziti zisobole kurugwamu oburugu bubiri.

²⁵Embaaho zibe munaana n'obucuba bwazo obwa zaabbu, obucuba ikumi na mukaaga, obucuba bubiri hansi y'enyomyo emu, obucuba bubiri hansi y'enyomyo endi.

²⁶Okole embazi omu mbaaho ez'omuti omusisa; itaano ez'okuta omu mbaaho ez'orubaju orumu orw'Eheema,

²⁷embaaho itaano ez'okuta omu rubaju orw'enyuma orwa Bugwaizooba.

²⁸Orubazi orwa hagati, orurukucwa habiri embaaho ez'obwemi, rurabiremu kimu, okuruga ha mpero emu, okuhika ha mpero endi.

²⁹Embaaho ezi, ozisweke na zaabbu, ozikorre empeta eza zaabbu ez'okukwata embazi, embazi ezi, ozisweke na zaabbu.

³⁰Oyemereze Eheema nookuraatira ekisisani kyayo, eki wayolekerwe ha rusozi.

³¹Okole enyigamo eya kitaani enyakurukirwe kurungi, etabwirwemu ehuuzo eza kaneke, kahukya n'ezirukugaajuka. Enyigamo egi, ekorwe n'obwegendereza ogibazirreho amajooba g'ebisisani by'ebihange bya mapapa.

³²Ogihanikise ebikwaso ebya zaabbu ha mbaju ina ez'omuti omusisa, ezinyakuswekerwe na zaabbu, ezinyakusomekerwe omu bucuba bbuna obw'efeeza.

³³Enyigamo erengizire ha bikwaso. Otahyemu esanduuko ey'endagaano, ogite omunda y'enyigamo, enyigamo egi, niyo eraabaganiza ekiikaro ekirukwera, ha kiikaro ekirukukirra kimu kwera.

³⁴Ha ruguru y'esanduuko ey'endagaano enyakuli omu kiikaro ekirukukirra kimu kwera, oteho ekitebe eky'okuganyirirraho.

³⁵Aheeru, oteho emeeza, kandi ha bukiizi obw'obulyo obw'Eheema oteho ekikondo eky'etaara, kirolerre emeeza, ha bukiizi obw'emoso.

³⁶Okole orukingyo orw'okuta ha mulyango gw'Eheema, orukole omu kitaani enyakurangirwe kurungi, enyakusahwirwe ehuuzo ez'erangi eya kaneke, kahukya n'ezirukugaajuka.

³⁷Orukingyo oru, orukorre enyomyo itaano ez'omuti omusisa, ozisweke na zaabbu, ebikwaso byazo bibe bya zaabbu, ozisomeke omu bucuba obunyakukozirwe omu mulinga.