Read Runyoro - rutooro Kurug 27 Bible Online

Kurug 27 - Runyoro - rutooro bible

Kurug 27

¹Okole itambiro omu mbaaho ez'omuti omusisa, obura bwalyo mita ibiri, obugazi bwalyo nazo mita ibiri. Itambiro eri, libe ly'embaju ina ezirukwinganaingana, obwemi bwalyo, bube mita emu.

²Oliteho amahembe ha burugu bwalyo, nkooku bukali bbuna; amahembe gaalyo, garugirre hali ryo lyonka; itambiro eri, olisweke n'omulinga.

³Olikorre obunaga bw'okuyorramu iju erirukuruga omu byonzira ebyokiibwe, olikorre ebitiyo, ebibindi, ehuuma n'obusaniya obw'okuguhiraho omurro. Ebikwato byalyo byona, obikole omu mulinga.

⁴Olikorre ekitimba eky'okutaho amanda, ekinyakukozirwe omu mulinga; oteho empeta ina ez'omulinga, ha burugu bwako obbuna.

⁵Ekitimba eki, okisomeke omu mugoma ogw'itambiro omunda, kinganize habiri itambiro.

⁶Itambiro eri, olikorre emango z'omusisa; emango ezi ozisweke, n'omulinga,

⁷bazisomeke omu mpeta, nukwo, zibe ha mbaju ibiri ez'itambiro obu liraabaga nirihimbwa.

⁸Itambiro olikozese embaaho, omunda lirumu ekiina, nkooku lyakwolekerwe ha rusozi.

⁹Ezigati ey'Eheema erukwera, ogikole oti: Ha bukiizi obw'obulyo, oteyo omutanda ogw'orugoye orwa kitaani enyakurukirwe kurungi, orurukuhikya mita ana na ina.

¹⁰Orugoye oru, ruhanikwe ha nyomyo zaarwo makumi abiri, n'obura bwazo makumi abiri, obunyakukozirwe omu mulinga, baitu ebikwaso n'ebigoye eby'okuzibohesa, bibe by'efeeza.

¹¹Ha rubaju orw'emoso, habeho orugoye orurukuhikya mita ana na itaanu n'ekicweeka, enyomyo zarwo makumi abiri n'ebiina byazo makumi abiri, bikorwe omu mulinga, baitu ebikwaso n'ebibazi byazo, bibe by'efeeza.

¹²Obugazi obw'ezigati ha rubaju orwa Bugwaizooba, ruhanikweho orugoye rwa mita abiri na ibiri n'ekicweeka, orugoye oru ruhanikwe ha nyomyo ikumi ezinyakwina ebiina ikumi.

¹³Obugazi obw'ezigati omumaiso, obukiizi obwa Burugaizooba bube mita abiri na ibiri n'ekicweeka.

¹⁴Orugoye orw'orubaju orumu orw'irembo, rube mita mukaaga n'ekicweeka, orugoye oru ruhanikwe ha nyomyo isatu ezinyakwina ebiina bisatu.

¹⁵Ha rubaju orundi orw'irembo, orugoye rugende omwanya mita mukaaga n'ekicweeka, ruhanikwe ha nyomyo isatu ezinyakwina ebiina bisatu.

¹⁶Irembo ery'ezigati, litaibwemu orukingyo mita mwenda, orukole omu rugoye orwa kitaani enyakurukirwe kurungi, enyakucwirwemu ebika eby'erangi eya kaneke, kahuukya neerukugaajuka. Orukingyo oru, ruhanikwe ha nyomyo ina, enyomyo ezi, zibe n'obucuba bwazo bbuna.

¹⁷Enyomyo zoona ezehinguliriize ezigati, ziteebweho ebibazi eby'efeeza; ebikwaso eby'enyomyo ez'ezigati, bibe by'efeeza, obusigikiro bw'enyomyo zaayo, bibe by'omulinga.

¹⁸Obura obw'ezigati, mita ana na itaano n'ekicweeka, obugazi mikono abiri na ibiri n'ekicweeka n'obwemi mita ibiri. Ezigati ebe n'enkingyo zikorwe kuruga mu ngoye eza kitaani enyakurukirwe kurungi, egire n'ebiina by'omulinga.

¹⁹Ebikwato byona eby'Eheema erukwera, ebya buli mulimo, enkondo zaayo n'enkondo ez'ezigati, zibe z'omulinga.

²⁰Oragire abantu ba Isirairi, bakuleetere amagita amarungi ag'ebijuma eby'emiti oliva ebinyakuhonzirwe kurungi; amagita g'okuhemba omu taara, nukwo etaara ecumikwe ikale neeyaka.

²¹Omu Heema ey'okutangatanganiramu, aheeru ey'enyigamo enyakuli omumaiso g'esanduuko ey'endagaano, Arooni n'abatabani, nubo bararolerraga etaara egi, ikale neeyaka omumaiso ga MUKAMA. Okuruga nyenkya neyaka obusumi bwona; kinu kibe kiragiro ekirukukwatwa abaana ba Isirairi ab'ebiro byona.