Read Runyoro - rutooro Kurug 28 Bible Online

Kurug 28 - Runyoro - rutooro bible

Kurug 28

¹MUKAMA yaragira Musa ati: Yeta Arooni mugenzi wawe n'abatabani: Nadabu, Abihu, Eryeza, na Itamara. Obasoroole omu bantu ba Isirairi, babe banyakatagara bange bampeereze.

²Arooni mugenzi wawe omukorre ebijwaro eby'obunyakatagara ebiraamuhaisa ekitiinisa kandi akasemera.

³Ogambire abafundi boona abarungi, aba nahaire amagezi, baije bakorre Arooni eby'okujwara ebi araayahulirwamu kuba nyakatagara wange.

⁴Binu nibyo bijwaro ebi baraakora: ekya ha kifuba, ekanzu, busuuti, ekooti enyakusahwirwe kurungi, ekiremba ekya ha mutwe n'omweko. Bakole eby'okujwara ebirukwera eby'okujwarwa Arooni mugenzi wawe n'abatabani, nibyo bampeererezeemuga, nibakora omulimo ogw'obunyakatagara.

⁵Abakozi bahebwe ehuuzo eza zaabbu, kaneke, kahuukya n'ezirukugaajuka na kitaani enyakurangirwe kurungi.

⁶Bakole kurungi ekanzu omu kitaani enyakurukirwe kurungi, batemu ehuuzo za zaabbu, kaneke, kahuukya n'ezirukugaajuka.

⁷Ha mabega, bagiteho obukoba bubiri bukwatire ha mikugiro yombi, nubwo bugiteeranize.

⁸Bagiteho omweko ogwa kitaani enyakurukirwe kurungi, ogukozirwe omu bintu nibyo bimu ebinyakukozire ekanzu.

⁹Okwate obubaale bubiri obw'erangi ezitali zimu, obusaruleho amabara ag'abaana ba Isirairi.

¹⁰Akamu okasaruleho amabara mukaaga, akandi nako okasaruleho agandi mukaaga, noogahonderaniza nkooku bakuratana omu kuzaarwa kwabo.

¹¹Omukozi w'amabaale nkooku asarura emanyikirizo, na iwe nukwo osarule oti amabara g'abaana ba Isirairi, ogataahye omu tundu ezikozirwe n'ehuuzo eza zaabbu.

¹²Obubaale obubiri, obute ha bukoba obw'ekanzu obwa ha mabega, bubege bw'okwijukiraho abaana ba Isirairi; Arooni araagendaga n'amabara ago ha mabega ge, nukwo MUKAMA abaijukireho.

¹³Okole tundu ibiri eza zaabbu

¹⁴n'emikuufu ebiri eya zaabbu enungi. Ekorwe nk'omuyondo ogunyakurangirwe kurungi; emikuufu ogitaahye omu tundu.

¹⁵Nyakatagara omukuru, omukorre ekya ha kifuba eki araajwaraga naacweramu abantu ekya Ruhanga asiimire; kinu nakyo kikorwe kurungi nkooku baakozire ekanzu. Kikorwe omu huuzo eza zaabbu, eza kaneke, kahuukya n'ezirukugaajuka.

¹⁶Kibe ky'embaju ina ezirukwingana kandi kitiirwe enkubo ibiri; obura bwakyo, sentimita abiri na ibiri, n'obugazi sentimita abiri na ibiri.

¹⁷Okitemu enkarra ina ez'amabaale, orukarra orw'okubanza rubemu amabaale ag'omuhendo omwingi: sarudiyo, topazi, na kabunkulo;

¹⁸orukarra orwa kabiri rubemu: imiralido, sufiro, na daimanda;

¹⁹orwa kasatu habemu: takwize, agate n'amesito;

²⁰orw'akana habemu: bberulo, onekisi na yesipa. Busomekwe omu tundu ezikozirwe omu huuzo eza zaabbu.

²¹Habeho amabaale ikumi n'abiri aganyakuhandikirweho amabara g'abaana ba Isirairi nk'omuhendo gwaabo oku guli; buli ibaale lisarwirweho ibara omu mulingo gw'emanyikirizo.

²²Ekya ha kifuba okikorre emikuufu eya zaabbu, enyakukozirwe nk'emiyondo enyakurangirwe kurungi;

²³kandi okikorre empeta ibiri eza zaabbu, ozite ha mbaju zaakyo zombi.

²⁴Emikuufu ebiri egi, ogite omu mpeta ezi eza ha mukugiro ogw'ekya ha kifuba.

²⁵Ensonga ibiri ez'emiyondo ebiri, buli emu ogitaahye omu tundu, nukwo ekya ha kifuba okikwasize ha bukoba obubiri obwa ha mabega, obunyakuli omumaiso g'ekanzu.

²⁶Kandi okole empeta ibiri eza zaabbu ozite ha nsonga ibiri ez'ekya ha kifuba, ha mukugiro gwakyo ogw'omunda ogurukukwatana n'ekanzu.

²⁷Okole empeta ibiri ezindi eza zaabbu, ozite ha kicweka ekya ifo eky'obukoba obubiri obwa ha mabega g'ekanzu, nambere ekicweka kya ifo kiteeranira n'omweko gwayo ogunyakukozirwe kurungi.

²⁸Empeta zaakyo zikibohere ha mpeta ez'ekanzu n'akahuuzo aka kaneke, nukwo kibyame ha mweko ogw'ekanzu ogunyakukozirwe kurungi, kireke kuterebuka ha kanzu.

²⁹Arooni obu araabaga naataaha omu kiikaro ekirukwera ajwaire ekya ha kifuba ekirukumanyisa kucwamu eki Ruhanga asiimire, araabaga naagenda hali MUKAMA aina amabara g'abaana ba Isirairi habwa MUKAMA kubaijukiraho.

³⁰Omu kya ha kifuba, mutemu amabaale Ulimu na Tumimu, gaikale ha kifuba kya Arooni obu araabaga naagenda hali MUKAMA kwekaguza eki araakora. Akasumi koona Arooni ajwale ekya ha kifuba ekinyakurumu obubaale obu, obu araabaga nagenda kucwamu eki MUKAMA asiimire.

³¹Okole busuuti ey'okujwarra ha kanzu, yoona ebe y'erangi ya kaneke.

³²Ebe n'ebikya h'okurabya omutwe, ebikya byayo bikugirwe n'omuyondo ogunyakurukirwe kurungi, nkooku baakugiire ebikya by'ekanzu, nukwo ereke kutemuka.

³³Ha rutege rwayo kugyehinguliriza, okoleho ebitutu eby'ehuuzo eza kaneke, kahuukya n'ezirukugaajuka, hagati yabyo, habemu enjogera eza zaabbu;

³⁴enjogera neekwatwa ekitutu okwehinguliriza entege za busuuti.

³⁵Arooni niyo ajwalege obu araabaga naagenda kuheereza MUKAMA. Obu araabaga naataaha omu kiikaro ekirukwera kandi naaturuka, ebide biraagambaga okumanyisa abantu nkooku ali mwomeezi.

³⁶Okole ekirahule ekya zaabbu enungi, nkooku basarura emanyikirizo, okisaruleho ebigambo binu: “Arukwera wa MUKAMA.”

³⁷Okibohere ha kihuuta n'akahuuzo ka kaneke, kibe omumaiso g'ekihuuta.

³⁸Arooni akijwalege ha buso, nuwe araabaga n'obujunanizibwa bwona oburaabaga buzookere ha kuhonga ebihongwa abantu ba Isirairi ebi beeta bisembo byabo ebirukwera. Ekirahule eki kiikalege ha buso bwa Arooni, nukwo ebisembo ebi MUKAMA Ruhanga abisiime.

³⁹“Oruke ekooti omu mulingo gw'akatimba omu rugoye orwa kitaani enungi, okole enkofiira omu kitaani enungi kandi okole omweko ogutemu amanyumizo.”

⁴⁰Batabani ba Arooni, nabo obakorre ekooti, emyeko n'enkofiira; obikole bibahaise ekitiinisa kandi basemere

⁴¹Arooni mugenzi wawe, omujweke ebye n'abatabani obajweke ebyabo; obaseeseho amagita, obasoroole kandi obeeze, bampeerezege nibakora omulimo ogw'obunyakatagara.

⁴²Kandi obakorre empale engufu eza kitaani, zibatange kujuura. Empale ezi ziruge omu makendu zigarukire omu bibero;

⁴³Arooni n'abatabani nizo bajwalege obu baraabaga nibataaha omu Heema ey'okutangatanganiramu rundi obu baraabaga nibairra haihi n'itambiro kukora omulimo omu kiikaro ekirukwera, tibaikara kweretera akabi bakafa. Kinu kibe kiragiro eky'ebiro byona hali Arooni na hali abaijukuru, uwe amazire kufa.