Read Runyoro - rutooro Kurug 29 Bible Online

Kurug 29 - Runyoro - rutooro bible

Kurug 29

¹Kinu nikyo oraakora Arooni n'abatabani kubeeza mu bunyakatagara, nukwo baikirizibwe kumpeereza: Okwate enimi ento emu n'empaya entaama ibiri ebitanyina kamogo.

²Omugaati ogutatumbisiibwe na keeki ezitatumbisiibwe, ezinyakutugiirwemu amagita agaruga omu muti gwa oliva, na bisikwiti ezinyakusiigirwe amagita. Ebi byona, obicumbe omu nsaano ey'engano enyakuniinuukire kurungi.

³Obite omu kiibo kimu, nuho obireetere, oleete enimi n'empaya ez'entaama ibiri.

⁴Oleete Arooni n'abatabani, obate ha mulyango ogw'Eheema ey'okutangatanganiramu, oboogye n'amaizi.

⁵Okwate eby'okujwara, Arooni omujweke ekanzu, hanyuma omuteho busuuti, ekya ha kifuba, omuteege omweko ogw'ekanzu ogunyakusahwirwe kurungi.

⁶Omujweke ekitambaara ha mutwe, kandi haruguru y'ekitambaara, omujweke ekondo enyakuhairweyo hali MUKAMA.

⁷Okwate amagita aganyakuseeswaho ab'okwezibwa, ogamuseese ha mutwe, omweze.

⁸Hanyuma, oleete abatabani, obajweke ekanzu zaabu,

⁹obateege emyeko, obabohereho enkofiira. Obwa nyakatagara oburukugumibwa ekiragiro ekitahwaho bwikale buli bwa Arooni n'abatabani; nukwo olibatahya oti, omu mulimo ogw'obunyakatagara.

¹⁰Hanyuma, oleete enimi omumaiso ag'Eheema ey'okutangatanganiramu, Arooni n'abatabani bate emikono yabo ha mutwe gwayo.

¹¹Enimi egi, bagiitire omumaiso ga MUKAMA ha mulyango ogw'Eheema ey'okutangatanganiramu.

¹²Ha sagama yayo, oiheho nke, ogisiige ha mahembe g'itambiro n'orukumo rwawe, enyakusigaireho, ogiseese ha kicweka ekya hansi eky'itambiro.

¹³Okwate ebisajwa byona ebinyakusweka ebyenda, n'obune obw'empagara, ensigo zombi n'ebisajwa byazo, obyokeze ha itambiro.

¹⁴Baitu enyama yayo, oruhu rwayo n'efa yayo, obyokeze aheeru y'orukande; eki nikyo ekihongwa ekihairweyo habw'okuganyira abanyakatagara ebibi.

¹⁵Hanyuma, okwate emu ha mpaya z'entaama, Arooni n'abatabani, nayo bagiteho emikono ha mutwe gwayo.

¹⁶Entaama egi, ogiite, okwate esagama yayo, ogimiisire itambiro olyehingulirize.

¹⁷Ogitemateme, oyogye ebyenda byayo n'ebirenge byaayo, obijwanganize omu nyama ei otematemere, hamu n'omutwe gwayo;

¹⁸entaama yoona, ogyokeze ha itambiro. Eki, nikyo ekihongwa ekyokeze, ekirukuboya kurungi, kihongwa ekinyakuhongiirwe MUKAMA.

¹⁹Okwate entaama eya kabiri, Arooni n'abatabani nayo, bagiteho emikono ha mutwe, gwayo.

²⁰Entaama egi, ogiite, ha sagama yayo, oiheho nke, ogisiige ha nsonga ey'okutu okwa Arooni na ha nsonga ez'amatu ag'obulyo ag'abatabani, na ha byara bisaija eby'emikono ey'obulyo, na ha byara bisaija eby'ebigere by'obulyo, esagama enyakusigaireho, ogiseese hansi y'itambiro olyehingulirize.

²¹Hanyuma okwate esagama enyakuli ha itambiro, otabemu amagita make aganyakuseswaho ab'okwezibwa, ogimiisire Arooni n'ebyokujwara bye, kandi ogimiisire abatabani n'ebyokujwara byabo, Arooni naija kuba ayeziibwe hamu n'ebyokujwara bye, batabani be nabo, nibaija kuba beeziibwe hamu n'ebyokujwara byabo.

²²Okwate ebisajwa eby'entaama, ekitere kyayo, ebisajwa ebinyakusweka ebyenda, obune obw'empagara, ensigo zombi n'ebisajwa byazo, ekirumbu kyayo eky'obulyo.

²³Okwate omugaati ogumu omukooto, keeki emu enyakucumbirwe n'amagita, bisikwiti emu obiihe omu kigega eky'emigaati etatumbisiibwe, ekinyakuli omumaiso ga MUKAMA.

²⁴Ebi byona obikwase Arooni n'abatabani, babiimukize MUKAMA nukwo byezibwe.

²⁵Hanyuma, obiihe omu mikono yabo, obyokeze ha itambiro, byongerwe ha kihongwa ekyokeze, ekinyakuhongiirwe MUKAMA. Okuboya kwabyo okurungi nikunsemeza.

²⁶Okwate ekifuba eky'entaama empaya egi ey'okutahya Arooni omu mulimo ogw'obunyakatagara, okiimukye omumaiso ga MUKAMA, kibe kihongwa eky'okwimukya; ogu nugwo gube mugabo gwawe.

²⁷Ekifuba eki eky'ekihongwa eky'okwimukyaimukya, okyeze n'ekirumbu eky'omugabo ogw'abanyakatagara ogwimukyaimukiibwe kandi ogunyakuhongerwe nigwihwa ha ntaama empaya, habwokuba omugabo ogu, gwa Arooni n'abatabani.

²⁸Omugabo ogu, guraabaga gw'oruteekerro, nugwo mugabo ogwa banyakatagara, abaana ba Isirairi ogu baraabahaga nigwihwa ha bihongwa byabo ebinyakuheebwayo habw'obusinge, eki nikyo kihongwa kyabo eki baraahongeraga MUKAMA.

²⁹Eby'okujwara bya Arooni ebinyakweziibwe, birijwarwa abatabani uwe amazire kufa, nibyo baraajwaraga obu baraabaga nibajwekwa obukuru obwa nyakatagara.

³⁰Omutabani aliba akomerwe okuba nyakatagara omukuru omu kiikaro kye, araabijwaraga okumara ebiro musanju, obu araabaga naataaha omu Heema ey'okutangatanganiramu okukora omulimo omu kiikaro ekirukwera muno.

³¹Okwate enyama ey'entaama enyakuhairweyo, ogicumbire omu kiikaro ekirukwera habw'okujweka Arooni n'abatabani obukuru, balye enyama egi, bagiriise emigaati enyakusigaire omu kigega;

³²bagiriire omu mulyango ogw'Eheema ey'okutangatanganiramu.

³³Balye ebintu ebyahairweyo okubaganyiza ebibi obu baasoroorwaga, atali nyakatagara, atalibiryaho habwokuba ebintu ebi, bintu birukwera.

³⁴Kakuba enyama rundi emigaati enyakuhairweyo habwokubajweka obukuru, biba bisigaireho okuhikya nyenkya, obyokye bisiiriire, hatalibaho omuntu akabirya, habwokuba ebintu ebi, bintu birukwera.

³⁵Byona ebi nkugambiire, nukwo obikole oti, Arooni n'abatabani; omukoro ogw'okubasoroora, ogumaleho ebiro musanju.

³⁶Buli kiro, ohongege enimi, ebe ndehwa habw'ekibi, kandi osesege amagita ha itambiro, kulyeza.

³⁷Omale ebiro musanju noolihongerra kandi noolyeza, obu nubwo liryerra kimu, kyona ekiraahikaga ha itambiro eri, kiraafookaga kirukwera.

³⁸Binu nibyo oraahongaga ha itambiro buli kiro; ebyana by'entaama bibiri, ebinyakuhikize omwaka gumu.

³⁹Entaama emu, ogihongege n'ensaano ey'engano enyakuniinuukire kurungi, ey'erukwijura omu lita ina, enyakutabwirwemu na kimu kya kana ekya lita ey'amagita ag'omuti gwa oliva,

⁴⁰aganyakuhonzirwe kurungi. Kandi na kimu kya kana ekya lita ya viini, kibe kihongwa eky'okunywa.

⁴¹Entaama endi, ogihonge omu kairirizi, ogihonge n'ebihongwa eby'enjuma, nayo ogihonge n'ekihongwa eky'okunywa nkooku okozirege nyenkya, harugemu okuboya kurungi. Eki nikyo kihongwa ekyokeze, ekinyakuhongiirwe MUKAMA.

⁴²Obwomeezi bwanyu bwona, ekihongwa kinu ekyokeze, muraakihongeraga MUKAMA ha mulyango ogw'Eheema ey'okutangatanganiramu, aho nuho ndaabasangaga kubaza na inywe.

⁴³Omu kiikaro eki nuho ndaasangaga abaana ba Isirairi, kandi ekitiinisa kyange nikyo kiraakifooraga ekirukwera.

⁴⁴Eheema ey'okutangatanganiramu hamu n'itambiro, ndaabyeza; Arooni n'abatabani, nabo ndaabeeza, nukwo bampeereze nibakora omulimo ogw'obunyakatagara.

⁴⁵Ndaikaraga hamu n'abaana ba Isirairi, mbe Ruhanga wabo.

⁴⁶Nubwo balimanya nkooku ndi MUKAMA waabo, ayabaihire omunsi Misiri nukwo nyikalege omuli bo; ninyowe MUKAMA Ruhanga waabo.