Read Runyoro - rutooro Kurug 3 Bible Online

Kurug 3 - Runyoro - rutooro bible

Kurug 3

¹Omu kasumi ako, Musa akaba naaliisa igana lya Yesero isezaara, nyakatagara wa Midiani; igana lye yalitwara Bugwaizooba bw'irungu, yahika Holebbu, orusozi rwa Ruhanga.

²Malaika wa Ruhanga yamubonekera ali omu rulimi rw'omurro, ogukaba guli omu rusaka hagati.

³Musa yagamba ati: “Ka nyirre haihi, ndole ekintu kinu eky'amahano, kiki ekirukutanga orusaka kusiiriira.”

⁴MUKAMA ali omu rusaka obu yarozire Musa nairra haihi kwetegereza, yamweta naagamba ati: “Musa! Musa!” Uwe yayetebuka ati: “Taata.”

⁵Nubwo Ruhanga yamugamba ati: “Otairra haihi; juura enkaito zaawe omu bigere, habwokuba ekiikaro eki oyemeriireho, kiikaro ekirukwera.”

⁶Yagaruka yamugamba ati: “Ninyowe Ruhanga wa baaswenkuru, Ruhanga owa Abburahamu kandi owa Yakobbo.” Musa yayeswekerra ha maiso, habwokuba akaba natiina kurora Ruhanga.

⁷Nubwo MUKAMA yagamba ati: “Ndozire omuhito ogw'abantu bange abanyakuli Misiri, mpuliire omukungo gwabo, habw'abo abarukubakozesa emirimo ey'amaani; nyetegeriize okucanda kwabo.

⁸Habweki nsirimukire naija kubajuna, mbaihe omunsi egi ei barumu, mbaleete omunsi enungi kandi engazi, ensi enungi ijwire amata n'obwoki, mbaleete omunsi ey'Abakanaani, Abahiiti, Abamooli, Abahiivi n'Abayebusi.

⁹Mazima kwo mpuliire okutaaga kw'abantu ba Isirairi kandi ndozire nkooku Abanyamisiri barukubakora kubi.

¹⁰Hati nu, ija nkutume hali Faraaho, onyihireyo abantu bange, abaana ba Isirairi, baruge Misiri.”

¹¹Baitu Musa yakaguza Ruhanga ati: “Nyowe, ninyowe oha ow'araagenda hali Faraaho, nkaiha abaana ba Isirairi Misiri?”

¹²Ruhanga yagarukamu ati: “Nyowe ndi hamu na iwe, obu olimara kwiha abantu bange Misiri, olimpongera ha rusozi runu. Kanu nuko k'okurorraho ak'olimanyiraho nkooku nkutumire.”

¹³Kandi Musa yagamba Ruhanga ati: “Obu ndihikaho Abaisirairi nkabagambira nti: ‘Ruhanga owa baisenkuru inywe nuwe antumire hali inywe’, bbo bakankaguza bati: ‘Ibara lye nuwe oha?’ Ndigarukamu ki?”

¹⁴Ruhanga yagarukamu ati: “Ninyowe ogu ANYAKUBAHO”. Yagaruka yagamba ati: “Kinu nikyo ogambire abaana ba Isirairi oti: ‘Ogu ANYAKUBAHO nuwe antumire hali inywe.’ ”

¹⁵Ruhanga yayongera yagambira Musa ati: “Gambira abaana ba Isirairi oti: ‘MUKAMA Ruhanga owa baisenkuru inywe, Ruhanga ow'Abburahamu owa Isaaka n'owa Yakobbo, nuwe antumire hali inywe.’ Eri niryo ibara lyange erya buli na buli, nukwo ndiikara ninyetwa ntyo ebiro byona.

¹⁶Genda osorooze abakuru ab'enganda za Isirairi, obagambire oti: ‘MUKAMA Ruhanga owa baisenkuru inywe, Ruhanga owa Abburahamu na Yakobbo ambonekiire;’ yangamba ati: ‘Nyetegeriize, narora byona ebibarukubakora omunsi Misiri.

¹⁷Nahabweki, mmaliriire kubaiha omu muhito ogu murukubona omunsi Misiri, mbatwale omunsi ey'Abakanaani, Abahiiti, Abamooli, Abaperezi, Abahiivi, n'Abayebusi, ensi ijwire amata n'obwoki.’

¹⁸Nibaija kuhurra ebi oraabagambira; kandi iwe n'abakuru ab'enganda eza Isirairi, mugende hali omukama wa Misiri mumugambire muti: ‘MUKAMA Ruhanga ow'Abahebburaayo, atutumire naatweta. Hati, tukwesengeriize, otwikirize, tugende, orugendo rw'ebiro bisatu omwirungu tuhongere MUKAMA Ruhanga waitu ekyonzira.’

¹⁹Niimanya omukama wa Misiri, nkooku ataabaikirize kugenda, rundi buli ahambiriziibwe muno.

²⁰Habweki ninyija kukozesa obusobozi bwange nfubire ensi Misiri, ningikorramu eby'amahano bingi; obu ndimara kukora ebi, alibaikiriza mugende.

²¹Abanyamisiri, ndibatamu omwoyo omurungi ogw'okugonza abantu abo, obu muliba nimurugayo, timulirugayo mutaina kantu,

²²baitu buli mukazi, alisaba omukazi omutaahi rundi omukazi anyakuraara omunju ye amuhe amabaale ag'omuhendo, ag'efeeza, n'ag'ezaabbu n'ebyokujwara, mubijweke batabani baanyu na bahara baanyu; Abanyamisiri nukwo mulibanyaga muti.”