Read Runyoro - rutooro Kurug 30 Bible Online

Kurug 30 - Runyoro - rutooro bible

Kurug 30

¹Okole itambiro ery'okucumiikirirraho obubbani, olikole omu mbaaho ez'omuti omusisa.

²Obura bwalyo, kicweeka kya mita, obugazi bwalyo, nakyo kicweeka kya mita; embaju zombi zinganaingane, obwemi bwalyo bube mita emu, amahembe galyo, galibaizirweho.

³Haiguru yalyo, embaju zalyo kulyehinguliriza, n'amahembe galyo olisweke na zaabbu enungi.

⁴Olikorre empeta ibiri eza zaabbu, empeta ezi, ozite hansi ey'omugoma ogwa zaabbu, ha mbaju zalyo ibiri ezirolerraine, nukwo zikwate emango ez'okulihimbisa.

⁵Emango ezi, ozikole omu mbaaho z'omuti gw'omusisa, nazo ozisweke na zaabbu enungi.

⁶Itambiro eri, olite enyuma y'enyigamo enyakuli omumaiso g'esanduuko ey'endagaano, omumaiso ag'ekitebe eky'okuganyirirraho, nambere ndaabatangatanganiraga.

⁷Itambiro eri, niryo Arooni araacumiikirirrahoga obubbani oburukuboya kurungi; buli nyenkya obu araabaga naateekaniza etaara, nubwo araacumiikirraga.

⁸Kandi omu kairirizi obu araabaga naazicumika, nabwo acumiikirrege. Ebiro byanyu byona, obubbani obu muraikaraga nimubucumiikirra MUKAMA.

⁹Ha itambiro eri, otalihongeraho obubbani obutarukwikirizibwa, rundi ekihongwa eky'enjuma; noobwakuba kuliseesaho ekihongwa eky'okunywa. Omurundi gumu buli mwaka,

¹⁰Arooni arayezaaga itambiro nata esagama y'ekihongwa eky'okuganyiza ebibi ha mahembe galyo. Eki akikolege buli mwaka ebiro byanyu byona. Itambiro linu erirukwera muno lya MUKAMA.

¹¹MUKAMA akagambira Musa ati:

¹²“Obu oraabaga noobara abaana ba Isirairi omu kasumi ak'okubara, buli muntu ahe MUKAMA sente ez'okwereherra nukwo aleke kuhikwaho akabi, obu oliba noobara.

¹³Weena ow'arukubarwa, omuhendo gwa sente ezirukwingana ekicweeka kyezihebwayo omu kiikaro ekirukwera ezirukwetwa sekeri; zihongerwe MUKAMA.

¹⁴Weena ow'arukubarwa omu kubarwa oku, anyakuhikize emyaka makumi abiri ey'obukuru n'okukiraho, ahe ekihongwa kya MUKAMA Ruhanga.

¹⁵Abaguuda n'abanaku boona baliha omuhendo ogurukwingana neezi ezirukwingana neezi ezihebwayo omu kikaro ekirukwera hali MUKAMA, obu muraabaga nimuleheerra obwomeezi bwanyu.

¹⁶Sente ez'okwereherra ezi ozisorooze kuruga ha baana ba Isirairi, ozikozese emirimo ey'omu Heema ey'okutangatanganiramu, kandi sente ezi, nizo MUKAMA aliijukiraho kulinda obwomeezi bwanyu.”

¹⁷MUKAMA akagambira Musa ati:

¹⁸“Ekindi, okole ebbeseni ey'omulinga ey'okunaabiramu. Ogikorre ekikondo eky'omulinga eky'okugyemerezaamu, ogite hagati ey'Eheema ey'okutangatanganiramu n'itambiro. Ebbeseni egi, ogitemu amaizi,

¹⁹aga Arooni n'abatabani baraanaabaga emikono n'amaguru

²⁰obu baraabaga nibaija kutaaha omu Heema ey'okutangatanganiramu, rundi nibairirra itambiro kuhongera MUKAMA ekihongwa ekyokeze.

²¹Babanze banaabe amaizi ago, emikono n'amaguru, bataija kufa. Kinu kiragiro kyabo ekitalihwaho, ekirukukwata Arooni n'abaijukuru be ebiro byabo byona.”

²²Ekindi, MUKAMA yagambira Musa ati:

²³“Okwate ebiboya ebirukukira ebindi kuboya kurungi, nibyo binu: amagita agarukuboya, kiloguraamu mukaaga, n'ebiboya kurungi kimu kyakabiri kyago agarukuboya obu nizo kiloguraamu isatu, amagita ag'omu miseke kiloguraamu isatu,

²⁴n'aga kasiya kiloguraamu mukaaga kusigikira ha mulengo gw'ekiikaro ekirukwera hamu na lita emu ey'amagita ga oliva.

²⁵Ebi, nibyo oteeke hamu, birugwemu amagita ag'omuhendo, aganyakutabwirwe nk'ag'omutabuzi ow'ebiboya ebirungi; garaabaga magita ageeziibwe, ag'okuseesaho ab'okwezibwa.

²⁶Ogaseeseho Eheema ey'okutangatanganiramu n'esanduuko ey'endagaano.

²⁷Emeeza n'ebintu byayo byona, ekikondo eky'etaara n'ebicweka byakyo, itambiro ery'okucumiikirirraho obubbani,

²⁸itambiro ery'okwokezaaho ebihongwa, n'ebintu byalyo byona, ebbeseni n'ebikondo byayo.

²⁹Ebintu ebi byona obyeze, nukwo bibe birukwera mali; ekintu kyona ekiraabikorahoga, kiraabaga kirukwera.

³⁰Arooni n'abatabani, obeeze, nukwo basobole kumpeereza nibakora omulimo ogw'obunyakatagara.

³¹Ogambire abantu ba Isirairi oti: ‘Amagita ganu garaabaga magita gange agarukwera, ag'okuseesahoga ab'okwezibwa, ebiro byanyu byona.

³²Gataliseeswaho bantu kwonka, kandi otalikora amagita agandi nk'ago, aganyakurugire omu bintu nk'ebi. Amagita ganu, nigeera, na inywe, mwikalege nimumanyira kimu nkooku garukwera.

³³Weena ow'alikora amagita nka ganu, rundi ow'aligaseesaho ow'atagasemeriire, asendwe omu bantu b'owabo.’ ”

³⁴MUKAMA yagambira Musa ati: “Okwate ebiboya ebirungi; [2] eseeta, eraza, n'emisole, ebiboya ebirungi, ebirukuboya kurungi.

³⁵Ebintu ebi, bitaburwe nibigendererwa, ekiboya eki, okikole kurungi nk'ekinyakukozirwe omukozi w'ebiboya; okirungemu ekisura, kibe kirungi mali kandi ekirukwera.

³⁶Ocweho ekicweka kyakyo, okise kiniinuuke; hali eki, oiheho ekicweka, okite omumaiso ag'esanduuko ey'endagaano omu Heema ey'okutangatanganiramu, nambere ndaatangatanganiraga na inywe. Ekiboya eki, hali inywe, kiraabaga kirukwera mali.

³⁷Ekiboya eki oraakora nkooku oyolekerwe, tokyekoliire kukikozesa eby'orukugonza, mumanye nkooku kiri kintu kya MUKAMA ekirukwera.

³⁸Weena ow'alikora ekiboya nka kinu kukyesiiga, asendwe, aihwe omu bantu ab'owabo.”